KBC ಶೂಟಿಂಗ್ ವೇಳೆ ಜಾರಿ ಬಿದ್ದ ನಟ ಅಮಿತಾಭ್ ಬಚ್ಚನ್; ಮೊಣಕಾಲಿಗೆ ಗಾಯ

ಮುಂಬೈ: ಬಾಲಿವುಡ್ ಹಿರಿಯ ನಟ ಅಮಿತಾಭ್ ಬಚ್ಚನ್ ಅವರು ಕೌನ್ ಬನೇಗಾ ಕರೋಡ್‌ಪತಿ 18 (KBC 18) ಕಾರ್ಯಕ್ರಮದ ಶೂಟಿಂಗ್ ವೇಳೆ ಜಾರಿ ಬಿದ್ದು ಮೊಣಕಾಲಿಗೆ ಗಾಯ ಮಾಡಿಕೊಂಡಿದ್ದಾರೆ. ಬುಧವಾರ ಪ್ರಸಾರವಾದ ಕಾರ್ಯಕ್ರಮದ ವೇಳೆ ಸ್ವತಃ ಅಮಿತಾಭ್ ಬಚ್ಚನ್ ಈ ವಿಷಯವನ್ನು ಬಹಿರಂಗಪಡಿಸಿದ್ದಾರೆ.

ಸಾಮಾನ್ಯವಾಗಿ KBC ಕಾರ್ಯಕ್ರಮದಲ್ಲಿ ತಮ್ಮ ಪ್ರಸಿದ್ಧ ಆರಂಭಿಕ ಮಾತುಗಳನ್ನು ವೇದಿಕೆಯ ಮಧ್ಯಭಾಗದಲ್ಲಿ ನಿಂತುಕೊಂಡೇ ಹೇಳುವ ಅಮಿತಾಭ್ ಬಚ್ಚನ್, ಈ ಬಾರಿ ಕುಳಿತಲ್ಲೇ ತಮ್ಮ ಮಾತುಗಳನ್ನು ಹೇಳಿದ್ದಾರೆ. ಇದಕ್ಕೆ ಕಾರಣವನ್ನು ವಿವರಿಸಿದ ಅವರು, ಶೂಟಿಂಗ್ ವೇಳೆ ತಮಗೆ ಮೊಣಕಾಲಿಗೆ ಗಾಯವಾಗಿರುವುದರಿಂದ ನಿಲ್ಲಲು ಸ್ವಲ್ಪ ಕಷ್ಟವಾಗುತ್ತಿದೆ ಎಂದು ತಿಳಿಸಿದ್ದಾರೆ.

“ಸಾಮಾನ್ಯವಾಗಿ ನಾನು ವೇದಿಕೆಯ ಮಧ್ಯದಲ್ಲಿ ನಿಂತುಕೊಂಡು ನನ್ನ ಮಾತುಗಳನ್ನು ಆರಂಭಿಸುತ್ತೇನೆ. ಆದರೆ ಇಂದು ನನಗೆ ಮೊಣಕಾಲಿನ ಗಾಯವಾಗಿದೆ. ನಿನ್ನೆ ಶೂಟಿಂಗ್ ವೇಳೆ ಜಾರಿ ಬಿದ್ದು ಮೊಣಕಾಲಿಗೆ ಗಾಯ ಮಾಡಿಕೊಂಡಿದ್ದೇನೆ,” ಎಂದು ಅಮಿತಾಭ್ ಬಚ್ಚನ್ ಹೇಳಿದ್ದಾರೆ. ಗಾಯ ಗಂಭೀರವಾಗಿಲ್ಲ ಎಂದು ಅಭಿಮಾನಿಗಳಿಗೆ ಭರವಸೆ ನೀಡಿರುವ ಅವರು, ಶೀಘ್ರದಲ್ಲೇ ಚೇತರಿಸಿಕೊಳ್ಳುವುದಾಗಿ ತಿಳಿಸಿದ್ದಾರೆ.

ನಿವೃತ್ತಿ ವದಂತಿಗೂ ಸ್ಪಷ್ಟನೆ

ಇದೇ ವೇಳೆ ಅಮಿತಾಭ್ ಬಚ್ಚನ್ ಅವರು ಇತ್ತೀಚೆಗೆ ನಿವೃತ್ತಿಯಾಗಲಿದ್ದಾರೆ ಎಂಬ ವದಂತಿಗಳಿಗೂ ಸ್ಪಷ್ಟನೆ ನೀಡಿದ್ದಾರೆ. ತಮ್ಮ ಬ್ಲಾಗ್‌ನಲ್ಲಿ “It’s late, time to retire” ಎಂದು ಬರೆದಿದ್ದ ಮಾತುಗಳನ್ನು ಕೆಲವರು ಅವರು ಚಿತ್ರರಂಗದಿಂದ ನಿವೃತ್ತಿಯಾಗುತ್ತಿದ್ದಾರೆ ಎಂದು ಅರ್ಥೈಸಿದ್ದರು.ಆದರೆ, ತಾವು ಕೆಲಸದಿಂದ ನಿವೃತ್ತಿಯಾಗುವ ಬಗ್ಗೆ ಮಾತನಾಡಿರಲಿಲ್ಲ. ತಡವಾಗಿರುವುದರಿಂದ ಮಲಗಲು ಹೋಗುವ ಸಮಯವಾಗಿದೆ ಎಂಬ ಅರ್ಥದಲ್ಲಿ ‘retire’ ಪದ ಬಳಸಿದ್ದಾಗಿ ಅಮಿತಾಭ್ ಬಚ್ಚನ್ ಸ್ಪಷ್ಟಪಡಿಸಿದ್ದಾರೆ. ಸದ್ಯ ಅಮಿತಾಭ್ ಬಚ್ಚನ್ ಅವರು KBC 18 ಕಾರ್ಯಕ್ರಮದ ನಿರೂಪಕರಾಗಿ ಮುಂದುವರಿದಿದ್ದಾರೆ

ದೃಶ್ಯಂ-3 ಚಿತ್ರಕ್ಕೆ ಅಜಯ್ ದೇವಗನ್‌ಗೆ ₹18 ಕೋಟಿ ಸಂಭಾವನೆ

ಮುಂಬೈ: ಬಹುನಿರೀಕ್ಷಿತ ದೃಶ್ಯಂ-3 : The Conclusion ಚಿತ್ರದ ಬಿಡುಗಡೆಗೆ ನಟ ಅಜಯ್ ದೇವಗನ್ ಸಜ್ಜಾಗಿದ್ದಾರೆ. ಚಿತ್ರದಲ್ಲಿ ಮತ್ತೊಮ್ಮೆ ವಿಜಯ್ ಸಾಲ್ಗಾಂವ್ಕರ್ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿರುವ ಅಜಯ್ ದೇವಗನ್ ಅವರಿಗೆ ಎಷ್ಟು ಸಂಭಾವನೆ ನೀಡಲಾಗುತ್ತಿದೆ ಎಂಬುದು ಇದೀಗ ಚರ್ಚೆಗೆ ಬಂದಿದೆ.

ಅಜಯ್ ದೇವಗನ್‌ಗೆ ಎಷ್ಟು ಸಂಭಾವನೆ?

NewsX ವರದಿಯ ಪ್ರಕಾರ, Drishyam 3: The Conclusion ಚಿತ್ರದಲ್ಲಿ ವಿಜಯ್ ಸಾಲ್ಗಾಂವ್ಕರ್ ಪಾತ್ರಕ್ಕಾಗಿ ಅಜಯ್ ದೇವಗನ್ ಅವರಿಗೆ ಸುಮಾರು ₹18 ಕೋಟಿಯಿಂದ ₹22 ಕೋಟಿ ಸಂಭಾವನೆ ನೀಡಲಾಗುತ್ತಿದೆ ಎನ್ನಲಾಗಿದೆ.

2022ರ ನವೆಂಬರ್‌ನಲ್ಲಿ ಬಿಡುಗಡೆಯಾದ Drishyam 2 ಚಿತ್ರಕ್ಕಾಗಿ ಅಜಯ್ ದೇವಗನ್ ಅವರು ಸುಮಾರು ₹30 ಕೋಟಿ ಸಂಭಾವನೆ ಪಡೆದಿದ್ದರು ಎಂದು ವರದಿಯಾಗಿದೆ. ಆದರೆ 2015ರಲ್ಲಿ ಬಿಡುಗಡೆಯಾದ ಮೊದಲ Drishyam ಚಿತ್ರಕ್ಕೆ ಅವರು ಪಡೆದಿದ್ದ ನಿಖರ ಸಂಭಾವನೆಯ ಅಧಿಕೃತ ಮಾಹಿತಿ ಲಭ್ಯವಿಲ್ಲ.

ತಬುಗೆ 7 ಪಟ್ಟು ಕಡಿಮೆ ಸಂಭಾವನೆ?

ಅಜಯ್ ದೇವಗನ್ ಅವರಿಗೆ ₹18-22 ಕೋಟಿ ಸಂಭಾವನೆ ಸಿಗುತ್ತಿದೆ ಎನ್ನಲಾಗುತ್ತಿರುವ ಬೆನ್ನಲ್ಲೇ, ತಬು ಅವರಿಗೆ ಇದಕ್ಕಿಂತ ಕಡಿಮೆ ಸಂಭಾವನೆ ನೀಡಲಾಗುತ್ತಿದೆ ಎಂದು ವರದಿಯಾಗಿದೆ.

News24 ವರದಿ ಪ್ರಕಾರ, ಚಿತ್ರದಲ್ಲಿ ಮೀರಾ ದೇಶಮುಖ್ ಪಾತ್ರದಲ್ಲಿ ನಟಿಸಿರುವ ತಬು ಅವರಿಗೆ ಸುಮಾರು ₹2.5 ಕೋಟಿಯಿಂದ ₹3.5 ಕೋಟಿ ಸಂಭಾವನೆ ನೀಡಲಾಗುತ್ತಿದೆ ಎನ್ನಲಾಗಿದೆ.

ಇನ್ನು ನಂದಿನಿ ಸಾಲ್ಗಾಂವ್ಕರ್ ಪಾತ್ರವನ್ನು ಮತ್ತೆ ನಿರ್ವಹಿಸಲಿರುವ ಶ್ರಿಯಾ ಸರನ್‌ಗೆ ಸುಮಾರು ₹1 ಕೋಟಿ ಸಂಭಾವನೆ ಸಿಗುತ್ತಿದೆ ಎಂದು ವರದಿಯಾಗಿದೆ.

ಇಶಿತಾ ದತ್ತಾಗೆ ₹50 ಲಕ್ಷ?

ವಿಜಯ್ ಮತ್ತು ನಂದಿನಿಯ ಹಿರಿಯ ಮಗಳು ಅಂಜು ಪಾತ್ರದಲ್ಲಿ ನಟಿಸಿರುವ ಇಶಿತಾ ದತ್ತಾ ಅವರಿಗೆ ಸುಮಾರು ₹50 ಲಕ್ಷ ಸಂಭಾವನೆ ನೀಡಲಾಗುತ್ತಿದೆ ಎಂದು ವರದಿಯಾಗಿದೆ.

ಮೀರಾ ದೇಶಮುಖ್ ಅವರ ಪತಿ ಮಹೇಶ್ ದೇಶಮುಖ್ ಪಾತ್ರದಲ್ಲಿ ಕಾಣಿಸಿಕೊಳ್ಳುವ ರಜತ್ ಕಪೂರ್‌ಗೆ ₹40 ಲಕ್ಷದಿಂದ ₹70 ಲಕ್ಷ ಸಂಭಾವನೆ ಸಿಗುತ್ತಿದೆ ಎನ್ನಲಾಗಿದೆ.

ಚಿತ್ರದಲ್ಲಿ ಪ್ರಮುಖ ಪಾತ್ರದಲ್ಲಿ ಜೈದೀಪ್ ಅಹ್ಲಾವತ್ ಕೂಡ ನಟಿಸುತ್ತಿದ್ದಾರೆ. ಆದರೆ ಅವರ ಸಂಭಾವನೆಗೆ ಸಂಬಂಧಿಸಿದ ವಿವರಗಳು ಸದ್ಯಕ್ಕೆ ಬಹಿರಂಗವಾಗಿಲ್ಲ.

ಅಕ್ಟೋಬರ್ 2ಕ್ಕೆ ತೆರೆಗೆ

ಅಭಿಷೇಕ್ ಪಾಠಕ್ ನಿರ್ದೇಶನದ Drishyam 3: The Conclusion ಚಿತ್ರವು 2026ರ ಅಕ್ಟೋಬರ್ 2ರಂದು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದೆ. ವಿಜಯ್ ಸಾಲ್ಗಾಂವ್ಕರ್ ಮತ್ತೊಮ್ಮೆ ತನಿಖೆಯಿಂದ ತಪ್ಪಿಸಿಕೊಳ್ಳಲು ಸಾಧ್ಯವಾಗುತ್ತದೆಯೇ? ಅಥವಾ ಆತನ ಹಿಂದಿನ ರಹಸ್ಯಗಳು ಮತ್ತೆ ಬೆನ್ನತ್ತಲಿವೆಯೇ ಎಂಬುದನ್ನು ಚಿತ್ರದಲ್ಲಿ ತೋರಿಸಲಾಗುತ್ತದೆ.