ಬೆಂಗಳೂರು: ದೇಶದ ಹಿರಿಯ ರಾಜಕಾರಣಿ ಹಾಗೂ ಮಾಜಿ ಪ್ರಧಾನಿ ಎಚ್.ಡಿ. ದೇವೇಗೌಡರಿಗೆ ರಾಜ್ಯ ಸರ್ಕಾರವು ಭರ್ಜರಿ ಕೊಡುಗೆಯೊಂದನ್ನು ನೀಡಿದೆ. 92ರ ಇಳಿವಯಸ್ಸಿನಲ್ಲೂ ಸಕ್ರಿಯ ರಾಜಕಾರಣದಲ್ಲಿರುವ ಗೌಡರ ಪ್ರಯಾಣದ ಸೌಕರ್ಯಕ್ಕಾಗಿ 1.25 ಕೋಟಿ ರೂ. ಬೆಲೆಯ ಐಷಾರಾಮಿ ಕಾರು ಖರೀದಿಸಲು ಸರ್ಕಾರ ಅಧಿಕೃತ ಒಪ್ಪಿಗೆ ಸೂಚಿಸಿದೆ.
ಯಾವ ಕಾರು?:
ಗರಿಷ್ಠ ಸುರಕ್ಷತೆಗೆ ಹೆಸರಾಗಿರುವ Volvo XC90 (ವೋಲ್ವೋ ಎಕ್ಸ್‌ಸಿ 90) ಮಾಡೆಲ್‌ನ ಕಾರನ್ನು ದೇವೇಗೌಡರಿಗಾಗಿ ಖರೀದಿಸಲಾಗುತ್ತಿದೆ. ಇದರ ಒಟ್ಟು ವೆಚ್ಚ ಅಂದಾಜು 1,25,65,388 ರೂ. ಆಗಿರಲಿದೆ.
ವಿಶೇಷ ವಿನಾಯಿತಿ: ಪಾರದರ್ಶಕತೆ ಕಾಯ್ದೆಯಿಂದ (KTPP Act) ವಿನಾಯಿತಿ ನೀಡಿ, ಬೆಂಗಳೂರಿನ ಮಾರ್ಷಲ್ ಮೋಟಾರ್ಸ್‌ನಿಂದ ನೇರವಾಗಿ ಕಾರು ಖರೀದಿಸಲು ಸಿಬ್ಬಂದಿ ಮತ್ತು ಆಡಳಿತ ಸುಧಾರಣೆ ಇಲಾಖೆಗೆ ಸರ್ಕಾರ ಅನುಮತಿ ನೀಡಿದೆ.
ದೇವೇಗೌಡರಿಗಾಗಿ ಮಾಡಿಫಿಕೇಶನ್: ವಯೋಸಹಜ ಕಾರಣಗಳಿಂದ ಗೌಡರಿಗೆ ಕಾರು ಹತ್ತಲು ಮತ್ತು ಇಳಿಯಲು ಅನುಕೂಲವಾಗುವಂತೆ ಕಾರಿನಲ್ಲಿ ಕೆಲವು ತಾಂತ್ರಿಕ ಬದಲಾವಣೆಗಳನ್ನು (Modification) ಮಾಡಲಾಗುತ್ತಿದೆ.
ವೋಲ್ವೋ XC90 ಕಾರಿನ ವಿಶೇಷತೆಗಳೇನು?
ಈ ಕಾರು ಕೇವಲ ಐಷಾರಾಮಿ ಮಾತ್ರವಲ್ಲದೆ, ತಾಂತ್ರಿಕವಾಗಿಯೂ ಅತ್ಯಂತ ಬಲಿಷ್ಠವಾಗಿದೆ:
ಎಂಜಿನ್: 2.0 ಲೀಟರ್ ಟರ್ಬೋ ಎಂಜಿನ್ ಮತ್ತು ಮೈಲ್ಡ್ ಹೈಬ್ರಿಡ್ ಪವರ್‌ಟ್ರೇನ್.
ಸುರಕ್ಷತೆ: 7 ಏರ್‌ಬ್ಯಾಗ್‌ಗಳು, 360 ಡಿಗ್ರಿ ಕ್ಯಾಮೆರಾ, ಮತ್ತು ಲೆವೆಲ್-2 ಅಡಾಸ್ (ADAS) ಫೀಚರ್.
ಕಂಟ್ರೋಲ್: ಹಿಲ್ ಸ್ಟಾರ್ಟ್ ಮತ್ತು ಹಿಲ್ ಡಿಸೆಂಟ್ ಕಂಟ್ರೋಲ್ ಸೇರಿದಂತೆ ಗರಿಷ್ಠ ರಕ್ಷಣಾ ವ್ಯವಸ್ಥೆ.
ಸೌಕರ್ಯ: 12.3 ಇಂಚಿನ ಇನ್ಸ್ಟ್ರುಮೆಂಟ್ ಕ್ಲಸ್ಟರ್, ಪನರೋಮಿಕ್ ಸನ್‌ರೂಫ್ ಮತ್ತು ಅತ್ಯಾಧುನಿಕ ಕ್ಲೈಮೇಟ್ ಕಂಟ್ರೋಲ್ ವ್ಯವಸ್ಥೆ.
