ನವದೆಹಲಿ: ಇಂದಿನ ವೇಗದ ಬದುಕಿನಲ್ಲಿ ಒತ್ತಡ ಎಂಬುದು ಎಲ್ಲರನ್ನೂ ಕಾಡುತ್ತಿದೆ. ಆದರೆ, ಯಾವುದೇ ಪ್ರಾಣಾಪಾಯವಿಲ್ಲದಿದ್ದರೂ ಇದ್ದಕ್ಕಿದ್ದಂತೆ ವಿಪರೀತ ಭಯ, ಬೆವರುವಿಕೆ ಮತ್ತು ಉಸಿರಾಟದ ತೊಂದರೆ ಕಾಣಿಸಿಕೊಂಡರೆ ಅದು ಪ್ಯಾನಿಕ್ ಅಟ್ಯಾಕ್ (Panic Attack) ಆಗಿರಬಹುದು. ಸಣ್ಣ ವಯಸ್ಸಿನವರಲ್ಲೂ ಕಂಡುಬರುತ್ತಿರುವ ಈ ಸಮಸ್ಯೆಯನ್ನು ನಿಭಾಯಿಸಲು AIIMS ನರರೋಗ ತಜ್ಞರಾದ ಡಾ. ರಾಹುಲ್ ಚಾವ್ಲಾ ಅವರು 3 ಅದ್ಭುತ ಸೂತ್ರಗಳನ್ನು ಹಂಚಿಕೊಂಡಿದ್ದಾರೆ.
ಏನಿದು ಪ್ಯಾನಿಕ್ ಅಟ್ಯಾಕ್?
ಯಾವುದೇ ಬೆದರಿಕೆ ಇಲ್ಲದ ಸಾಮಾನ್ಯ ಸಂದರ್ಭದಲ್ಲೂ ದೇಹವು ತೀವ್ರ ಒತ್ತಡಕ್ಕೆ ಒಳಗಾಗಿ ಭಯದ ಪ್ರತಿಕ್ರಿಯೆ ನೀಡುವುದೇ ಪ್ಯಾನಿಕ್ ಅಟ್ಯಾಕ್. ಇದು ಸಾಮಾನ್ಯವಾಗಿ 5 ರಿಂದ 20 ನಿಮಿಷ ಇರುತ್ತದೆ.
ಪ್ರಮುಖ ಲಕ್ಷಣಗಳನ್ನು ಗುರುತಿಸಿ:
ಎದೆ ನೋವು ಅಥವಾ ಎದೆಬಡಿತ ಅತಿಯಾಗುವುದು (Racing heart).
ಉಸಿರಾಟದಲ್ಲಿ ತೊಂದರೆ ಅಥವಾ ಉಸಿರು ಕಟ್ಟಿದ ಅನುಭವ.
ಕೈಕಾಲು ನಡುಗುವುದು, ಚಳಿ ಎನಿಸುವುದು ಅಥವಾ ಮೈ ಬೆವರುವಿಕೆ.
ಹೊಟ್ಟೆಯಲ್ಲಿ ಅಸ್ವಸ್ಥತೆ ಅಥವಾ ವಾಕರಿಕೆ ಬಂದಂತಾಗುವುದು.
ಕೈಕಾಲು ಬೆರಳುಗಳಲ್ಲಿ ಜುಮ್ಮೆನಿಸುವುದು ಅಥವಾ ಮರಗಟ್ಟುವಿಕೆ.
ನಾನು ಸಾಯುತ್ತಿದ್ದೇನೆ” ಅಥವಾ ಏನೋ ಕೆಟ್ಟದ್ದಾಗುತ್ತಿದೆ ಎಂಬ ವಿಪರೀತ ಆತಂಕ.
https://www.instagram.com/reel/DXG-la2kkxQ/?utm_source=ig_web_copy_link&igsh=NTc4MTIwNjQ2YQ==
ಪ್ಯಾನಿಕ್ ಅಟ್ಯಾಕ್ ಶಾಂತಗೊಳಿಸಲು ಡಾ. ಚಾವ್ಲಾ ನೀಡಿದ 3 ಟಿಪ್ಸ್:
ಇದು ಬರಿ ಆತಂಕ ಅಷ್ಟೇ ಎಂದುಕೊಳ್ಳಿ (Self-Awareness): ಮೊದಲು ನಿಮಗೆ ನೀವೇ ಧೈರ್ಯ ಹೇಳಿಕೊಳ್ಳಿ. “ಇದು ಕೇವಲ ಪ್ಯಾನಿಕ್ ಅಟ್ಯಾಕ್, ಇದರಿಂದ ನನಗೆ ಪ್ರಾಣಕ್ಕೆ ಅಪಾಯವಿಲ್ಲ, ಸ್ವಲ್ಪ ಹೊತ್ತಿನಲ್ಲಿ ಎಲ್ಲವೂ ಸರಿಹೋಗುತ್ತದೆ” ಎಂದು ಮನವರಿಕೆ ಮಾಡಿ.
ನಿಧಾನವಾಗಿ ಆಳವಾದ ಉಸಿರಾಟ (Slow Breathing): ವಿಪರೀತ ಗಾಬರಿಯಾದಾಗ ಉಸಿರಾಟದ ವೇಗ ಹೆಚ್ಚುತ್ತದೆ. ಇದನ್ನು ತಡೆಯಲು ನಿಧಾನವಾಗಿ ಉಸಿರು ಒಳಕ್ಕೆ ಎಳೆದು ಹೊರಬಿಡಿ. ಇದು ನಿಮ್ಮ ಮೆದುಳನ್ನು ಶಾಂತಗೊಳಿಸುತ್ತದೆ.
ಸುತ್ತಮುತ್ತಲಿನ ಕಡೆ ಗಮನ ನೀಡಿ (Grounding): ಒಂದೆಡೆ ಆರಾಮವಾಗಿ ಕುಳಿತು ನಿಮ್ಮ ಸ್ನಾಯುಗಳನ್ನು ಸಡಿಲಗೊಳಿಸಿ. ನಿಮ್ಮ ಸುತ್ತಲಿರುವ ವಸ್ತುಗಳನ್ನು ಗಮನಿಸಿ, ಶಬ್ದಗಳನ್ನು ಆಲಿಸಿ. ವರ್ತಮಾನದ ಸ್ಥಿತಿಗೆ ಮರಳುವುದು ಭಯದಿಂದ ಹೊರಬರಲು ಇರುವ ಅತ್ಯುತ್ತಮ ದಾರಿ.
ಗಮನಿಸಿ: ಪ್ಯಾನಿಕ್ ಅಟ್ಯಾಕ್ ತನ್ನಷ್ಟಕ್ಕೆ ತಾನೇ ನಿಂತುಹೋಗುತ್ತದೆ. ಆದರೆ ಸಮಸ್ಯೆ ಪದೇ ಪದೇ ಕಾಡುತ್ತಿದ್ದರೆ ಅಥವಾ ತೀವ್ರವಾಗಿದ್ದರೆ ತಕ್ಷಣವೇ ವೈದ್ಯರನ್ನು ಸಂಪರ್ಕಿಸುವುದು ಉತ್ತಮ.
