ತುರ್ತು ಶಸ್ತ್ರಚಿಕಿತ್ಸೆಯ ವೇಳೆ ಎರಡು ನಿಮಿಷಗಳ ಕಾಲ ಸಾವನ್ನಪ್ಪಿದ್ದ ಗ್ರೀಕ್ ಕಲಾವಿದೆ ನಿಕೋಲ್ ಮೀವ್ಸ್ (49), ತಾನು ‘ಮತ್ತೊಂದು ಲೋಕಕ್ಕೆ’ ತೆರಳಿದ್ದೆ ಮತ್ತು ಜೇಮ್ಸ್ ಕ್ಯಾಮರೂನ್ ನಿರ್ದೇಶನದ ‘ಅವತಾರ್’ ಚಲನಚಿತ್ರದಲ್ಲಿರುವಂತಹ ನೀಲಿ ಚರ್ಮದ ಜೀವಿಗಳನ್ನು ಭೇಟಿಯಾಗಿದ್ದೆ ಎಂದು ಹೇಳಿಕೊಂಡಿದ್ದಾರೆ.
ಗರ್ಭಪಾತದ ನಂತರ ತೀವ್ರ ಆರೋಗ್ಯ ಸಮಸ್ಯೆಗಳಿಂದ ಬಳಲುತ್ತಿದ್ದ ಮೀವ್ಸ್ ಅವರಿಗೆ ಶಸ್ತ್ರಚಿಕಿತ್ಸೆ ನಡೆಸುವಾಗ ಅವರ ಹೃದಯ ಎರಡು ನಿಮಿಷಗಳ ಕಾಲ ನಿಂತಿತ್ತು. ಅವರ ದೇಹ ನಿಶ್ಚಲವಾಗಿ ಮಲಗಿದ್ದರೂ, ಅವರ ಮನಸ್ಸು ಮತ್ತು ಆತ್ಮ ಆಸ್ಪತ್ರೆಯ ಗೋಡೆಗಳನ್ನು ಮೀರಿ ಇನ್ನೊಂದು ಲೋಕವನ್ನು ಅನುಭವಿಸಿವೆ ಎನ್ನುವುದು ಅವರ ವಿವರಣೆ.
‘ನೀಡ್ ಟು ನೋ’ (NeedToKnow) ಸುದ್ದಿ ಸಂಸ್ಥೆಗೆ ನೀಡಿದ ಸಂದರ್ಶನದಲ್ಲಿ ಮೀವ್ಸ್ ತಮ್ಮ ಅನುಭವವನ್ನು ಹೀಗೆ ವಿವರಿಸಿದ್ದಾರೆ: “ನನ್ನ ಜೀವನದಲ್ಲಿ ಎಂದಿಗೂ ಅನುಭವಿಸದ ಒಂದು ಆಪ್ತತೆಯನ್ನು ನಾನು ಅಲ್ಲಿ ಅನುಭವಿಸಿದೆ; ನನಗೆ ಅಲ್ಲಿಂದ ಬರಲು ಮನಸ್ಸಾಗಿರಲಿಲ್ಲ. ಆ ಸ್ಥಳ, ಆ ಅನುಭವ ನನಗೆ ಅರ್ಥವಾಯಿತು. ನಾವೆಲ್ಲರೂ ಬಂದ ಮೂಲ ಮನೆ ಅದೇ ಎಂದು ನಾನು ಬಲವಾಗಿ ನಂಬುತ್ತೇನೆ. ಸಾವೆಂದರೆ ಅಂತ್ಯವಲ್ಲ, ಅದು ನಮ್ಮ ನಿಜವಾದ ಜೀವನಕ್ಕೆ ಮರಳುವಿಕೆ ಎಂದು ನಾನು ಅಲ್ಲಿ ಅರಿತುಕೊಂಡೆ.”
ಮೀವ್ಸ್ ಅವರು ತಮ್ಮ ದೇಹದಿಂದ ಆತ್ಮ ಬೇರ್ಪಟ್ಟು, ನೀಲಿ ಮತ್ತು ಬಿಳಿ ಬಣ್ಣದ ಬೆಳಕಿನ ಸುರಂಗದೊಳಗೆ ಸೆಳೆಯಲ್ಪಟ್ಟ ಅನುಭವವನ್ನು ವಿವರಿಸಿದ್ದಾರೆ. “ಅದು ಕೇವಲ ಒಂದು ಕಿರಣವಲ್ಲ, ಬದಲಿಗೆ ಜೀವಂತವಾಗಿರುವಂತಹ ಒಂದು ಕಾರಿಡಾರ್ ಆಗಿತ್ತು” ಎಂದು ಅವರು ಹೇಳುತ್ತಾರೆ. ಭಯಪಡುವ ಬದಲು, ಆ ಅನುಭವವು “ಮನೆಗೆ ಕರೆದಂತೆ” ಆರಾಮದಾಯಕವಾಗಿತ್ತು ಎಂದಿದ್ದಾರೆ.
ಬೆಳಕಿಗೆ “ತಾಪಮಾನ, ಸ್ವರ, ನೀರಿನಿಂದ ಮಾಡಿದ ಸಂಗೀತದಂತಹ” ಗುಣವಿತ್ತು ಮತ್ತು ಅದು ತಮ್ಮ ಸುತ್ತಲೂ ಪ್ರತಿಧ್ವನಿಸುತ್ತಿತ್ತು ಎಂದು ಅವರು ವಿವರಿಸಿದ್ದಾರೆ. “ಮತ್ತೊಂದು ಲೋಕಕ್ಕೆ’ ತೆರಳಿದ ನಂತರ ಸಮಯ ಮತ್ತು ಭಯ ಎರಡೂ ಇರಲಿಲ್ಲ” ಎಂದು ಅವರು ಹೇಳಿದ್ದಾರೆ. ಸುರಂಗದಿಂದ ಹೊರಬಂದಾಗ, ಮೀವ್ಸ್ ಬೃಹತ್, ಹೊಳೆಯುವ ಜಾಗವೊಂದರಲ್ಲಿ ನಿಂತಿದ್ದರು. ಅಲ್ಲಿ ನೇರಳೆ, ಬೆಳ್ಳಿ ಮತ್ತು ಗಾಢ ನೀಲಿ ಬಣ್ಣದ ಅದ್ಭುತ ಛಾಯೆಗಳಿದ್ದು, “ಯಾವುದೇ ಭೂಮಿಯ ರಚನೆಗಿಂತ ದೊಡ್ಡದಾಗಿದ್ದವು, ಮತ್ತು ಎಲ್ಲವೂ ಹೃದಯ ಬಡಿತದಂತೆ ನಿಧಾನವಾಗಿ ಮಿಡಿಯುತ್ತಿತ್ತು” ಎಂದು ಅವರು ವಿವರಿಸಿದ್ದಾರೆ.
ಆ ವಿಶಾಲ ಕೋಣೆಯಲ್ಲಿ, ಮೀವ್ಸ್ ಮಾನವನಂತಹ ಮುಖಗಳು ಮತ್ತು ನೀಲಿ ಚರ್ಮವನ್ನು ಹೊಂದಿದ್ದ ಜೀವಿಗಳನ್ನು ಭೇಟಿಯಾದರು. ಅವರು ಜೇಮ್ಸ್ ಕ್ಯಾಮರೂನ್ ಅವರ ‘ಅವತಾರ್’ ಚಿತ್ರದ ಜೀವಿಗಳನ್ನು ನೆನಪಿಸುತ್ತಾರೆ. ಅವರ ಭಾಷೆ ಅಪರಿಚಿತವಾಗಿದ್ದರೂ, ಅವರು ತಮ್ಮೊಂದಿಗೆ ದೂರಸಂವೇದನೆಯ ಮೂಲಕ ಮಾತನಾಡಿದರು ಎಂದು ಮೀವ್ಸ್ ನಂಬುತ್ತಾರೆ. ನಾವು ಬದುಕುತ್ತಿರುವ ಜೀವನ ಕೇವಲ ಒಂದು ಭ್ರಮೆ, ಮತ್ತು ನಿಜವಾದ ಅಸ್ತಿತ್ವ ಸಾವಿನ ನಂತರವೇ ಪ್ರಾರಂಭವಾಗುತ್ತದೆ ಎಂದು ಆ ಜೀವಿಗಳು ಬಹಿರಂಗಪಡಿಸಿದವು ಎನ್ನಲಾಗಿದೆ.
ವೃತ್ತಿಯಿಂದ ಕಲಾವಿದೆಯಾಗಿರುವ ಮೀವ್ಸ್, ಈ ಅನುಭವ ತಮ್ಮನ್ನು ಆಳವಾಗಿ ಬದಲಿಸಿದೆ ಎಂದು ಹೇಳುತ್ತಾರೆ. “ಅದು ಭಯಾನಕವೆಂದು ಅನ್ನಿಸಲಿಲ್ಲ; ಮನೆಗೆ ಮರಳಿದಂತೆ ಭಾಸವಾಯಿತು.” ವೈದ್ಯರು ಅವರ ಹೃದಯವನ್ನು ಪುನರಾರಂಭಿಸಿದ ನಂತರ, ಅವರು ಒಂದು ನಿರ್ದಿಷ್ಟ ಉದ್ದೇಶ ಮತ್ತು “ಸಾವೆಂದರೆ, ಸತ್ಯವಾಗಿ, ನಾವು ಸೇರಿರುವ ಸ್ಥಳಕ್ಕೆ ಮರಳುವಿಕೆ” ಎಂಬ ನಂಬಿಕೆಯೊಂದಿಗೆ ಜೀವನಕ್ಕೆ ಮರಳಿದರು.
Loading ...
