ದೇಹದ ಆರೋಗ್ಯ ಕಾಪಾಡಿಕೊಳ್ಳಲು ಹಾಗೂ ತೂಕ ನಿಯಂತ್ರಣದಲ್ಲಿಡಲು ಆಹಾರದಲ್ಲಿ ಪ್ರೋಟೀನ್ ಪ್ರಮಾಣ ಹೆಚ್ಚಿರಬೇಕಾದದ್ದು ಅತ್ಯಗತ್ಯ. ಈ ಪ್ರೋಟೀನ್ಗಾಗಿ ಪ್ರತಿಯೊಬ್ಬರೂ ಹೆಚ್ಚಾಗಿ ಆಯ್ಕೆ ಮಾಡಿಕೊಳ್ಳುವುದು ಕೋಳಿ ಮಾಂಸ ಮತ್ತು ಮೊಟ್ಟೆಗಳನ್ನು. ಇವೆರಡೂ ಪೌಷ್ಟಿಕಾಂಶಗಳ ಗಣಿಯಾಗಿದ್ದರೂ, ಕಡಿಮೆ ಕ್ಯಾಲೊರಿಯಲ್ಲಿ ಹೆಚ್ಚು ಪ್ರೋಟೀನ್ ನೀಡುವ ವಿಚಾರಕ್ಕೆ ಬಂದಾಗ ಇವೆರಡರ ನಡುವೆ ಗಮನಾರ್ಹ ವ್ಯತ್ಯಾಸವಿದೆ.
ಅಧಿಕೃತ ಪೋಷಕಾಂಶಗಳ ಮಾಹಿತಿಯ ಪ್ರಕಾರ, 100 ಗ್ರಾಂ ಬೇಯಿಸಿದ ಕೋಳಿ ಎದೆಮಾಂಸದಿಂದ ಸುಮಾರು 31 ಗ್ರಾಂ ಪ್ರೋಟೀನ್, 165 ಕ್ಯಾಲೊರಿ ಹಾಗೂ 3.6 ಗ್ರಾಂ ಕೊಬ್ಬು ಸಿಗುತ್ತದೆ. ಅದೇ ರೀತಿ 100 ಗ್ರಾಂ ಬೇಯಿಸಿದ ಮೊಟ್ಟೆಯಿಂದ 12.6 ಗ್ರಾಂ ಪ್ರೋಟೀನ್, 155 ಕ್ಯಾಲೊರಿ ಮತ್ತು 10.6 ಗ್ರಾಂ ಕೊಬ್ಬು ಲಭ್ಯವಾಗುತ್ತದೆ. ಇವೆರಡರ ನಡುವಿನ ಕ್ಯಾಲೊರಿ ವ್ಯತ್ಯಾಸ ಕೇವಲ 10 ಕ್ಯಾಲೊರಿ ಮಾತ್ರವಾಗಿದ್ದರೂ, ಪ್ರೋಟೀನ್ ವಿಚಾರದಲ್ಲಿ ಕೋಳಿ ಮಾಂಸವು ಮೊಟ್ಟೆಗಿಂತ ಎರಡರಷ್ಟಕ್ಕಿಂತ ಹೆಚ್ಚು ಪ್ರೋಟೀನ್ ನೀಡುತ್ತದೆ.
ಕೋಳಿ ಮಾಂಸದ ಪೌಷ್ಟಿಕಾಂಶದ ಮಹತ್ವ
ಕಡಿಮೆ ಕ್ಯಾಲೊರಿ ಸೇವಿಸಿ ಹೆಚ್ಚು ಪ್ರೋಟೀನ್ ಪಡೆಯಲು ಬಯಸುವವರಿಗೆ ಕೋಳಿ ಮಾಂಸ ಅತ್ಯುತ್ತಮ ಆಯ್ಕೆಯಾಗಿದೆ. ಇದರಲ್ಲಿ ನಯಾಸಿನ್, ವಿಟಮಿನ್ ಬಿ6, ಫಾಸ್ಫರಸ್ ಮತ್ತು ಸೆಲೆನಿಯಮ್ನಂತಹ ಪ್ರಮುಖ ಪೋಷಕಾಂಶಗಳಿದ್ದು, ಇವು ದೇಹದ ಚಯಾಪಚಯ ಕ್ರಿಯೆ ಮತ್ತು ಸ್ನಾಯುಗಳ ಬೆಳವಣಿಗೆಗೆ ನೆರವಾಗುತ್ತವೆ. ತೂಕ ಇಳಿಸಿಕೊಳ್ಳಲು ಮತ್ತು ದೇಹದ ದಾರ್ಢ್ಯತೆ ಹೆಚ್ಚಿಸಿಕೊಳ್ಳಲು ಬಯಸುವವರಿಗೆ ಇದು ಹೇಳಿ ಮಾಡಿಸಿದ ಆಹಾರ.
ಮೊಟ್ಟೆಯ ಗುಣಗಳು ಮತ್ತು ಪ್ರಯೋಜನಗಳು
ಪ್ರೋಟೀನ್ ಪ್ರಮಾಣ ಕೋಳಿ ಮಾಂಸಕ್ಕಿಂತ ಕಡಿಮೆಯಿದ್ದರೂ, ಮೊಟ್ಟೆಯಲ್ಲಿ ಅತ್ಯಗತ್ಯ ಪೋಷಕಾಂಶಗಳು ಸಮೃದ್ಧವಾಗಿವೆ. ಮೊಟ್ಟೆಯ ಹಳದಿ ಲೋಟೆಯನ್ನು ಎಸೆಯದೆ ಸೇವಿಸುವುದರಿಂದ ವಿಟಮಿನ್ ಎ, ಡಿ, ಇ ಮತ್ತು ಬಿ12 ದೇಹಕ್ಕೆ ದೊರೆಯುತ್ತವೆ. ಮೆದುಳಿನ ಶಕ್ತಿಗೆ ಅಗತ್ಯವಿರುವ ಕೋಲಿನ್ ಹಾಗೂ ಕಣ್ಣಿನ ಆರೋಗ್ಯಕ್ಕೆ ಸಹಕಾರಿಯಾದ ಲ್ಯೂಟಿನ್ ಮತ್ತು ಝೀಕ್ಸಾಂಥಿನ್ ಮುಂತಾದ ಆಂಟಿಆಕ್ಸಿಡೆಂಟ್ಗಳು ಮೊಟ್ಟೆಯಲ್ಲಿ ಹೇರಳವಾಗಿವೆ.
ನಿಮ್ಮ ಆಹಾರದಲ್ಲಿ ಯಾವುದಿರಬೇಕು?
ಕಡಿಮೆ ಕೊಬ್ಬಿನೊಂದಿಗೆ ಹೆಚ್ಚು ಪ್ರೋಟೀನ್ ಪಡೆಯುವುದು ಮತ್ತು ಸ್ನಾಯುಗಳ ಬಲವರ್ಧನೆ ನಿಮ್ಮ ಗುರಿಯಾಗಿದ್ದರೆ ಕೋಳಿ ಮಾಂಸ ಸೂಕ್ತ. ಒಂದೊಮ್ಮೆ ನಿಮಗೆ ತಕ್ಷಣಕ್ಕೆ ಸಿದ್ಧವಾಗುವ, ವಿಟಮಿನ್ಗಳು ಹಾಗೂ ಪೋಷಕಾಂಶಗಳಿಂದ ಕೂಡಿದ ಸುಲಭ ಆಹಾರ ಬೇಕಿದ್ದರೆ ಮೊಟ್ಟೆ ಅತ್ಯುತ್ತಮ.
ಆಹಾರ ತಜ್ಞರ ಪ್ರಕಾರ, ಇವೆರಡನ್ನೂ ಒಂದಕ್ಕೊಂದು ಹೋಲಿಸಿ ಒಂದನ್ನು ಮಾತ್ರ ಆಯ್ಕೆ ಮಾಡಿಕೊಳ್ಳುವ ಅಗತ್ಯವಿಲ್ಲ. ಬದಲಿಗೆ ಇವೆರಡನ್ನೂ ನಿಮ್ಮ ದೈನಂದಿನ ಸಮತೋಲಿತ ಆಹಾರ ಕ್ರಮದಲ್ಲಿ ಸೇರಿಸಿಕೊಳ್ಳುವುದು ಸಂಪೂರ್ಣ ಆರೋಗ್ಯಕ್ಕೆ ಅತ್ಯಂತ ಸೂಕ್ತ.
