ಬ್ರಿಟನ್‌ನ ಕೌಂಟಿ ಟೈರೋನ್, ಉತ್ತರ ಐರ್ಲೆಂಡ್‌ನ ಪ್ರತಿಷ್ಠಿತ ಕುಟುಂಬವೊಂದು, ಬಿಲ್ ಪಾವತಿಸದೆ ಹೊರಟುಹೋಗಿದ್ದಾರೆ ಎಂದು ತಪ್ಪಾಗಿ ಆರೋಪಿಸಿ, ಸಿಸಿಟಿವಿ ದೃಶ್ಯಾವಳಿಗಳನ್ನು ಬಳಸಿ ಸಾರ್ವಜನಿಕವಾಗಿ ಮಾನಹಾನಿ ಮಾಡಿದ ಯುಕೆಯ ಪಬ್‌ವೊಂದರಿಂದ £75,000 (ಸುಮಾರು ₹85 ಲಕ್ಷ) ಪರಿಹಾರ ಪಡೆದುಕೊಂಡಿದೆ.
ಈ ಘಟನೆ ಯುಕೆಯ ಟೈಡ್ಸ್‌ವೆಲ್‌ನಲ್ಲಿರುವ ‘ದಿ ಹಾರ್ಸ್ ಆ್ಯಂಡ್ ಜಾಕಿ’ ಪಬ್‌ನಲ್ಲಿ ನಡೆದಿದೆ. ‘ಮ್ಯಾಕ್‌ಗಿರ್ ಇಂಜಿನಿಯರಿಂಗ್’ ಎಂಬ ಕೋಟ್ಯಾಂತರ ರೂಪಾಯಿ ಮೌಲ್ಯದ ಉದ್ಯಮದ ಮಾಲೀಕರಾದ ಮ್ಯಾಕ್‌ಗಿರ್ ಕುಟುಂಬವು ಇಲ್ಲಿ ಊಟ ಮಾಡಿ, ಅದಕ್ಕೆ ಪಾವತಿಸಿಯೂ ಇತ್ತು. ಆದರೆ, ಸಿಬ್ಬಂದಿಯ ತಪ್ಪಿನಿಂದಾಗಿ, ಪಾವತಿಯು ವ್ಯವಸ್ಥೆಯಲ್ಲಿ ದಾಖಲಾಗಿರಲಿಲ್ಲ. ವರದಿಗಳ ಪ್ರಕಾರ, ಒಬ್ಬ ಉದ್ಯೋಗಿ ಬಿಲ್ ಮೊತ್ತವನ್ನು ಸಂಗ್ರಹಿಸಿದ್ದರೂ, ಅದನ್ನು ತಮ್ಮ ವ್ಯವಸ್ಥೆಯಲ್ಲಿ ನಮೂದಿಸಲು ವಿಫಲರಾಗಿದ್ದರು. ಇದರ ಪರಿಣಾಮವಾಗಿ, ಕುಟುಂಬವು ಬಿಲ್ ಪಾವತಿಸದೆ ಹೊರಗೆ ಹೋಗಿದೆ ಎಂದು ದಾಖಲಾಗಿತ್ತು.
ಸಿಸಿಟಿವಿ ದೃಶ್ಯಗಳನ್ನು ಫೇಸ್‌ಬುಕ್‌ನಲ್ಲಿ ಪೋಸ್ಟ್:
ಆಂತರಿಕ ತಪ್ಪು ಬಗ್ಗೆ ಅರಿವಿಲ್ಲದ ಪಬ್, ಬಿಲ್ ಪಾವತಿಸಿಲ್ಲ ಎಂದು ಭಾವಿಸಿ, ಕುಟುಂಬದ ಸಿಸಿಟಿವಿ ಚಿತ್ರಗಳನ್ನು ಫೇಸ್‌ಬುಕ್‌ನಲ್ಲಿ ಪೋಸ್ಟ್ ಮಾಡಿತು. ಅವರು ಊಟಕ್ಕೆ ಹಣ ನೀಡದೆ ಹೊರಟುಹೋಗಿದ್ದಾರೆ ಎಂದು ಆರೋಪಿಸಿತು. ಪೋಸ್ಟ್‌ನಲ್ಲಿ ಅವರನ್ನು “ಊಟ ಮಾಡಿ ಎಸ್ಕೇಪ್ ಆದವರು” ಎಂದು ಲೇಬಲ್ ಮಾಡಲಾಗಿತ್ತು, ಇದು ಗೌರವಾನ್ವಿತ ವ್ಯಕ್ತಿಗಳಿಗೆ ತೀವ್ರ ಮುಜುಗರವನ್ನುಂಟು ಮಾಡಿತು.
ಈ ಆರೋಪಗಳು ಮ್ಯಾಕ್‌ಗಿರ್ ಕುಟುಂಬವನ್ನು ತಿಳಿದಿದ್ದ ಅನೇಕರಿಗೆ ಆಘಾತವನ್ನುಂಟು ಮಾಡಿತು. ಏಕೆಂದರೆ ಅವರು ₹2 ಮಿಲಿಯನ್ (£2 ಮಿಲಿಯನ್) ಗಿಂತ ಹೆಚ್ಚು ಮೌಲ್ಯದ ವ್ಯಾಪಾರ ಆಸ್ತಿಗಳನ್ನು ಮತ್ತು ₹1.3 ಮಿಲಿಯನ್ (£1.3 ಮಿಲಿಯನ್) ನಗದು ಮೀಸಲು ಹೊಂದಿರುವ ಶ್ರೀಮಂತ ಕುಟುಂಬ. “ಆರೋಪಗಳಿಂದ ಎಲ್ಲರೂ ಆಶ್ಚರ್ಯಚಕಿತರಾದರು – ಅವರಿಗೆ ಹಣದ ಕೊರತೆಯಿಲ್ಲ” ಎಂದು ಮೂಲವೊಂದು ಅಂತರರಾಷ್ಟ್ರೀಯ ಮಾಧ್ಯಮಗಳಿಗೆ ತಿಳಿಸಿದೆ.
ಕಾನೂನು ಕ್ರಮ:
ತಮ್ಮ ಮೇಲೆ ಸುಳ್ಳು ಆರೋಪ ಮಾಡಿದ್ದಕ್ಕಾಗಿ ಮ್ಯಾಕ್‌ಗಿರ್ ಕುಟುಂಬವು ಪಬ್ ವಿರುದ್ಧ ಕಾನೂನು ಕ್ರಮ ಜರುಗಿಸಿತು.
“ಆರೋಪಗಳು ಸಂಪೂರ್ಣವಾಗಿ ಸುಳ್ಳು. ದೂರುದಾರರು ಅಂತಹ ಯಾವುದೇ ಕೃತ್ಯದಲ್ಲಿ ತೊಡಗಿರಲಿಲ್ಲ, ಮತ್ತು ಪ್ರತಿವಾದಿಗಳು ಮಾಡಿದ ಹೇಳಿಕೆಗಳಿಗೆ ಯಾವುದೇ ವಾಸ್ತವಿಕ ಆಧಾರವಿರಲಿಲ್ಲ” ಎಂದು ನಂತರ ನ್ಯಾಯಾಲಯದ ದಾಖಲೆಗಳು ದೃಢಪಡಿಸಿದವು.
ಕಾನೂನು ಪ್ರಕ್ರಿಯೆಗಳ ನಂತರ, ಪಬ್ ತಮ್ಮ ತಪ್ಪನ್ನು ಒಪ್ಪಿಕೊಂಡಿತು ಮತ್ತು ಪರಿಹಾರ ನೀಡಲು ಒಪ್ಪಿಕೊಂಡಿತು. ಅವರು ಕುಟುಂಬಕ್ಕೆ ₹85 ಲಕ್ಷ ಪರಿಹಾರವನ್ನು ಪಾವತಿಸಿದರು, ಇದರಲ್ಲಿ ಮ್ಯಾಕ್‌ಗಿರ್ ಕುಟುಂಬದ ಕಾನೂನು ವೆಚ್ಚಗಳೂ ಸೇರಿವೆ.
ಪಾವತಿಯನ್ನು ವ್ಯವಸ್ಥೆಯಲ್ಲಿ ದಾಖಲಿಸಲು ವಿಫಲರಾದ ಸಿಬ್ಬಂದಿಯ ವಿರುದ್ಧ ಯಾವುದೇ ಕ್ರಮ ತೆಗೆದುಕೊಳ್ಳಲಾಗಿದೆಯೇ ಎಂಬುದು ಸ್ಪಷ್ಟವಾಗಿಲ್ಲ.
Loading ...
