2027ರ ಆಗಸ್ಟ್ 2ರಂದು ಸಂಭವಿಸಲಿರುವ ಸಂಪೂರ್ಣ ಸೂರ್ಯಗ್ರಹಣವು 21ನೇ ಶತಮಾನದ ಅತಿ ದೀರ್ಘ ಸೂರ್ಯಗ್ರಹಣವಾಗಲಿದೆ ಎಂದು ಖಗೋಳ ವಿಜ್ಞಾನಿಗಳು ತಿಳಿಸಿದ್ದಾರೆ. ಈ ಅಪರೂಪದ ಖಗೋಳ ಘಟನೆಯ ವೇಳೆ ಜಗತ್ತಿನ ಕೆಲವು ಭಾಗಗಳಲ್ಲಿ 6 ನಿಮಿಷ 23 ಸೆಕೆಂಡುಗಳ ಕಾಲ ಸಂಪೂರ್ಣ ಕತ್ತಲೆ ಆವರಿಸಲಿದೆ.
ಸೂರ್ಯಗ್ರಹಣದ ವೇಳೆ ಚಂದ್ರನು ಸೂರ್ಯನನ್ನು ಸಂಪೂರ್ಣವಾಗಿ ಆವರಿಸುವುದರಿಂದ ಈ ಘಟನೆಯನ್ನು ಸಂಪೂರ್ಣ ಸೂರ್ಯಗ್ರಹಣ ಎಂದು ಕರೆಯಲಾಗುತ್ತದೆ. ಈ ಅವಧಿಯಲ್ಲಿ ತಾಪಮಾನದಲ್ಲಿ ಗಮನಾರ್ಹ ಇಳಿಕೆಯಾಗುವ ಸಾಧ್ಯತೆಯಿದ್ದು, ಹಗಲಿನಲ್ಲೇ ಆಕಾಶದಲ್ಲಿ ನಕ್ಷತ್ರಗಳೂ ಗೋಚರಿಸುವ ಅಪರೂಪದ ದೃಶ್ಯವನ್ನು ಕಾಣಬಹುದು.
ಯಾವೆಲ್ಲ ದೇಶಗಳಲ್ಲಿ ಗೋಚರಿಸುತ್ತದೆ?
ಈ ಸಂಪೂರ್ಣ ಸೂರ್ಯಗ್ರಹಣವು ಅಟ್ಲಾಂಟಿಕ್ ಮಹಾಸಾಗರದ ಮಾರ್ಗವಾಗಿ ಸಾಗುತ್ತಾ ಅಲ್ಜೀರಿಯಾ, ಟ್ಯುನೀಷಿಯಾ, ಲಿಬಿಯಾ, ಈಜಿಪ್ಟ್, ಸೌದಿ ಅರೇಬಿಯಾ, ಯೆಮನ್, ಸೋಮಾಲಿಯಾ ಹಾಗೂ ಮಕ್ಕಾ ಸೇರಿದಂತೆ ಹಲವು ಪ್ರದೇಶಗಳಲ್ಲಿ ಸಂಪೂರ್ಣವಾಗಿ ಗೋಚರಿಸಲಿದೆ.
ಭಾರತದಲ್ಲಿ ಕಾಣಿಸುತ್ತದೆಯೇ?
ಭಾರತದಲ್ಲಿ ಈ ಗ್ರಹಣ ಸಂಪೂರ್ಣವಾಗಿ ಅಲ್ಲ, ಭಾಗಶಃ ಸೂರ್ಯಗ್ರಹಣವಾಗಿ ಮಾತ್ರ ಕಾಣಿಸಲಿದೆ. ದೇಶದ ವಿವಿಧ ಭಾಗಗಳಲ್ಲಿ ಚಂದ್ರನು ಸೂರ್ಯನ ಒಂದು ಭಾಗವನ್ನು ಮಾತ್ರ ಆವರಿಸುವುದರಿಂದ ಸಂಪೂರ್ಣ ಕತ್ತಲೆ ಉಂಟಾಗುವುದಿಲ್ಲ.
ಏಕೆ ಇದು ವಿಶೇಷ?
ಚಂದ್ರನು ಭೂಮಿಗೆ ಅತ್ಯಂತ ಸಮೀಪದಲ್ಲಿದ್ದು, ಸೂರ್ಯನಿಗೆ ತುಲನಾತ್ಮಕವಾಗಿ ದೂರದಲ್ಲಿರುವ ಜ್ಯಾಮಿತೀಯ ಸ್ಥಿತಿಯಿಂದ ಈ ದೀರ್ಘಾವಧಿಯ ಸಂಪೂರ್ಣ ಸೂರ್ಯಗ್ರಹಣ ಸಂಭವಿಸುತ್ತಿದೆ. 2009ರ ನಂತರ ಭೂಮಿಯಿಂದ ಸ್ಪಷ್ಟವಾಗಿ ವೀಕ್ಷಿಸಬಹುದಾದ ಅತಿ ದೀರ್ಘ ಸಂಪೂರ್ಣ ಸೂರ್ಯಗ್ರಹಣ ಇದಾಗಲಿದೆ. ಇದರ ಗರಿಷ್ಠ ಅವಧಿ 6 ನಿಮಿಷ 23 ಸೆಕೆಂಡುಗಳು ಆಗಿದ್ದು, ಈಜಿಪ್ಟ್ನ ಲುಕ್ಸರ್ ಸಮೀಪದಲ್ಲಿ ಈ ಗರಿಷ್ಠ ಅವಧಿ ದಾಖಲಾಗಲಿದೆ.
ವೀಕ್ಷಿಸುವಾಗ ಎಚ್ಚರಿಕೆ ಅಗತ್ಯ
ಖಗೋಳ ವಿಜ್ಞಾನಿಗಳು ಸೂರ್ಯಗ್ರಹಣವನ್ನು ನೇರವಾಗಿ ಕಣ್ಣಿನಿಂದ ನೋಡಬಾರದು ಎಂದು ಎಚ್ಚರಿಕೆ ನೀಡಿದ್ದಾರೆ. ವಿಶೇಷ ಸೋಲಾರ್ ವ್ಯೂಯಿಂಗ್ ಗ್ಲಾಸ್ಗಳು (Solar Viewing Glasses) ಬಳಸಿ ಮಾತ್ರ ವೀಕ್ಷಿಸಬೇಕು. ಸಾಮಾನ್ಯ ಸನ್ಗ್ಲಾಸ್ಗಳು ಸುರಕ್ಷಿತವಲ್ಲ.
ಭಾರತದಲ್ಲಿ ಆಚರಣೆಗಳು
ಸೂರ್ಯಗ್ರಹಣದ ವೇಳೆ ಭಾರತದಲ್ಲಿ ಅನೇಕರು ಧಾರ್ಮಿಕ ಆಚರಣೆಗಳನ್ನು ಪಾಲಿಸುತ್ತಾರೆ. ಮಂತ್ರ ಪಠಣ, ಪೂಜೆ-ಪುನಸ್ಕಾರ ನಡೆಸುವುದು, ಕೆಲವು ರಾಶಿಯವರು ಹೊರಗೆ ಹೋಗುವುದನ್ನು ತಪ್ಪಿಸುವುದು ಸೇರಿದಂತೆ ಸಂಪ್ರದಾಯದಂತೆ ವಿವಿಧ ನಿಯಮಗಳನ್ನು ಅನುಸರಿಸಲಾಗುತ್ತದೆ. ಈ ಅಪರೂಪದ ಸಂಪೂರ್ಣ ಸೂರ್ಯಗ್ರಹಣವನ್ನು ಖಗೋಳ ವಿಜ್ಞಾನದಲ್ಲಿ ಐತಿಹಾಸಿಕ ಘಟನೆಯೆಂದು ಪರಿಗಣಿಸಲಾಗಿದ್ದು, ವಿಶ್ವದ ಖಗೋಳಾಸಕ್ತರ ಗಮನ ಸೆಳೆದಿದೆ.
