ಅಪರಿಚಿತ ಪ್ರದೇಶಗಳಲ್ಲಿ ಸಂಚರಿಸುವಾಗ ಕಣ್ಣುಮುಚ್ಚಿ ಗೂಗಲ್ ಮ್ಯಾಪ್‌ನಂತಹ ತಂತ್ರಜ್ಞಾನಗಳನ್ನು ಅವಲಂಬಿಸುವುದು ಎಷ್ಟು ಅಪಾಯಕಾರಿ ಎಂಬುದಕ್ಕೆ ಪಶ್ಚಿಮ ಬಂಗಾಳದಲ್ಲಿ ನಡೆದ ಘಟನೆಯೊಂದು ನಿದರ್ಶನವಾಗಿ ಹೊರಹೊಮ್ಮಿದೆ. ಅಪರಿಚಿತ ಮಾರ್ಗದಲ್ಲಿ ಗೂಗಲ್ ಮ್ಯಾಪ್ ನಿರ್ದೇಶನವನ್ನು ನಂಬಿ ಸಾಗುತ್ತಿದ್ದ ಯುವ ಬೈಕ್ ಸವಾರನೊಬ್ಬ, ಗಣಿ ಕುಸಿತದಿಂದಾಗಿ ರಸ್ತೆ ಮಧ್ಯದಲ್ಲೇ ಉಂಟಾಗಿದ್ದ ಆಳವಾದ ಕಂದಕಕ್ಕೆ ಬಿದ್ದು ಗಂಭೀರವಾಗಿ ಗಾಯಗೊಂಡಿದ್ದಾನೆ. ರಾತ್ರಿಯಿಡೀ ನಡೆಸಿದ ನಿರಂತರ ಶೋಧ ಕಾರ್ಯಾಚರಣೆಯ ನಂತರ ಪೊಲೀಸರು ಶನಿವಾರ ಬೆಳಿಗ್ಗೆ ಆತನನ್ನು ರಕ್ಷಿಸಿದ್ದಾರೆ.
ಪಶ್ಚಿಮ ಬರ್ಧಮಾನ್ ಜಿಲ್ಲೆಯ ಕಾಂಕ್ಸಾ ನಿವಾಸಿಯಾದ ಪ್ರಸೂನ್ ಬಂಡೋಪಾಧ್ಯಾಯ ಎಂಬ ಕೇಬಲ್ ಆಪರೇಟರ್ ಈ ದುರಂತಕ್ಕೆ ತುತ್ತಾದವರು. ಶುಕ್ರವಾರ ಸಂಜೆ ವೃತ್ತಿಪರ ಕೆಲಸದ ನಿಮಿತ್ತ ಮನೆಯಿಂದ ಹೊರಟಿದ್ದ ಪ್ರಸೂನ್, ಹೊಸ ಪ್ರದೇಶವಾದ್ದರಿಂದ ಮೊಬೈಲ್‌ನಲ್ಲಿ ಗೂಗಲ್ ಮ್ಯಾಪ್ ಸಹಾಯ ಪಡೆದು ದ್ವಿಚಕ್ರ ವಾಹನದಲ್ಲಿ ಸಾಗುತ್ತಿದ್ದರು. ಆದರೆ ಆ ಗೂಗಲ್ ಮ್ಯಾಪ್ ಅವರನ್ನು ಅಪಾಯಕಾರಿ ಹಾಗೂ ನಿರ್ಜನ ಹಾದಿಗೆ ಕರೆದೊಯ್ದಿದೆ. ಹರಿಪುರದ ಹಳೆಯ ಭಟ್ಮುರಾ ಪ್ರದೇಶಕ್ಕೆ ತಲುಪುತ್ತಿದ್ದಂತೆ, ಕತ್ತಲಿನಲ್ಲಿ ರಸ್ತೆ ಕುಸಿದು ಉಂಟಾಗಿದ್ದ ಬೃಹತ್ ಕಂದಕದೊಳಗೆ ಅವರು ವಾಹನ ಸಮೇತ ನೇರವಾಗಿ ಬಿದ್ದಿದ್ದಾರೆ.
ಅಪಘಾತ ಸಂಭವಿಸಿದ ಕೆಲವೇ ಕ್ಷಣಗಳಲ್ಲಿ ತೀವ್ರ ಆಘಾತದಲ್ಲಿದ್ದ ಯುವಕ ಹೇಗೋ ಮೊಬೈಲ್ ಮೂಲಕ ತನ್ನ ಸಂಬಂಧಿಕರಿಗೆ ಕರೆ ಮಾಡಿದ್ದಾನೆ. ಆದರೆ ಬಿದ್ದ ರಭಸಕ್ಕೆ ತೀವ್ರ ಗಾಯಗಳಾಗಿದ್ದರಿಂದ ಹಾಗೂ ದಿಗ್ಭ್ರಮೆಗೊಂಡಿದ್ದರಿಂದ ತಾನು ಎಲ್ಲಿದ್ದೇನೆ ಎಂಬುದನ್ನು ಸರಿಯಾಗಿ ವಿವರಿಸಲು ಆತನಿಗೆ ಸಾಧ್ಯವಾಗಲಿಲ್ಲ. ಅಸ್ಪಷ್ಟವಾಗಿ ಮಾತನಾಡುತ್ತಿದ್ದ ಯುವಕನ ಮಾತು ಕೇಳಿ ಗಾಬರಿಗೊಂಡ ಕುಟುಂಬಸ್ಥರು ತಕ್ಷಣವೇ ಸ್ಥಳೀಯ ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ತಕ್ಷಣವೇ ಕಾರ್ಯಪ್ರವೃತ್ತರಾದ ಪೊಲೀಸರು ರಾತ್ರಿಯಿಡೀ ಆ ಭಾಗದಲ್ಲಿ ವ್ಯಾಪಕ ಶೋಧ ಕಾರ್ಯ ಕೈಗೊಂಡರು.
ಪೊಲೀಸರು ಯುವಕನೊಂದಿಗೆ ಸಂಪರ್ಕ ಸಾಧಿಸಲು ಯತ್ನಿಸಿದಾಗಲೆಲ್ಲಾ ಆತ ಗೊಂದಲದಿಂದ ತಪ್ಪು ಸ್ಥಳಗಳ ಹೆಸರುಗಳನ್ನು ಹೇಳುತ್ತಿದ್ದನು. ಅಂತಿಮವಾಗಿ ಆತನ ಮೊಬೈಲ್ ಸಂಕೇತ ಗೋಪುರದ ಜಾಡು ಹಿಡಿದ ರಕ್ಷಣಾ ತಂಡ, ಕಲ್ಲಿದ್ದಲು ಗಣಿ ಪ್ರಾಧಿಕಾರದ ನೆರವಿನೊಂದಿಗೆ ಶನಿವಾರ ಮುಂಜಾನೆ ಕಂದಕದಲ್ಲಿದ್ದ ಆತನನ್ನು ಪತ್ತೆಹಚ್ಚಿ ಮೇಲಕ್ಕೆತ್ತಿದೆ. ತಕ್ಷಣವೇ ಆತನನ್ನು ಹೆಚ್ಚಿನ ಚಿಕಿತ್ಸೆಗಾಗಿ ದುರ್ಗಾಪುರದ ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಸದ್ಯ ಆತ ಚಿಕಿತ್ಸೆ ಪಡೆಯುತ್ತಿದ್ದಾನೆ.
ಈ ದುರಂತ ಸಂಭವಿಸಿದ ಪ್ರದೇಶವು ಈಸ್ಟರ್ನ್ ಕೋಲ್ ಫೀಲ್ಡ್ಸ್ ಲಿಮಿಟೆಡ್ ಅಧೀನದಲ್ಲಿದ್ದು, ಕಲ್ಲಿದ್ದಲು ಗಣಿಗಾರಿಕೆಯ ಕಾರಣದಿಂದ ರಸ್ತೆಯು ಕುಸಿದು ಬೃಹತ್ ಹೊಂಡ ನಿರ್ಮಾಣವಾಗಿತ್ತು. ಗಣಿಗಾರಿಕೆಗಾಗಿ ಆಡಳಿತ ಮಂಡಳಿಯು ಈ ಮಾರ್ಗವನ್ನು ಮುಚ್ಚಿತ್ತಾದರೂ, ಈ ಬಗ್ಗೆ ಹೊಸಬರಿಗೆ ಯಾವುದೇ ಮಾಹಿತಿ ಇರಲಿಲ್ಲ ಮತ್ತು ಅಪಾಯವನ್ನು ಸೂಚಿಸುವ ಸೂಕ್ತ ಎಚ್ಚರಿಕೆ ಫಲಕಗಳನ್ನೂ ಅಳವಡಿಸಿರಲಿಲ್ಲ ಎಂದು ಸ್ಥಳೀಯರು ಆರೋಪಿಸಿದ್ದಾರೆ. ಗಾಯಾಳು ಯುವಕ ಚೇತರಿಸಿಕೊಂಡು ಹೇಳಿಕೆ ನೀಡಿದ ಬಳಿಕ ಘಟನೆಯ ಕುರಿತು ಮುಂದಿನ ಕ್ರಮ ಕೈಗೊಳ್ಳಲಾಗುವುದು ಎಂದು ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ.
