ಐಪಿಎಲ್ 2026ರ ಆರಂಭದಿಂದಲೂ ಕಾಲಿನ ಸ್ನಾಯು ಸೆಳೆತದ (Calf injury) ಸಮಸ್ಯೆಯಿಂದಾಗಿ ಚೆನ್ನೈ ಸೂಪರ್ ಕಿಂಗ್ಸ್ ತಂಡದಿಂದ ಹೊರಗುಳಿದಿದ್ದ ಎಂಎಸ್ ಧೋನಿ, ಈಗ ಚೇತರಿಸಿಕೊಳ್ಳುತ್ತಿದ್ದಾರೆ. ಸತತ ಎರಡು ವಾರಗಳ ವಿಶ್ರಾಂತಿ ಮತ್ತು ಪುನಶ್ಚೇತನ ಶಿಬಿರದ ನಂತರ ಧೋನಿ ಈಗ ಪೂರ್ಣ ಫಿಟ್ನೆಸ್ಗೆ ಮರಳುವ ಹಂತದಲ್ಲಿದ್ದಾರೆ.
ಇಂದಿನ ನಿರ್ಧಾರವೇ ನಿರ್ಣಾಯಕ
ತಾಜಾ ಮಾಹಿತಿಯ ಪ್ರಕಾರ, ಎಪ್ರಿಲ್ 18 ರಂದು ಶನಿವಾರ ಹೈದರಾಬಾದ್ನಲ್ಲಿ ನಡೆಯಲಿರುವ ಸನ್ರೈಸರ್ಸ್ ಹೈದರಾಬಾದ್ (SRH) ವಿರುದ್ಧದ ಪಂದ್ಯದಲ್ಲಿ ಧೋನಿ ಆಡುತ್ತಾರೆಯೇ ಅಥವಾ ಇಲ್ಲವೇ ಎಂಬುದು ಇಂದು (ಎಪ್ರಿಲ್ 16, ಗುರುವಾರ) ಬೆಳಗ್ಗೆ ನಿರ್ಧಾರವಾಗಲಿದೆ. ಧೋನಿ ಅವರು ತಂಡದ ಜೊತೆ ಹೈದರಾಬಾದ್ಗೆ ಪ್ರಯಾಣ ಬೆಳೆಸಿದರೆ, ಅವರು ಕಣಕ್ಕಿಳಿಯುವುದು ಬಹುತೇಕ ಖಚಿತವಾಗಲಿದೆ. ಒಂದು ವೇಳೆ ಅವರು ಚೆನ್ನೈಯಲ್ಲೇ ಉಳಿದುಕೊಂಡರೆ, ಅಭಿಮಾನಿಗಳು ಅವರ ಆಟ ನೋಡಲು ಇನ್ನೂ ಕೆಲವು ದಿನ ಕಾಯಬೇಕಾಗುತ್ತದೆ.
ಇಂಪ್ಯಾಕ್ಟ್ ಪ್ಲೇಯರ್ ಆಗಿ ಬರ್ತಾರಾ ಧೋನಿ?
ಧೋನಿ ಅವರನ್ನು ‘ಇಂಪ್ಯಾಕ್ಟ್ ಪ್ಲೇಯರ್’ ಆಗಿ ಬಳಸಿಕೊಳ್ಳುವ ಬಗ್ಗೆ ಕ್ರಿಕೆಟ್ ವಲಯದಲ್ಲಿ ಭಿನ್ನಾಭಿಪ್ರಾಯಗಳು ಕೇಳಿಬರುತ್ತಿವೆ.
- ಆಕಾಶ್ ಚೋಪ್ರಾ ಅಭಿಪ್ರಾಯ: ಮಾಜಿ ಕ್ರಿಕೆಟಿಗ ಆಕಾಶ್ ಚೋಪ್ರಾ ಅವರು, “ಧೋನಿ ಇಂಪ್ಯಾಕ್ಟ್ ಪ್ಲೇಯರ್ ಆಗಿ ಆಡಬಾರದು. ಅವರು ಮೈದಾನದಲ್ಲಿದ್ದರೆ ಮಾತ್ರ ತಂಡಕ್ಕೆ ಅವರ ಚಾಣಾಕ್ಷತನದ ಲಾಭ ಸಿಗುತ್ತದೆ. ಕೇವಲ ಬ್ಯಾಟಿಂಗ್ಗಾಗಿ ಬರುವುದಾದರೆ ಅವರು ನಿವೃತ್ತಿ ಘೋಷಿಸುವುದು ಉತ್ತಮ” ಎಂದು ಖಾರವಾಗಿ ಪ್ರತಿಕ್ರಿಯಿಸಿದ್ದಾರೆ.
- ಮಿಚೆಲ್ ಮೆಕ್ಲೆನಾಘನ್ ಬೆಂಬಲ: ಇನ್ನೊಂದೆಡೆ ನ್ಯೂಜಿಲೆಂಡ್ನ ಮಾಜಿ ವೇಗಿ ಮಿಚೆಲ್ ಮೆಕ್ಲೆನಾಘನ್ ಅವರು ಧೋನಿ ಅವರನ್ನು ಇಂಪ್ಯಾಕ್ಟ್ ಪ್ಲೇಯರ್ ಆಗಿ ಬಳಸಿಕೊಳ್ಳುವುದನ್ನು ಬೆಂಬಲಿಸಿದ್ದಾರೆ. ರನ್ ಬೆನ್ನಟ್ಟುವ ವೇಳೆ ಧೋನಿ ಬಂದು ಕೇವಲ ಸಿಕ್ಸರ್-ಬೌಂಡರಿಗಳ ಮೂಲಕ ಪಂದ್ಯ ಮುಗಿಸಿಕೊಡಬಹುದು ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.
ಸದ್ಯ ಕೆಕೆಆರ್ ಮತ್ತು ಡೆಲ್ಲಿ ವಿರುದ್ಧ ಗೆದ್ದು ಬೀಗುತ್ತಿರುವ ಸಿಎಸ್ಕೆ ತಂಡಕ್ಕೆ ಧೋನಿ ಮರಳಿದರೆ ತಂಡದ ಬಲ ಮತ್ತಷ್ಟು ಹೆಚ್ಚಲಿದೆ. ಆದರೆ ವಿನ್ನಿಂಗ್ ಕಾಂಬಿನೇಶನ್ ಬದಲಿಸುವುದು ನಾಯಕ ಋತುರಾಜ್ ಗಾಯಕವಾಡ್ಗೆ ಸವಾಲಾಗಲಿದೆ.
