ಗ್ಲ್ಯಾಸ್ಗೋದಲ್ಲಿ ಆರಂಭವಾಗಿರುವ ೨೦೨೬ರ ಕಾಮನ್ವೆಲ್ತ್ ಕ್ರೀಡಾಕೂಟದ ಭವ್ಯ ಉದ್ಘಾಟನಾ ಸಮಾರಂಭದಲ್ಲಿ ಪದಕದ ಬೇಟೆ ಆರಂಭವಾಗುವ ಮುನ್ನವೇ ಭಾರತೀಯ ಕ್ರೀಡಾಪಟುಗಳು ತಮ್ಮ ಉಡುಪಿನ ಶೈಲಿಯಿಂದ ಎಲ್ಲರ ಗಮನ ಸೆಳೆದಿದ್ದಾರೆ. ಭಾರತೀಯ ಸಾಂಪ್ರದಾಯಿಕ ಸೀರೆ ಹಾಗೂ ಆಧುನಿಕ ಶೈಲಿಯ ಬ್ಲೇಜರ್ ಮಿಶ್ರಣದ ಉಡುಪಿನಲ್ಲಿ ಭಾರತೀಯ ಕ್ರೀಡಾಪಟುಗಳು ಕ್ರೀಡಾಂಗಣಕ್ಕೆ ಆಗಮಿಸಿದ್ದು, ಪ್ರೇಕ್ಷಕರ ಮನ ಗೆದ್ದಿದ್ದಾರೆ.
ಒಲಿಂಪಿಕ್ಸ್ ಪದಕ ವಿಜೇತ ಮೀರಾಬಾಯಿ ಚಾನು ಮತ್ತು ಬಾಕ್ಸಿಂಗ್ ಚಾಂಪಿಯನ್ ಲವ್ಲೀನಾ ಬೊರ್ಗೊಹೇನ್ ಅವರು ಭಾರತದ ತ್ರಿವರ್ಣ ಧ್ವಜವನ್ನು ಹಿಡಿದು ಕ್ರೀಡಾಪಟುಗಳ ಪಥಸಂಚಲನವನ್ನು ಮುನ್ನಡೆಸಿದರು. ಸಾವಿರಾರು ವೀಕ್ಷಕರ ಕರತಾಡನದ ನಡುವೆ ಭಾರತೀಯ ತುಕಡಿ ಮೈದಾನ ಪ್ರವೇಶಿಸಿತು.
ಈ ವಿಶೇಷ ಸಮಾರಂಭಕ್ಕಾಗಿ ಮಹಿಳಾ ಅಥ್ಲೀಟ್ಗಳು ನೌಕಾಪಡೆಯ ನೀಲಿ ಬಣ್ಣದ (ನೇವಿ ಬ್ಲೂ) ಸುಂದರ ಸೀರೆಗಳನ್ನು ಉಟ್ಟಿದ್ದರು. ಸೀರೆಯ ಅಂಚಿನಲ್ಲಿ ಬೆಳ್ಳಿಯ ಬಾರ್ಡರ್ ಇದ್ದು, ಉಡುಪಿನ ಅಂದವನ್ನು ಹೆಚ್ಚಿಸಿತ್ತು. ಸಾಂಪ್ರದಾಯಿಕ ರವಿಕೆಗೆ (ಬ್ಲೌಸ್) ಬದಲಾಗಿ, ಆಕರ್ಷಕ ವಿನ್ಯಾಸದ ಬ್ಲೇಜರ್ಗಳನ್ನು ಧರಿಸಿದ್ದರು. ಬ್ಲೇಜರ್ ಮೇಲೆ ಅಧಿಕೃತ ‘ಕಾಮನ್ವೆಲ್ತ್ ಗೇಮ್ಸ್ ಭಾರತೀಯ ಬ್ಯಾಡ್ಜ್’ ಇರುವುದು ದೇಶದ ಗೌರವಕ್ಕೆ ಸಾಕ್ಷಿಯಾಗಿತ್ತು.
ಸರಳ ಕೇಶವಿನ್ಯಾಸ, ನೈಸರ್ಗಿಕ ಮೇಕಪ್ ಮತ್ತು ಕನಿಷ್ಠ ಆಭರಣಗಳೊಂದಿಗೆ ಮೀರಾಬಾಯಿ ಚಾನು ಹಾಗೂ ಲವ್ಲೀನಾ ಬೊರ್ಗೊಹೇನ್ ಶಿಸ್ತುಬದ್ಧ ಹಾಗೂ ವೃತ್ತಿಪರ ನೋಟದಲ್ಲಿ ಮಿಂಚಿದರು.
ಈ ಬಾರಿಯ ಕ್ರೀಡಾಕೂಟದಲ್ಲಿ ಭಾರತದ ಪರವಾಗಿ ನೀರಜ್ ಚೋಪ್ರಾ, ಅಥ್ಲೀಟ್ ಗುರುಂದರ್ವೀರ್ ಸಿಂಗ್, ಜಿಮ್ನಾಸ್ಟ್ ಪ್ರಣತಿ ನಾಯಕ್ ಸೇರಿದಂತೆ ಹಲವು ಬಲಶಾಲಿ ಕ್ರೀಡಾಪಟುಗಳು ಪದಕದ ನಿರೀಕ್ಷೆಯಲ್ಲಿದ್ದು, ಜುಲೈ ೨೩ ರಿಂದ ಆಗಸ್ಟ್ ೨ ರವರೆಗೆ ಈ ಪಂದ್ಯಾವಳಿಗಳು ನಡೆಯಲಿವೆ.
