ಬೆಂಗಳೂರು: ಧಗಧಗಿಸುವ ಸೂರ್ಯ ಏರುತ್ತಿರುವ ತಾಪಮಾನ ಮತ್ತು ಮೈ ಸುಡುವ ಬೇಸಿಗೆ ಈ ಸಮಯದಲ್ಲಿ ದೇಹದಲ್ಲಿನ ನೀರಿನಂಶ ಕಡಿಮೆಯಾಗಿ ಸುಸ್ತು ಆವರಿಸುವುದು ಸಹಜ. ಮಾರುಕಟ್ಟೆಯ ಕೃತಕ ಪಾನೀಯಗಳ ಮೊರೆ ಹೋಗುವ ಬದಲು, ನೈಸರ್ಗಿಕವಾಗಿ ದೇಹವನ್ನು ತಂಪು ಮಾಡುವ ಪಾನ್-ಗುಲ್ಕಂದ್ ಶರಬತ್ ಈ ಬೇಸಿಗೆಯಲ್ಲಿ ನಿಮ್ಮ ಬೆಸ್ಟ್ ಫ್ರೆಂಡ್ ಆಗಲಿದೆ
ಪಾನ್-ಗುಲ್ಕಂದ್ ಶರಬತ್ ಯಾಕೆ ಸ್ಪೆಷಲ್?
ಈ ಪಾನೀಯವು ಕೇವಲ ದಾಹ ತೀರಿಸುವ ಸಾಧನವಲ್ಲ; ಇದು ರುಚಿ ಮತ್ತು ಆರೋಗ್ಯದ ಅದ್ಭುತ ಸಂಯೋಜನೆ.
ರುಚಿಯ ಸಮತೋಲನ: ವೀಳ್ಯದೆಲೆಯ ಹಗುರವಾದ ಕಹಿಯ ಅಂಶ ಮತ್ತು ಗುಲ್ಕಂದ್‌ನ ಸಿಹಿ ಸೇರಿ ಒಂದು ವಿಶಿಷ್ಟವಾದ ರುಚಿಯನ್ನು ನೀಡುತ್ತದೆ.
ಮನಸ್ಸಿಗೆ ಉಲ್ಲಾಸ: ಇದಕ್ಕೆ ಸೇರಿಸುವ ಏಲಕ್ಕಿ ಮತ್ತು ಸೋಂಪು ಪಾನೀಯಕ್ಕೆ ಅದ್ಭುತವಾದ ಪರಿಮಳವನ್ನು ನೀಡುತ್ತದೆ. ಒಂದು ಗ್ಲಾಸ್ ಕುಡಿದರೆ ಸಾಕು, ಮನಸ್ಸು ತಕ್ಷಣವೇ ರಿಫ್ರೆಶ್ ಆಗುತ್ತದೆ
ಆರೋಗ್ಯಕ್ಕೆ ಇದರ ಲಾಭಗಳೇನು?
ನಮ್ಮ ಹಿರಿಯರು ಬಳಸುತ್ತಿದ್ದ ಪದಾರ್ಥಗಳಲ್ಲಿ ಆರೋಗ್ಯದ ಗುಟ್ಟು ಅಡಗಿದೆ:
ದೇಹಕ್ಕೆ ತಂಪು: ವೀಳ್ಯದೆಲೆಗಳು ನೈಸರ್ಗಿಕವಾಗಿ ದೇಹಕ್ಕೆ ತಂಪು ನೀಡುವ ಗುಣವನ್ನು ಹೊಂದಿವೆ. ಬಿಸಿಲ ಬೇಗೆಯಿಂದ ದೇಹವನ್ನು ಕಾಪಾಡುತ್ತದೆ.
ಜೀರ್ಣಕ್ರಿಯೆಗೆ ರಾಮಬಾಣ: ಗುಲ್ಕಂದ್ (ಗುಲಾಬಿ ದಳಗಳಿಂದ ತಯಾರಿಸಿದ್ದು) ಹೊಟ್ಟೆಯನ್ನು ತಂಪಾಗಿಡುವುದಲ್ಲದೆ, ಜೀರ್ಣಶಕ್ತಿಯನ್ನು ಸುಧಾರಿಸುತ್ತದೆ.
ನೈಸರ್ಗಿಕ ಪದಾರ್ಥಗಳು: ಇದರಲ್ಲಿ ಬಳಸುವ ಸೋಂಪು ಮತ್ತು ಏಲಕ್ಕಿ ಹೊಟ್ಟೆಯ ಉರಿಯನ್ನು ಕಡಿಮೆ ಮಾಡುವಲ್ಲಿ ಸಹಕಾರಿ.
ತಯಾರಿಸಲು ಬೇಕಾಗುವ ಪದಾರ್ಥಗಳು:
ವೀಳ್ಯದೆಲೆ: 15-20 (ತಾಜಾ ಎಲೆಗಳು)
ಸೋಂಪು: ಅರ್ಧ ಕಪ್ (ಸಣ್ಣ ಸೋಂಪು)
ಸಕ್ಕರೆ ಕಲ್ಲು (ಧಾಗೆವಾಲಿ ಮಿಸ್ರಿ): 250 ಗ್ರಾಂ
ಗುಲ್ಕಂದ್: 3-4 ಚಮಚ
ಏಲಕ್ಕಿ: 8-10
ಕಪ್ಪು ಉಪ್ಪು: 1 ಟೀಸ್ಪೂನ್
ಸಬ್ಜಾ ಬೀಜಗಳು (ನೆನೆಸಿದ್ದು) ಮತ್ತು ಐಸ್ ಕ್ಯೂಬ್ಸ್
ಹಂತ ಹಂತವಾದ ತಯಾರಿಕಾ ವಿಧಾನ:
ಸೋಂಪು ನೆನೆಸಿಡಿ: ಮೊದಲು ಸೋಂಪನ್ನು 6-7 ಗಂಟೆಗಳ ಕಾಲ ನೀರಿನಲ್ಲಿ ನೆನೆಸಿಡಿ. ನೆನೆಸಿದ ಸೋಂಪನ್ನು ಸ್ವಲ್ಪ ನೀರು ಸೇರಿಸಿ ನುಣ್ಣಗೆ ರುಬ್ಬಿಕೊಳ್ಳಿ.
ಎಲೆಗಳ ಪೇಸ್ಟ್: ತೊಳೆದ ವೀಳ್ಯದೆಲೆಗಳನ್ನು ಸೋಂಪು ನೆನೆಸಿದ ನೀರಿನೊಂದಿಗೆ ಸೇರಿಸಿ ನುಣ್ಣಗೆ ರುಬ್ಬಿಕೊಳ್ಳಿ. ಇದನ್ನು ಸೋಂಪು ಪೇಸ್ಟ್‌ನೊಂದಿಗೆ ಮಿಕ್ಸ್ ಮಾಡಿ.
ಸಿಹಿಯ ಪುಡಿ: ಸಕ್ಕರೆ ಕಲ್ಲನ್ನು (ಮಿಸ್ರಿ) ಏಲಕ್ಕಿಯೊಂದಿಗೆ ಪುಡಿ ಮಾಡಿ. ಈ ಪುಡಿ ಹಾಗೂ ಕಪ್ಪು ಉಪ್ಪನ್ನು ತಯಾರಿಸಿದ ಎಲೆಗಳ ಪೇಸ್ಟ್‌ಗೆ ಸೇರಿಸಿ ಚೆನ್ನಾಗಿ ಕಲಸಿ.
ಮೇಲೆ ಸ್ವಲ್ಪ ಸೋಂಪು ಅಥವಾ ಗುಲ್ಕಂದ್ ಹಾಕಿ ಅಲಂಕರಿಸಿದರೆ ತಂಪಾದ ಪಾನ್ ಶರಬತ್ ಕುಡಿಯಲು ಸಿದ್ಧ
ಈ ಪಾನೀಯವು ಕೇವಲ ಬಾಯಿಗೆ ರುಚಿ ನೀಡುವುದಲ್ಲದೆ, ಜೀರ್ಣಕ್ರಿಯೆಗೂ ಸಹಕಾರಿ. ಹಬ್ಬದ ಸಂದರ್ಭಗಳಲ್ಲಿ ಅಥವಾ ಅತಿಥಿಗಳು ಬಂದಾಗ ಇದನ್ನು ಸರ್ವ್ ಮಾಡುವುದು ತುಂಬಾ ವಿಶೇಷವಾಗಿರುತ್ತದೆ. ನೀವೂ ಒಮ್ಮೆ ಟ್ರೈ ಮಾಡಿ ನೋಡಿ
