ಭಾರತದ ಅತ್ಯಂತ ಜನಪ್ರಿಯ ರಿಯಾಲಿಟಿ ಶೋಗಳಲ್ಲಿ ಒಂದಾದ ‘ಕೌನ್ ಬನೇಗಾ ಕರೋಡ್‌ಪತಿ’ (KBC) ಕುರಿತು ಇತ್ತೀಚೆಗೆ ಹರಿದಾಡುತ್ತಿದ್ದ ವದಂತಿಗಳಿಗೆ ತೆರೆ ಬಿದ್ದಿದೆ. ಕಾರ್ಯಕ್ರಮದ ಪ್ರಾರಂಭದಿಂದಲೂ ನಿರೂಪಕರಾಗಿ ಗುರುತಿಸಿಕೊಂಡಿರುವ ಸೂಪರ್‌ಸ್ಟಾರ್ ಅಮಿತಾಭ್ ಬಚ್ಚನ್ ಅವರು 17ನೇ ಸೀಸನ್‌ನಿಂದ ಹಿಂದೆ ಸರಿಯಲಿದ್ದಾರೆ ಮತ್ತು ಅವರ ಸ್ಥಾನಕ್ಕೆ ಸಲ್ಮಾನ್ ಖಾನ್ ಬರಲಿದ್ದಾರೆ ಎಂಬ ಸುದ್ದಿ ವೈರಲ್ ಆಗಿತ್ತು. ಆದರೆ, ಈ ಸುದ್ದಿಯನ್ನು ಸೋನಿ ಟಿವಿ (Sony TV) ಸಂಪೂರ್ಣವಾಗಿ ನಿರಾಕರಿಸಿದೆ.
ಹಲವು ಮಾಧ್ಯಮ ವರದಿಗಳು, ಬಚ್ಚನ್ ಅವರು ‘ವೈಯಕ್ತಿಕ ಕಾರಣ’ಗಳಿಂದಾಗಿ ಕೆಬಿಸಿಯಿಂದ ಹಿಂದೆ ಸರಿಯಲು ನಿರ್ಧರಿಸಿದ್ದಾರೆ ಮತ್ತು ಸಣ್ಣ ಪರದೆಯ ಮೇಲೆ ಸಲ್ಮಾನ್ ಖಾನ್ ಜನಪ್ರಿಯತೆ ಪರಿಗಣಿಸಿ ಅವರನ್ನು ನಿರೂಪಕರನ್ನಾಗಿ ಆಯ್ಕೆ ಮಾಡಲಾಗಿದೆ ಎಂದು ಹೇಳಿಕೊಂಡಿದ್ದವು. ಆದರೆ, ವಾಹಿನಿ ಮೂಲಗಳು ಈ ವದಂತಿಗಳನ್ನು “ವಿಚಿತ್ರ” ಎಂದು ಕರೆದಿವೆ. ಅಮಿತಾಭ್ ಬಚ್ಚನ್ ಅವರೇ ‘ಕೌನ್ ಬನೇಗಾ ಕರೋಡ್‌ಪತಿ’ಯ ಮುಖವಾಗಿ ಮುಂದುವರಿಯಲಿದ್ದಾರೆ ಎಂದು ಸ್ಪಷ್ಟಪಡಿಸಲಾಗಿದೆ.
ವಾಸ್ತವವಾಗಿ, KBC 17 ರ ಪ್ರಚಾರ ಸಾಮಗ್ರಿಗಳು ಮತ್ತು ಟೀಸರ್‌ಗಳಲ್ಲಿ ಈಗಾಗಲೇ ಅಮಿತಾಭ್ ಬಚ್ಚನ್ ಕಾಣಿಸಿಕೊಂಡಿದ್ದಾರೆ. ಮುಂಬರುವ ವಾರಗಳಲ್ಲಿ ಪೂರ್ಣ ಪ್ರೋಮೋಗಳ ಚಿತ್ರೀಕರಣಕ್ಕೆ ಅವರು ಸಿದ್ಧರಾಗಿದ್ದಾರೆ. ಹೊಸ ಸೀಸನ್ ಜುಲೈನಲ್ಲಿ ಚಿತ್ರೀಕರಣವನ್ನು ಪ್ರಾರಂಭಿಸಿ, ಆಗಸ್ಟ್ ಮೊದಲ ವಾರದಲ್ಲಿ ಪ್ರಥಮ ಪ್ರದರ್ಶನಗೊಳ್ಳುವ ನಿರೀಕ್ಷೆಯಿದೆ.
ಹಿಂದೆ, ಅಮಿತಾಭ್ ಬಚ್ಚನ್ ಅವರು ‘ಬಿಗ್ ಬಾಸ್’ ಸೀಸನ್ 3 ಅನ್ನು ನಿರೂಪಿಸಿದ ನಂತರ, 4ನೇ ಸೀಸನ್‌ನಿಂದ ಸಲ್ಮಾನ್ ಖಾನ್ ಆ ಜವಾಬ್ದಾರಿಯನ್ನು ವಹಿಸಿಕೊಂಡಿದ್ದರು. ಅಂತೆಯೇ, ಶಾರುಖ್ ಖಾನ್ ಕೂಡ ಕೆಬಿಸಿ 3 ಅನ್ನು ನಿರೂಪಿಸಿದ್ದರು. ಈ ಹಿನ್ನೆಲೆಯಲ್ಲಿ, ಕೆಬಿಸಿಯಲ್ಲೂ ಬಚ್ಚನ್ ಅವರ ಸ್ಥಾನವನ್ನು ಸಲ್ಮಾನ್ ತುಂಬುತ್ತಾರೆ ಎಂಬ ವದಂತಿಗಳು ಬಲಗೊಂಡಿದ್ದವು. ಆದರೆ, ಬಿಗ್ ಬಿ ಅವರ ಅಸಂಖ್ಯಾತ ಅಭಿಮಾನಿಗಳಿಗೆ ಸಂತಸ ತರುವ ಸುದ್ದಿಯೆಂದರೆ, ಅಮಿತಾಭ್ ಬಚ್ಚನ್ ಅವರೇ ತಮ್ಮ ಎಂದಿನ ಗತ್ತು ಮತ್ತು ಶೈಲಿಯಲ್ಲಿ ಕೆಬಿಸಿ 17ರಲ್ಲೂ ನಿರೂಪಕರಾಗಿ ಮುಂದುವರಿಯಲಿದ್ದಾರೆ.
Loading ...
