ಮಂಡ್ಯ: ಶ್ರೀರಂಗಪಟ್ಟಣ ತಾಲೂಕಿನ ಪಾಲಹಳ್ಳಿ ಹೊರವಲಯದಲ್ಲಿ ಭಾನುವಾರ ನಾಲೆಗೆ ಬಟ್ಟೆ ತೊಳೆಯಲು ಹೋಗಿದ್ದ ಮಹಿಳೆಯನ್ನು ಕೊಲೆ ಮಾಡಿ ಚಿನ್ನದ ಸರ, ಕಿವಿಯೋಲೆ, ಮೂಗುತಿ ಲೂಟಿ ಮಾಡಲಾಗಿದೆ.
ಜಗದೀಶ್ ಅವರ ಪತ್ನಿ ಮಮತಾ(42) ಮೃತಪಟ್ಟವರು. ಮಮತಾ ಅವರ ಕುತ್ತಿಗೆಯಲ್ಲಿದ್ದ ಚಿನ್ನದ ಸರ, ಕಿವಿಯೋಲೆ ಮತ್ತು ಮೂಗುತಿಯನ್ನು ದುಷ್ಕರ್ಮಿಗಳು ದೋಚಿದ್ದಾರೆ. ಎರಡು ಕಿವಿಗಳು ಕಿತ್ತು ಬರುವಂತೆ ದುಷ್ಕರ್ಮಿಗಳು ಓಲೆಯನ್ನು ಕಿತ್ತುಕೊಂಡಿದ್ದಾರೆ.
ಭಾನುವಾರ ಮಧ್ಯಾಹ್ನ 12 ಗಂಟೆ ಸುಮಾರಿಗೆ ಮಮತಾ ಬಟ್ಟೆ ತೊಳೆಯಲು ನಾಲೆಗೆ ತೆರಳಿದ್ದಾರೆ. 2 ಗಂಟೆಯಾದರೂ ಅವರು ವಾಪಸ್ ಬಾರದ ಕಾರಣ ಪತಿ ಜಗದೀಶ್ ನಾಲೆಯ ಬಳಿ ಹೋಗಿ ಹುಡುಕಿದಾಗ ಮಮತಾ ಕಾಣಿಸಿಲ್ಲ. ಬಟ್ಟೆಗಳು ಅಲ್ಲೇ ಇದ್ದಿದ್ದರಿಂದ ಗಾಬರಿಯಾದ ಅವರು ಹುಡುಕಾಟ ನಡೆಸಿದ್ದಾರೆ. ದೂರದವರೆಗೂ ನಾಲೆಯಲ್ಲಿ ಹುಡುಕಾಡಿದಾಗ ಮಮತಾ ಅವರ ಮೃತದೇಹ ಕಂಡು ಬಂದಿದ್ದು ಪೊಲೀಸರಿಗೆ ದೂರು ನೀಡಲಾಗಿದೆ.
ಕೊಲೆಯಾದ ಸ್ಥಿತಿಯಲ್ಲಿ ಮಮತಾ ಶವ ಪತ್ತೆಯಾಗಿದೆ. ಅವರ ಕುತ್ತಿಗೆಯಲ್ಲಿದ್ದ ಚಿನ್ನದ ಸರ, ಕಿವಿಯೋಲೆ, ಮೂಗುತಿ ಕಿತ್ತುಕೊಂಡು ದುಷ್ಕರ್ಮಿಗಳು ಪರಾರಿಯಾಗಿದ್ದಾರೆ. ಶ್ರೀರಂಗಪಟ್ಟಣ ಠಾಣೆ ಪೊಲೀಸರು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದು, ತನಿಖೆ ಕೈಗೊಂಡಿದ್ದಾರೆ.
