ಭಾರತದಲ್ಲಿ ಪ್ರತಿ ವರ್ಷ ಕ್ಯಾನ್ಸರ್ ಪ್ರಕರಣಗಳು ಹೆಚ್ಚಾಗುತ್ತಿರುವ ಹಿನ್ನೆಲೆಯಲ್ಲಿ, ರೋಗವನ್ನು ಆರಂಭಿಕ ಹಂತದಲ್ಲೇ ಪತ್ತೆಹಚ್ಚುವುದು ಅತ್ಯಂತ ಮಹತ್ವದ್ದಾಗಿದೆ. ಈ ಹಿನ್ನೆಲೆಯಲ್ಲಿ ಅಹಮದಾಬಾದ್ ಮೂಲದ Zydus Lifesciences ಸಂಸ್ಥೆ, Apollo Hospitals ಜೊತೆಗೂಡಿ ‘ಶೀಲ್ಡ್ ಮಲ್ಟಿ-ಕ್ಯಾನ್ಸರ್ ಡಿಟೆಕ್ಷನ್ (Shield MCD)’ ಎಂಬ ನೂತನ ರಕ್ತ ಪರೀಕ್ಷೆಯನ್ನು ಭಾರತದಲ್ಲಿ ಪರಿಚಯಿಸಿದೆ.
ಈ ಪರೀಕ್ಷೆಯಲ್ಲಿ ಒಂದೇ ಬಾರಿ ರಕ್ತದ ಮಾದರಿ ಪಡೆದು, ಸಾಮಾನ್ಯವಾಗಿ ಕಂಡುಬರುವ 10 ವಿಧದ ಕ್ಯಾನ್ಸರ್‌ಗಳ ಆರಂಭಿಕ ಲಕ್ಷಣಗಳನ್ನು ಪತ್ತೆಹಚ್ಚುವ ಸಾಮರ್ಥ್ಯವಿದೆ ಎಂದು ಸಂಸ್ಥೆಗಳು ತಿಳಿಸಿವೆ.ಅಮೆರಿಕದ Guardant Health ಅಭಿವೃದ್ಧಿಪಡಿಸಿರುವ ಈ ತಂತ್ರಜ್ಞಾನವು, ಭಾರತದಲ್ಲಿ ಲಭ್ಯವಾಗಿರುವ ಮೊದಲ ಮಲ್ಟಿ-ಕ್ಯಾನ್ಸರ್ ಅರ್ಲಿ ಡಿಟೆಕ್ಷನ್ (MCED) ರಕ್ತ ಪರೀಕ್ಷೆಯಾಗಿದೆ. ಆದರೆ ಇದು ಕ್ಯಾನ್ಸರ್ ಅನ್ನು ಖಚಿತಪಡಿಸುವ ಪರೀಕ್ಷೆಯಲ್ಲ, ಬದಲಾಗಿ ಮುನ್ನೆಚ್ಚರಿಕೆ ಸ್ಕ್ರೀನಿಂಗ್ ಸಾಧನ ಮಾತ್ರ ಎಂದು ವೈದ್ಯಕೀಯ ತಜ್ಞರು ಸ್ಪಷ್ಟಪಡಿಸಿದ್ದಾರೆ.
ಶೀಲ್ಡ್ MCD ಪರೀಕ್ಷೆ ಹೇಗೆ ಕಾರ್ಯನಿರ್ವಹಿಸುತ್ತದೆ?
45 ವರ್ಷ ಅಥವಾ ಅದಕ್ಕಿಂತ ಹೆಚ್ಚು ವಯಸ್ಸಿನ, ಸಾಮಾನ್ಯ ಅಪಾಯ ಹೊಂದಿರುವ ವ್ಯಕ್ತಿಗಳಿಗಾಗಿ ಈ ಪರೀಕ್ಷೆಯನ್ನು ರೂಪಿಸಲಾಗಿದೆ.ಕ್ಯಾನ್ಸರ್ ಕೋಶಗಳು ರಕ್ತಕ್ಕೆ ಬಿಡುಗಡೆ ಮಾಡುವ DNA ತುಣುಕುಗಳಲ್ಲಿ ಕಂಡುಬರುವ “ಮೆಥೈಲೇಷನ್ (Methylation)” ಎಂಬ ರಾಸಾಯನಿಕ ಬದಲಾವಣೆಗಳನ್ನು ಈ ಪರೀಕ್ಷೆ ವಿಶ್ಲೇಷಿಸುತ್ತದೆ. ಅತ್ಯಾಧುನಿಕ ಜಿನೋಮಿಕ್ ತಂತ್ರಜ್ಞಾನ ಹಾಗೂ ಕೃತಕ ಬುದ್ಧಿಮತ್ತೆ (AI) ನೆರವಿನಿಂದ ಅಸಾಮಾನ್ಯ DNA ಸಂಕೇತಗಳನ್ನು ಗುರುತಿಸಿ, ಕ್ಯಾನ್ಸರ್ ಇರುವ ಸಾಧ್ಯತೆ ಇದೆಯೇ? ಇದ್ದರೆ ಯಾವ ಅಂಗದಿಂದ ಆರಂಭವಾಗಿರಬಹುದು? ಎಂಬುದನ್ನು ಅಂದಾಜು ಮಾಡುತ್ತದೆ.
ಈ ಪರೀಕ್ಷೆಯಲ್ಲಿ ಈ ಕೆಳಗಿನ 10 ವಿಧದ ಕ್ಯಾನ್ಸರ್‌ಗಳಿಗೆ ಸಂಬಂಧಿಸಿದ ಸೂಚನೆಗಳನ್ನು ಪರಿಶೀಲಿಸಲಾಗುತ್ತದೆ:
- ಸ್ತನ ಕ್ಯಾನ್ಸರ್
- ಶ್ವಾಸಕೋಶ ಕ್ಯಾನ್ಸರ್
- ದೊಡ್ಡ ಕರುಳಿನ ಕ್ಯಾನ್ಸರ್
- ಯಕೃತ್ತಿನ ಕ್ಯಾನ್ಸರ್
- ಅಗ್ನ್ಯಾಶಯ ಕ್ಯಾನ್ಸರ್
- ಅಂಡಾಶಯ ಕ್ಯಾನ್ಸರ್
- ಪ್ರೋಸ್ಟೇಟ್ ಕ್ಯಾನ್ಸರ್
- ಮೂತ್ರಾಶಯ ಕ್ಯಾನ್ಸರ್
- ಜಠರ ಕ್ಯಾನ್ಸರ್
- ಅನ್ನನಾಳ ಕ್ಯಾನ್ಸರ್
ಸಾಮಾನ್ಯ ಸ್ಕ್ರೀನಿಂಗ್ ಪರೀಕ್ಷೆಗಳಿಗಿಂತ ಇದು ಹೇಗೆ ಭಿನ್ನ?
ಪ್ರಸ್ತುತ ಬಳಸಲಾಗುತ್ತಿರುವ ಮ್ಯಾಮೋಗ್ರಫಿ, ಕೊಲೊನೋಸ್ಕೋಪಿ, ಪ್ಯಾಪ್ ಸ್ಮಿಯರ್ ಹಾಗೂ ಕಡಿಮೆ ಡೋಸ್ CT ಸ್ಕ್ಯಾನ್ ಮೊದಲಾದ ಪರೀಕ್ಷೆಗಳು ಒಂದೊಂದು ವಿಧದ ಕ್ಯಾನ್ಸರ್ ಅನ್ನು ಮಾತ್ರ ಪತ್ತೆಹಚ್ಚುತ್ತವೆ.ಆದರೆ Shield MCD ಒಂದೇ ರಕ್ತ ಪರೀಕ್ಷೆಯ ಮೂಲಕ ಹಲವು ವಿಧದ ಕ್ಯಾನ್ಸರ್‌ಗಳ ಆರಂಭಿಕ ಲಕ್ಷಣಗಳನ್ನು ಏಕಕಾಲದಲ್ಲಿ ಪರಿಶೀಲಿಸುವ ಪ್ರಯತ್ನ ಮಾಡುತ್ತದೆ. ಇದರಿಂದ ಸ್ಕ್ರೀನಿಂಗ್ ಪ್ರಕ್ರಿಯೆ ಹೆಚ್ಚು ಸುಲಭ ಮತ್ತು ಕಡಿಮೆ ತೊಂದರೆಯೊಂದಿಗೆ ಪೂರ್ಣಗೊಳ್ಳುವ ಸಾಧ್ಯತೆ ಇದೆ.
ಆದಾಗ್ಯೂ, ಈ ಪರೀಕ್ಷೆಯಲ್ಲಿ ಪಾಸಿಟಿವ್ ಫಲಿತಾಂಶ ಬಂದರೆ ಮಾತ್ರ ಕ್ಯಾನ್ಸರ್ ಇದೆ ಎಂದು ಖಚಿತಪಡಿಸಲು ಸಾಧ್ಯವಿಲ್ಲ. ನಂತರ ಇಮೇಜಿಂಗ್ ಸ್ಕ್ಯಾನ್, ಎಂಡೋಸ್ಕೋಪಿ ಅಥವಾ ಬಯಾಪ್ಸಿ ಸೇರಿದಂತೆ ಹೆಚ್ಚುವರಿ ಪರೀಕ್ಷೆಗಳನ್ನು ಮಾಡಬೇಕಾಗುತ್ತದೆ. ಅದೇ ರೀತಿ ನೆಗಟಿವ್ ಫಲಿತಾಂಶ ಬಂದರೂ ಕ್ಯಾನ್ಸರ್ ಇಲ್ಲ ಎಂದು ಖಚಿತವಾಗಿ ಹೇಳಲು ಸಾಧ್ಯವಿಲ್ಲ. ಆದ್ದರಿಂದ ನಿಯಮಿತ ಸ್ಕ್ರೀನಿಂಗ್ ಪರೀಕ್ಷೆಗಳನ್ನು ಮುಂದುವರಿಸಬೇಕೆಂದು ವೈದ್ಯರು ಸಲಹೆ ನೀಡುತ್ತಾರೆ.
ಅಧ್ಯಯನಗಳು ಏನು ಹೇಳುತ್ತವೆ?
2022ರಲ್ಲಿ ಭಾರತದಲ್ಲಿ 14 ಲಕ್ಷಕ್ಕೂ ಹೆಚ್ಚು ಹೊಸ ಕ್ಯಾನ್ಸರ್ ಪ್ರಕರಣಗಳು ದಾಖಲಾಗಿದ್ದು, 9 ಲಕ್ಷಕ್ಕೂ ಹೆಚ್ಚು ಮಂದಿ ಕ್ಯಾನ್ಸರ್‌ನಿಂದ ಮೃತಪಟ್ಟಿದ್ದಾರೆ.ವಿಶೇಷವಾಗಿ ಅಗ್ನ್ಯಾಶಯ, ಯಕೃತ್ತು, ಜಠರ ಹಾಗೂ ಅಂಡಾಶಯ ಕ್ಯಾನ್ಸರ್‌ಗಳಿಗೆ ವ್ಯಾಪಕ ಸ್ಕ್ರೀನಿಂಗ್ ವ್ಯವಸ್ಥೆ ಇಲ್ಲದಿರುವುದರಿಂದ, ಈ ರೀತಿಯ MCED ರಕ್ತ ಪರೀಕ್ಷೆಗಳು ಆರಂಭಿಕ ಹಂತದಲ್ಲೇ ರೋಗ ಪತ್ತೆಗೆ ಸಹಾಯಕವಾಗಬಹುದು ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
ಇತ್ತೀಚೆಗೆ ಏಷ್ಯಾದ ಆರು ದೇಶಗಳಲ್ಲಿ 84 ಸಾವಿರಕ್ಕೂ ಹೆಚ್ಚು ಜನರ ಮೇಲೆ ನಡೆಸಿದ ಅಧ್ಯಯನದಲ್ಲಿ, ಈ ರೀತಿಯ ಮಲ್ಟಿ-ಕ್ಯಾನ್ಸರ್ ಪರೀಕ್ಷೆಗಳು ದೃಢೀಕೃತ ಕ್ಯಾನ್ಸರ್ ಪ್ರಕರಣಗಳಲ್ಲಿ ಸುಮಾರು 79% ರಷ್ಟು ಸರಿಯಾಗಿ ಪತ್ತೆಹಚ್ಚಿದ್ದು, ಕ್ಯಾನ್ಸರ್ ಇಲ್ಲದವರನ್ನು 99.9% ನಿಖರತೆಯೊಂದಿಗೆ ಗುರುತಿಸಿವೆ. ಅಲ್ಲದೆ, ಸುಮಾರು 80% ಪ್ರಕರಣಗಳಲ್ಲಿ ಕ್ಯಾನ್ಸರ್ ಯಾವ ಅಂಗದಿಂದ ಆರಂಭವಾಗಿದೆ ಎಂಬುದನ್ನೂ ಸರಿಯಾಗಿ ಅಂದಾಜಿಸಿವೆ ಎಂದು ಸಂಶೋಧಕರು ತಿಳಿಸಿದ್ದಾರೆ.
ಸಂಶೋಧನೆಗಳು ಇನ್ನೂ ಮುಂದುವರಿದಿವೆ
ಈ ತಂತ್ರಜ್ಞಾನ ಆಶಾದಾಯಕವಾಗಿದ್ದರೂ, ಇದನ್ನು ಸಂಪೂರ್ಣ ರೋಗನಿರ್ಣಯ ಪರೀಕ್ಷೆಯಾಗಿ ಬಳಸಬಾರದು. ಬದಲಾಗಿ ಹೆಚ್ಚುವರಿ ಸ್ಕ್ರೀನಿಂಗ್ ಸಾಧನವಾಗಿ ಬಳಸಬೇಕು ಎಂದು ಕ್ಯಾನ್ಸರ್ ತಜ್ಞರು ಸಲಹೆ ನೀಡಿದ್ದಾರೆ.ದೀರ್ಘಾವಧಿಯಲ್ಲಿ ಈ ಪರೀಕ್ಷೆಗಳು ಕ್ಯಾನ್ಸರ್‌ನಿಂದಾಗುವ ಸಾವುಗಳನ್ನು ಎಷ್ಟು ಮಟ್ಟಿಗೆ ಕಡಿಮೆ ಮಾಡುತ್ತವೆ? ವೆಚ್ಚಕ್ಕೆ ತಕ್ಕ ಪ್ರಯೋಜನ ನೀಡುತ್ತವೆಯೇ? ಎಂಬುದರ ಕುರಿತು ಜಾಗತಿಕ ಮಟ್ಟದಲ್ಲಿ ಸಂಶೋಧನೆಗಳು ಮುಂದುವರಿದಿವೆ. ಭಾರತದಲ್ಲಿ Shield MCD ಪರೀಕ್ಷೆಯ ಬೆಲೆಯನ್ನು ಇನ್ನೂ ಅಧಿಕೃತವಾಗಿ ಪ್ರಕಟಿಸಿಲ್ಲ. ಆದರೆ ಶೀಘ್ರದಲ್ಲೇ Apollo Hospitals ಮೂಲಕ ಈ ಪರೀಕ್ಷೆ ಲಭ್ಯವಾಗುವ ಸಾಧ್ಯತೆ ಇದ್ದು, ದೇಶದ ಪ್ರಮುಖ ಡಯಾಗ್ನೋಸ್ಟಿಕ್ ಲ್ಯಾಬ್‌ಗಳೂ ಇದನ್ನು ಪರಿಚಯಿಸಲು ಸಿದ್ಧತೆ ನಡೆಸುತ್ತಿವೆ.
