ಮಂಗಳೂರು: ರಾಜ್ಯದಲ್ಲಿ ಸದ್ಯಕ್ಕೆ ಯಾವುದೇ ವಾಯುಭಾರ ಕುಸಿತವಾಗಲಿ ಅಥವಾ ಚಂಡಮಾರುತದ ಭೀತಿಯಾಗಲಿ ಇಲ್ಲ ಎಂದು ಹವಾಮಾನ ಇಲಾಖೆ ಸ್ಪಷ್ಟಪಡಿಸಿದೆ. ಆದರೆ, ವಾತಾವರಣದಲ್ಲಿ ತೇವಾಂಶ (Humidity) ಏರಿಕೆಯಾದಲ್ಲಿ ಮಾತ್ರ ಮಳೆಯಾಗುವ ಸಾಧ್ಯತೆಯಿದೆ ಎಂದು ವರದಿ ತಿಳಿಸಿದೆ.
ರಾಜ್ಯದ ಜನತೆಯನ್ನು ಕಾಡುತ್ತಿರುವ ಅತಿಯಾದ ಸೆಕೆ ಮತ್ತು ಮಳೆಯ ಅನಿಶ್ಚಿತತೆಯ ನಡುವೆ ಹವಾಮಾನ ಇಲಾಖೆಯು ಮಹತ್ವದ ಸ್ಪಷ್ಟನೆ ನೀಡಿದೆ. ಕರ್ನಾಟಕದಲ್ಲಿ ಸದ್ಯಕ್ಕೆ ಯಾವುದೇ ವಾಯುಭಾರ ಕುಸಿತ ಅಥವಾ ಚಂಡಮಾರುತದ ಲಕ್ಷಣಗಳಿಲ್ಲ ಎಂದು ತಿಳಿಸಿರುವ ಇಲಾಖೆಯು, ಕೇವಲ ವಾತಾವರಣದಲ್ಲಿನ ತೇವಾಂಶ (Humidity) ಏರಿಕೆಯಾದಾಗ ಮಾತ್ರ ಮಳೆಯಾಗುವ ಸಾಧ್ಯತೆಯಿದೆ ಎಂದು ಹೇಳಿದೆ. ಕರಾವಳಿ ಮತ್ತು ಮಲೆನಾಡಿನ ಕೆಲವೆಡೆ ಸಾಧಾರಣ ಬೇಸಿಗೆ ಮಳೆ ಮುಂದುವರಿಯಲಿದ್ದು, ಗಾಳಿಯಲ್ಲಿನ ತೇವಾಂಶದ ಮಟ್ಟ ಶೇ. 70 RH ದಾಟಿದರಷ್ಟೇ ರಾಜ್ಯದ ಇತರೆಡೆಗಳಲ್ಲಿ ಮಳೆ ಚುರುಕುಗೊಳ್ಳಲಿದೆ ಎಂದು ಹವಾಮಾನ ತಜ್ಞರು ವಿಶ್ಲೇಷಿಸಿದ್ದಾರೆ. ಕರಾವಳಿ ಮತ್ತು ಮಲೆನಾಡು ಭಾಗ ಸೇರಿದಂತೆ ರಾಜ್ಯದ ಬಹುತೇಕ ಜಿಲ್ಲೆಗಳಲ್ಲಿ ಮುಂದಿನ ನಾಲ್ಕೈದು ದಿನಗಳ ಕಾಲ ಸಾಧಾರಣ ಬೇಸಿಗೆ ಮಳೆ ಸುರಿಯುವ ಸಾಧ್ಯತೆಯಿದೆ.
ತೇವಾಂಶದ ಲೆಕ್ಕಾಚಾರ : ಭಾರತೀಯ ಹವಾಮಾನ ಇಲಾಖೆ (IMD) ಪ್ರಕಾರ, ವಾತಾವರಣದಲ್ಲಿ ತೇವಾಂಶವು ಶೇ. 70 RH ಗಿಂತ ಹೆಚ್ಚಾದರೆ ಮಾತ್ರ ಮಳೆಯ ಲಕ್ಷಣಗಳು ದಟ್ಟವಾಗುತ್ತವೆ. ಸದ್ಯಕ್ಕೆ ತೇವಾಂಶವು ಶೇ. 40 RH ಆಸುಪಾಸಿನಲ್ಲಿದೆ. ಬೆಂಗಳೂರಿನಂತಹ ಭಾಗಗಳಲ್ಲಿ ಇದು ಶೇ. 50 ದಾಟಿದ ತಕ್ಷಣ ಮಳೆಯಾಗುವ ಸಾಧ್ಯತೆ ಇರುತ್ತದೆ.
ಬಿಸಿಲು ಮತ್ತು ಮಂಜು: ಕರಾವಳಿ ಭಾಗದಲ್ಲಿ ಸದ್ಯ ಮಂಜಿನ ವಾತಾವರಣ ಕಂಡುಬರುತ್ತಿದ್ದು, ಇದು ಚಳಿಗಾಲದ ಮಂಜಲ್ಲ. ಸೂರ್ಯನ ಕಿರಣಗಳು ಬಿದ್ದಾಗ ಈ ಮಂಜು ಆವಿಯಾಗಿ ವಾತಾವರಣದಲ್ಲಿ ಉಷ್ಣತೆ ಮತ್ತು ತೇವಾಂಶವನ್ನು ಹೆಚ್ಚಿಸುತ್ತಿದೆ.
ನಗರ ಮತ್ತು ಗ್ರಾಮಾಂತರ ವ್ಯತ್ಯಾಸ: ನಗರ ಪ್ರದೇಶಗಳಲ್ಲಿ ಮೋಡ ಕವಿದ ವಾತಾವರಣದ ಜೊತೆಗೆ ಬಿಸಿಲಿನ ಪ್ರಖರತೆ ಹೆಚ್ಚಾಗಿದೆ. ಆದರೆ ಗ್ರಾಮಾಂತರ ಭಾಗಗಳಾದ ಸುಳ್ಯ, ಸುಬ್ರಹ್ಮಣ್ಯ ಮತ್ತು ಕಡಬ ಪರಿಸರದಲ್ಲಿ ಸಂಜೆ ವೇಳೆ ಗುಡುಗು ಸಹಿತ ಸಾಧಾರಣ ಮಳೆಯಾಗುತ್ತಿದೆ. ಒಟ್ಟಾರೆಯಾಗಿ, ರಾಜ್ಯದಲ್ಲಿ ಈಗ ಮಳೆ ಮತ್ತು ಬಿಸಿಲಿನ ಜುಗಲ್ಬಂದಿ ಮುಂದುವರಿಯಲಿದ್ದು, ತೇವಾಂಶ ಹೆಚ್ಚಾದಷ್ಟೂ ಮಳೆಯ ಪ್ರಮಾಣ ಏರಿಕೆಯಾಗಲಿದೆ ಎಂದು ಹವಾಮಾನ ತಜ್ಞರು ಮುನ್ಸೂಚನೆ ನೀಡಿದ್ದಾರೆ.
