ಬೆಂಗಳೂರನ್ನು ದೇಶದ ಐಟಿ ರಾಜಧಾನಿ ಎಂದು ಕರೆಯಲಾಗುತ್ತದೆ. ಇಲ್ಲಿ ಜನರು ಉದ್ಯೋಗದ ಜೊತೆಗೆ ಜೀವನವನ್ನು ಸುಗಮಗೊಳಿಸಿಕೊಳ್ಳಲು ನಿತ್ಯವೂ ಹೋರಾಡಬೇಕಾದ ಪರಿಸ್ಥಿತಿ ಇದೆ. ಬೆಂಗಳೂರಿನಲ್ಲಿ ಬಾಡಿಗೆ ಮನೆ ಹುಡುಕುವುದು ಮತ್ತು ಅದರ ಬಾಡಿಗೆ ಪಾವತಿಸುವುದು ಎಷ್ಟು ಕಷ್ಟದ ಕೆಲಸ ಎಂದರೆ, ಜನರು ತಮ್ಮ ಕಹಿ ಅನುಭವಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಳ್ಳುತ್ತಲೇ ಇರುತ್ತಾರೆ. ಇತ್ತೀಚಿನ ದಿನಗಳಲ್ಲಿ ಬೆಂಗಳೂರಿನಲ್ಲಿ ಬಾಡಿಗೆ ದರಗಳು ಎಷ್ಟರಮಟ್ಟಿಗೆ ಏರಿವೆ ಎಂದರೆ, ಸಣ್ಣಪುಟ್ಟ ಸೌಲಭ್ಯಗಳಿಗೂ ಮಾಲೀಕರು ಅತಿ ಹೆಚ್ಚಿನ ಹಣವನ್ನು ವಸೂಲಿ ಮಾಡುತ್ತಿದ್ದಾರೆ. ಇತ್ತೀಚೆಗೆ ಮಹಿಳೆಯೊಬ್ಬರು ಇಂತಹದ್ದೇ ಒಂದು ವಿಚಿತ್ರ ಅನುಭವವನ್ನು ಹಂಚಿಕೊಂಡಿದ್ದು, ಅದು ಈಗ ದೊಡ್ಡ ಚರ್ಚೆಗೆ ಕಾರಣವಾಗಿದೆ.
ಫ್ಲ್ಯಾಟ್ ಬಾಡಿಗೆ ತಿಂಗಳಿಗೆ 80 ಸಾವಿರ ರೂಪಾಯಿ!
ಅನು ಎಂಬ ಮಹಿಳೆ ಎಕ್ಸ್ (ಟ್ವಿಟರ್) ವೇದಿಕೆಯಲ್ಲಿ ತನಗಾದ ಅನುಭವವನ್ನು ಹಂಚಿಕೊಂಡಿದ್ದಾರೆ. ತಾವು ತಮಗಾಗಿ ಒಂದು ಫ್ಲ್ಯಾಟ್ ಹುಡುಕುತ್ತಿದ್ದಾಗ, ಫ್ಲ್ಯಾಟ್ ಒಂದಕ್ಕೆ ಮಾಲೀಕರು ತಿಂಗಳಿಗೆ 80,000 ರೂಪಾಯಿ ಬಾಡಿಗೆ ಕೇಳಿದರು ಎಂದು ತಿಳಿಸಿದ್ದಾರೆ. ಈ ಪರಿ ಬಾಡಿಗೆಗೆ ಕಾರಣವೇನೆಂದು ಅವರು ವಿಚಾರಿಸಿದಾಗ, ಮಾಲೀಕರು ನೀಡಿದ ಉತ್ತರ ಕೇಳಿ ಅನು ದಂಗಾಗಿದ್ದಾರೆ. ಆ ಫ್ಲ್ಯಾಟ್ನ “ಕೋಣೆಗೆ ಸೂರ್ಯನ ಬೆಳಕು ಚೆನ್ನಾಗಿ ಬರುತ್ತದೆ, ಅದಕ್ಕಾಗಿಯೇ ಬಾಡಿಗೆ ಜಾಸ್ತಿ” ಎಂದು ಮಾಲೀಕರು ಸಮರ್ಥಿಸಿಕೊಂಡಿದ್ದಾರೆ! ಈ ಹಿಂದೆ ನೀರು, ಗಾಳಿ ಮತ್ತು ಬೆಳಕಿನಂತಹ ಮೂಲಭೂತ ಸೌಕರ್ಯಗಳನ್ನು ಸಾಮಾನ್ಯ ಎಂದು ಪರಿಗಣಿಸಲಾಗುತ್ತಿತ್ತು. ಆದರೆ ಈಗ ಅವುಗಳನ್ನು “ಪ್ರೀಮಿಯಂ” ಸೌಲಭ್ಯಗಳೆಂದು ಬಿಂಬಿಸಿ ದುಬಾರಿ ಬೆಲೆಗೆ ಮಾರಾಟ ಮಾಡಲಾಗುತ್ತಿದೆ ಎಂದು ಅನು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ಮಹಿಳೆಯ ಪೋಸ್ಟ್ಗೆ ಜನರ ಪ್ರತಿಕ್ರಿಯೆ
ಸೂರ್ಯನ ಬೆಳಕು ಬೀಳುತ್ತದೆ ಎಂಬ ಒಂದೇ ಕಾರಣಕ್ಕೆ ಇಷ್ಟು ದೊಡ್ಡ ಮೊತ್ತದ ಬಾಡಿಗೆ ಕೇಳುವುದನ್ನು ಕಂಡು ಅನು ಅವರಿಗೆ ನಂಬಲು ಸಾಧ್ಯವಾಗಲಿಲ್ಲ. ಅವರ ಪೋಸ್ಟ್ ವೈರಲ್ ಆಗುತ್ತಿದ್ದಂತೆ ನೆಟ್ಟಿಗರು ತೀಕ್ಷ್ಣವಾಗಿ ಪ್ರತಿಕ್ರಿಯಿಸಿದ್ದಾರೆ:
EMI ಕಟ್ಟುವುದು ಲೇಸು: ಇಷ್ಟು ದೊಡ್ಡ ಮೊತ್ತವನ್ನು ಬಾಡಿಗೆಗೆ ನೀಡುವ ಬದಲು, ಸ್ವಂತ ಮನೆ ಖರೀದಿಸಿ ಅದರ ಇಎಂಐ (EMI) ಕಟ್ಟುವುದು ಉತ್ತಮ ಎಂದು ಹಲವರು ಸಲಹೆ ನೀಡಿದ್ದಾರೆ ಒಬ್ಬ ಬಳಕೆದಾರರು ಇದನ್ನು ಕೇಳಿ ಮುಂಬೈ ನೆನಪಾಯಿತು, ಅಲ್ಲಿ ಮೊದಲೇ ಬಾಡಿಗೆ ಗಗನಕ್ಕೇರಿದೆ ಎಂದು ಬರೆದಿದ್ದಾರೆ.ಇನ್ನೂ ಕೆಲವರು ಹಾಸ್ಯಮಯವಾಗಿ, “ಇನ್ಮುಂದೆ ಬಿಸಿಲು ಕೂಡ ಲಕ್ಸುರಿ ಸೌಲಭ್ಯವಾಯಿತು” ಎಂದು ಕಾಮೆಂಟ್ ಮಾಡಿದ್ದಾರೆ.
ಬೆಂಗಳೂರಿನಲ್ಲಿ ಗಗನಕ್ಕೇರುತ್ತಿರುವ ಬಾಡಿಗೆಯಿಂದಾಗಿ ಸಾಮಾನ್ಯ ಜನರು ಬದುಕುವುದೇ ಕಷ್ಟವಾಗುತ್ತಿದೆ ಎಂದು ಅನೇಕರು ಆತಂಕ ವ್ಯಕ್ತಪಡಿಸಿದ್ದಾರೆ.
