ಬೆಂಗಳೂರು: ಮದುವೆ ಸಮಯದಲ್ಲಿ ಚಿನ್ನ ಕೊಟ್ಟಿರಲಿಲ್ಲವೆಂದು ಜಗಳವಾಡಿದ ಅಳಿಯ ಅತ್ತೆಯ ಮೇಲೆ ಭೀಕರವಾಗಿ ಹಲ್ಲೆ ನಡೆಸಿದ್ದಾನೆ. ಆಸ್ಪತ್ರೆಗೆ ದಾಖಲಾಗಿದ್ದ ಮಹಿಳೆ ಚಿಕಿತ್ಸೆ ಫಲಕಾರಿಯಾಗದೆ ಭಾನುವಾರ ಮೃತಪಟ್ಟಿದ್ದಾರೆ.
ವಿದ್ಯಾರಣ್ಯಪುರದ ಜೆಕೆ ಬಸವಣ್ಣ ನಗರದ ನಿವಾಸಿ ಯಾದಗಿರಿ ಮೂಲದ ರೋಷನಬಿ(45) ಮೃತಪಟ್ಟ ಮಹಿಳೆ. ಆರೋಪಿ ಅಕ್ಬರ್ ಅಲಿಯನ್ನು ಬಂಧಿಸಲಾಗಿದೆ. ಜುಲೈ 10ರಂದು ಮಧ್ಯಾಹ್ನ ವಿದ್ಯಾರಣ್ಯಪುರದ ಅತ್ತೆ ಮನೆಗೆ ಬಂದ ಅಕ್ಬರ್ ಮದುವೆಗೂ ಬಂಗಾರ ಕೊಟ್ಟಿಲ್ಲ, ಈಗ ಪುತ್ರ ಜನಿಸಿದ್ದಾನೆ ಈಗಲಾದರೂ ಬಂಗಾರ ಕೊಡಿ ಎಂದು ಕೇಳಿದ್ದಾನೆ.
ಆಗ ರೋಷನಬಿ ಈಗ ಆಗುವುದಿಲ್ಲ, ಮಗನ ಮದುವೆ ಇದ್ದಾಗ ಕೊಡುತ್ತೇನೆ ಎಂದು ಹೇಳಿದ್ದಾರೆ. ಆಗ ವಾಗ್ವಾದ ನಡೆದಿದ್ದು, ಅಕ್ಬರ್ ಅತ್ತೆಯ ತಲೆಗೆ ಕೊಡಲಿಯಿಂದ ಹೊಡೆದು ಪರಾರಿಯಾಗಿದ್ದಾನೆ. ತೀವ್ರ ರಕ್ತಸ್ರಾವದಿಂದ ಬಳಲುತ್ತಿದ್ದ ರೋಷನಬಿಯನ್ನು ಪುತ್ರಿ ರಂಜಾನ್ ಬೀ ಸ್ಥಳೀಯರ ನೆರವಿನಿಂದ ಆಸ್ಪತ್ರೆಗೆ ದಾಖಲಿಸಿದ್ದರು.
ಈ ವೇಳೆಗಾಗಲೇ ಕೋಮಾಕ್ಕೆ ಹೋಗಿದ್ದ ರೋಷನಬಿ ಭಾನುವಾರ ಚಿಕಿತ್ಸೆ ಫಲಕಾರಿಯಾಗದೆ ಮೃತಪಟ್ಟಿದ್ದಾರೆ. ಯಲಹಂಕ ಉಪನಗರ ಠಾಣೆ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ಆರೋಪಿಯನ್ನು ಬಂಧಿಸಿದ್ದಾರೆ.
