ಬೆಂಗಳೂರು: ಗಾಂಜಾ ಮತ್ತಿನಲ್ಲಿ ಬಿದ್ದಿದ್ದ ಯುವಕನ ಮೇಲೆ ರೈಲು ಹರಿದು ಕೈ ಕಟ್ ಆಗಿದೆ. ಉತ್ತರ ಭಾರತ ಮೂಲದ ದಿಲೀಪ್ ಎಂಬ ಯುವಕನ ಎಡಗೈ ಕಟ್ ಆಗಿದೆ.
ಆಸ್ಪತ್ರೆಗೆ ಕರೆದುಕೊಂಡು ಹೋಗುವಾಗ ಆಂಬುಲೆನ್ಸ್ ನಿಂದ ಹೊರ ಜಿಗಿದು ಆತ ಎಸ್ಕೇಪ್ ಆಗಿದ್ದಾನೆ. ಕೈ ಕಟ್ ಆಗಿದ್ದನ್ನು ಮರೆತು ಓಡಿಹೋಗಿ ಯುವಕ ದಿಲೀಪ್ ಹುಚ್ಚಾಟ ನಡೆಸಿದ್ದಾನೆ. ಬೆಂಗಳೂರು ಗ್ರಾಮಾಂತರ ಜಿಲ್ಲೆ ದೇವನಹಳ್ಳಿ ಪಟ್ಟಣದ ಕುಂಬಾರ ಬೀದಿಯಲ್ಲಿ ಘಟನೆ ನಡೆದಿದೆ.
ತಡರಾತ್ರಿ ಯುವಕ ದಿಲೀಪ್ ಹೈಡ್ರಾಮಾ ನಡೆಸಿದ್ದಾನೆ. ರೈಲು ಹರಿದು ಕೈಕಟ್ ಆಗಿ ಬಿದ್ದಿದ್ದ ದಿಲೀಪ್ ನನ್ನು ಸ್ಥಳೀಯರ ಸಹಕಾರದೊಂದಿಗೆ ಆಸ್ಪತ್ರೆಗೆ ದಾಖಲಿಸಲು ಕರೆದೊಯ್ಯುತ್ತಿದ್ದಾಗ ಆಂಬುಲೆನ್ಸ್ ನಲ್ಲಿ ಹುಚ್ಚಾಟ ಮೆರೆದಿದ್ದಾನೆ. ಮೂರು ಬಾರಿ ಆಂಬುಲೆನ್ಸ್ ಗೆ ಹತ್ತಿಸಿದರೂ ಜಿಗಿದು ಪರಾರಿಯಾಗಿದ್ದಾನೆ. ದೇವನಹಳ್ಳಿ ಹಳೆ ಬಸ್ ನಿಲ್ದಾಣದಿಂದ ಓಡಿ ಹೋಗಿ ಕುಂಬಾರ ಬೀದಿಯ ಮನೆಗಳ ಬಳಿ ದಿಲೀಪ್ ಅಡಗಿಕೊಂಡಿದ್ದ. ಒಂದು ಗಂಟೆಗೂ ಅಧಿಕ ಕಾಲ ಹುಡುಕಿ ಆತನನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ. ಗಾಯಾಳು ದಿಲೀಪ್ ಗೆ ದೇವನಹಳ್ಳಿ ಸರ್ಕಾರಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಕೊಡಿಸಲಾಗಿದೆ. ಕಟ್ ಆದ ಕೈಗೆ ಬ್ಯಾಂಡೇಜ್ ಹಾಕುವಾಗಲು ದಿಲೀಪ್ ಹುಚ್ಚಾಟ ನಡೆಸಿದ್ದು, ಹಣವಿಲ್ಲ ಚಿಕಿತ್ಸೆ ಬೇಡವೆಂದು ಹೇಳಿದ್ದಾನೆ.
