ಪ್ರಪಂಚದಾದ್ಯಂತ ಬದಲಾಗುತ್ತಿರುವ ಪರಿಸ್ಥಿತಿಗಳು ಮತ್ತು ಇಂಧನ ಬಿಕ್ಕಟ್ಟಿನ ಹಿನ್ನೆಲೆಯಲ್ಲಿ ಗ್ಯಾಸ್ ಸಿಲಿಂಡರ್ ಬೆಲೆ ಮತ್ತು ಲಭ್ಯತೆ ಸಾಮಾನ್ಯ ಜನರಿಗೆ ಚಿಂತೆಯ ವಿಷಯವಾಗಿದೆ. ಮಹಿಳೆಯರು ಅಡುಗೆ ಮನೆಯಲ್ಲಿ ಕೆಲವು ಸಣ್ಣ ಬದಲಾವಣೆಗಳನ್ನು ಮಾಡಿಕೊಳ್ಳುವ ಮೂಲಕ ಆರ್ಥಿಕವಾಗಿ ಹಣ ಉಳಿಸುವುದಲ್ಲದೆ, ಗ್ಯಾಸ್ ಸಿಲಿಂಡರ್ ಅನ್ನು ದೀರ್ಘಕಾಲದವರೆಗೆ ಬಳಸಬಹುದು. ಗ್ಯಾಸ್ ಉಳಿಸಲು ಇಲ್ಲಿವೆ ಕೆಲವು ಸರಳ ಟಿಪ್ಸ್:
1. ಅಡುಗೆಗೆ ಮುನ್ನ ಎಲ್ಲವನ್ನೂ ಸಿದ್ಧಪಡಿಸಿಕೊಳ್ಳಿ: ಅಡುಗೆ ಮಾಡಲು ಸ್ಟವ್ ಹಚ್ಚುವ ಮೊದಲೇ ಏನು ಅಡುಗೆ ಮಾಡಬೇಕೆಂದು ನಿರ್ಧರಿಸಿ, ಅದಕ್ಕೆ ಬೇಕಾದ ತರಕಾರಿಗಳನ್ನು ಹೆಚ್ಚಿಟ್ಟುಕೊಳ್ಳುವುದು ಮತ್ತು ಮಸಾಲೆ ಪದಾರ್ಥಗಳನ್ನು ಸಿದ್ಧಪಡಿಸಿಕೊಳ್ಳುವುದು ಮುಖ್ಯ. ಸ್ಟವ್ ಹಚ್ಚಿದ ನಂತರ ಸಾಮಗ್ರಿಗಳನ್ನು ಹುಡುಕುವುದರಿಂದ ಗ್ಯಾಸ್ ವ್ಯರ್ಥವಾಗುತ್ತದೆ.
2. ಧಾನ್ಯಗಳನ್ನು ನೆನೆಸಿಡಿ: ಬೇಳೆ ಅಥವಾ ಕಾಳುಗಳನ್ನು ಬೇಯಿಸುವ ಮೊದಲು ಕನಿಷ್ಠ ಎರಡು ಗಂಟೆಗಳ ಕಾಲ ನೀರಿನಲ್ಲಿ ನೆನೆಸಿಟ್ಟರೆ ಅವು ಬೇಗನೆ ಬೇಯುತ್ತವೆ. ಅದೇ ರೀತಿ ಅಕ್ಕಿಯನ್ನು ಅಡುಗೆಗೆ 20 ನಿಮಿಷಗಳ ಮೊದಲು ನೆನೆಸಿಟ್ಟರೆ ಅನ್ನ ಅತಿ ಶೀಘ್ರವಾಗಿ ತಯಾರಾಗುತ್ತದೆ. ಇದರಿಂದ ಗ್ಯಾಸ್ ಉಳಿತಾಯವಾಗುತ್ತದೆ.
3. ಪ್ರೆಶರ್ ಕುಕ್ಕರ್ ಬಳಕೆ: ಸಾಮಾನ್ಯ ಪಾತ್ರೆಗಳಿಗಿಂತ ಪ್ರೆಶರ್ ಕುಕ್ಕರ್ನಲ್ಲಿ ಅಡುಗೆ ಮಾಡುವುದು ಹೆಚ್ಚು ಲಾಭದಾಯಕ. ಇದು ಹಬೆಯ ಸಹಾಯದಿಂದ ಆಹಾರವನ್ನು ಎಲ್ಲಾ ಕಡೆಯಿಂದಲೂ ಸಮಾನವಾಗಿ ಮತ್ತು ಬೇಗನೆ ಬೇಯಿಸುತ್ತದೆ. ಇದರಿಂದ ಸಮಯ ಮತ್ತು ಗ್ಯಾಸ್ ಎರಡೂ ಉಳಿಯುತ್ತದೆ.
4. ಫ್ರಿಜ್ನಿಂದ ತೆಗೆದ ಪದಾರ್ಥಗಳನ್ನು ತಕ್ಷಣ ಕಾಯಿಸಬೇಡಿ: ಹಾಲು ಅಥವಾ ತರಕಾರಿಗಳಂತಹ ಪದಾರ್ಥಗಳನ್ನು ಫ್ರಿಜ್ನಿಂದ ತೆಗೆದ ತಕ್ಷಣ ಸ್ಟವ್ ಮೇಲೆ ಇಡಬೇಡಿ. ಅವು ಸಾಮಾನ್ಯ ತಾಪಮಾನಕ್ಕೆ (Room Temperature) ಬಂದ ನಂತರವಷ್ಟೇ ಬಿಸಿ ಮಾಡಿ. ತಣ್ಣಗಿರುವ ಪದಾರ್ಥಗಳನ್ನು ನೇರವಾಗಿ ಬಿಸಿ ಮಾಡುವುದರಿಂದ ಅದನ್ನು ಕಾಯಿಸಲು ಹೆಚ್ಚಿನ ಗ್ಯಾಸ್ ಖರ್ಚಾಗುತ್ತದೆ.
5. ಪಾತ್ರೆಗಳ ಆಯ್ಕೆ ಸರಿಯಾಗಿರಲಿ: ಅಡುಗೆಗೆ ಬಳಸುವ ಪಾತ್ರೆಗಳು ಬರ್ನರ್ನ ಗಾತ್ರಕ್ಕೆ ಅನುಗುಣವಾಗಿರಲಿ. ಬರ್ನರ್ ದೊಡ್ಡದಿದ್ದು ಪಾತ್ರೆ ಸಣ್ಣದಿದ್ದರೆ ಬೆಂಕಿ ಪಾತ್ರೆಯ ಹೊರಭಾಗಕ್ಕೆ ಹರಡಿ ಗ್ಯಾಸ್ ವ್ಯರ್ಥವಾಗುತ್ತದೆ. ಅಡುಗೆ ಮಾಡುವಾಗ ಪಾತ್ರೆಯ ಮೇಲೆ ಮುಚ್ಚಳ ಮುಚ್ಚುವುದನ್ನು ಮರೆಯಬೇಡಿ.
6. ಸ್ಟವ್ ನಿರ್ವಹಣೆ: ಗ್ಯಾಸ್ ಸ್ಟವ್ ಅನ್ನು ಕಾಲಕಾಲಕ್ಕೆ ಸ್ವಚ್ಛಗೊಳಿಸಿ. ಸ್ಟವ್ನ ಉರಿ ಕೆಂಪು ಬಣ್ಣಕ್ಕೆ ತಿರುಗಿದರೆ ಅದು ಗ್ಯಾಸ್ ವ್ಯರ್ಥವಾಗುತ್ತಿದೆ ಮತ್ತು ಬರ್ನರ್ನಲ್ಲಿ ದೋಷವಿದೆ ಎಂಬುದರ ಸಂಕೇತವಾಗಿದೆ. ಅಂತಹ ಸಂದರ್ಭದಲ್ಲಿ ತಕ್ಷಣವೇ ಟೆಕ್ನಿಷಿಯನ್ ಕರೆಸಿ ದುರಸ್ತಿ ಮಾಡಿಸಿ. ನೀಲಿ ಬಣ್ಣದ ಉರಿ ಸದಾ ಇರಲಿ.
ಮಾಂಸಾಹಾರದಂತಹ ಅಡುಗೆಗಳನ್ನು ಮಾಡುವಾಗ ಕಡ್ಡಾಯವಾಗಿ ಕುಕ್ಕರ್ ಬಳಸಿ ಹಾಗೂ ಎಣ್ಣೆಯಲ್ಲಿ ಹೆಚ್ಚು ಹುರಿಯುವ (Deep fry) ಪದಾರ್ಥಗಳನ್ನು ಕಡಿಮೆ ಮಾಡುವುದರಿಂದ ಆರೋಗ್ಯದ ಜೊತೆಗೆ ಗ್ಯಾಸ್ ಕೂಡ ಉಳಿಸಬಹುದು.
