ಪತ್ರಿಕಾಗೋಷ್ಠಿಯಲ್ಲಿ ಭಾರತದ ನಕಲು ಮಾಡಲೋಗಿ ನಗೆಪಾಟಲಿಗೀಡಾದ ಪಾಕ್‌ | Watch

ಭಾರತದ ಯಶಸ್ವಿ ‘ಆಪರೇಷನ್ ಸಿಂಧೂರ್’ ಕಾರ್ಯಾಚರಣೆಯ ಕುರಿತಾದ ಪತ್ರಿಕಾಗೋಷ್ಠಿಗಳ ಶೈಲಿಯನ್ನು ಅನುಕರಿಸಲು ಯತ್ನಿಸಿದ ಪಾಕಿಸ್ತಾನಕ್ಕೆ ಜಾಗತಿಕ ಮಟ್ಟದಲ್ಲಿ ಮುಖಭಂಗವಾಗಿದೆ. ವಿಶ್ವದಾದ್ಯಂತದ ಮಾಧ್ಯಮಗಳು ಪಾಕಿಸ್ತಾನದ ಈ ವಿಫಲ ಪ್ರಯತ್ನವನ್ನು ತೀವ್ರವಾಗಿ ಟೀಕಿಸಿವೆ.

ಇತ್ತೀಚೆಗೆ ಭಾರತವು ನವದೆಹಲಿಯಲ್ಲಿ ಉನ್ನತ ಮಟ್ಟದ ಜಂಟಿ ಪತ್ರಿಕಾಗೋಷ್ಠಿಗಳನ್ನು ಆಯೋಜಿಸಿತ್ತು. ಇದರಲ್ಲಿ ಭಾರತದ ವಿದೇಶಾಂಗ ಕಾರ್ಯದರ್ಶಿಗಳು ಹಾಗೂ ಸೇನೆ, ವಾಯುಸೇನೆ ಮತ್ತು ನೌಕಾಪಡೆಯ ಹಿರಿಯ ಅಧಿಕಾರಿಗಳು ಪಾಕಿಸ್ತಾನದೊಳಗೆ ನಡೆಸಲಾದ ನಿಖರವಾದ ವಾಯುದಾಳಿಗಳ ಬಗ್ಗೆ ವಿವರವಾದ ಮಾಹಿತಿ ನೀಡಿದ್ದರು. ಅಷ್ಟೇ ಅಲ್ಲದೆ, ಪಾಕಿಸ್ತಾನದ ಸುಳ್ಳು ಸುದ್ದಿಗಳನ್ನು ಸೂಕ್ತ ಸಾಕ್ಷ್ಯಚಿತ್ರಗಳು, ಛಾಯಾಚಿತ್ರಗಳು ಮತ್ತು ವಿಡಿಯೊಗಳೊಂದಿಗೆ ಬಯಲು ಮಾಡಿದ್ದರು. ಭಾರತದ ಈ ದಿಟ್ಟ ಕ್ರಮ ಮತ್ತು ಸಮನ್ವಯ ಕಾರ್ಯಾಚರಣೆಯನ್ನು ಜಗತ್ತು ಮೆಚ್ಚಿ ಕೊಂಡಾಡಿತ್ತು.

ಇದರಿಂದ ಒತ್ತಡಕ್ಕೆ ಒಳಗಾದ ಪಾಕಿಸ್ತಾನವು ರಾವಲ್ಪಿಂಡಿಯಲ್ಲಿ ಇದೇ ಮಾದರಿಯ ಪತ್ರಿಕಾಗೋಷ್ಠಿಯನ್ನು ಆಯೋಜಿಸಲು ಯತ್ನಿಸಿತು. ಆದರೆ, ಪಾಕಿಸ್ತಾನದ ಇಂಟರ್-ಸರ್ವಿಸಸ್ ಪಬ್ಲಿಕ್ ರಿಲೇಷನ್ಸ್ (ಡಿಜಿಐಎಸ್‌ಪಿಆರ್) ಮಹಾನಿರ್ದೇಶಕರು ನಡೆಸಿದ ಈ ಗೋಷ್ಠಿಯು ಸಂಪೂರ್ಣವಾಗಿ ವಿಫಲವಾಯಿತು. ಆಸ್ಟ್ರೇಲಿಯಾದ ಪ್ರಮುಖ ಸುದ್ದಿ ವಾಹಿನಿಯೊಂದು ವರದಿ ಮಾಡಿರುವಂತೆ, “ಪಾಕಿಸ್ತಾನದ ಪತ್ರಿಕಾಗೋಷ್ಠಿಯು ಭಾರತದ ಪತ್ರಿಕಾಗೋಷ್ಠಿಯ ಕೇವಲ ಅನುಕರಣೆಯಾಗಿತ್ತು. ಆದರೆ, ಅವರ ಹೇಳಿಕೆಗಳನ್ನು ಸಮರ್ಥಿಸಲು ಯಾವುದೇ ಪ್ರಭಾವಶಾಲಿ ದೃಶ್ಯಗಳಾಗಲಿ ಅಥವಾ ಪುರಾವೆಗಳಾಗಲಿ ಇರಲಿಲ್ಲ.” ಡಿಜಿಐಎಸ್‌ಪಿಆರ್ ಲೆಫ್ಟಿನೆಂಟ್ ಜನರಲ್ ಅಹ್ಮದ್ ಶರೀಫ್ ಚೌಧರಿ ಅವರ ಹೇಳಿಕೆಗಳನ್ನು ಕೇಳಿದ ನಂತರ ವ್ಯಾಖ್ಯಾನಕಾರರು ನಗೆಯನ್ನು ತಡೆಯಲು ಸಾಧ್ಯವಾಗಲಿಲ್ಲ ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ.

ಅಷ್ಟೇ ಅಲ್ಲದೆ, ಸಾಮಾಜಿಕ ಮಾಧ್ಯಮಗಳಲ್ಲಿ ಪಾಕಿಸ್ತಾನದ ಈ ಪ್ರಯತ್ನವನ್ನು ತೀವ್ರವಾಗಿ ಅಣಕಿಸುವ ಹಲವಾರು ಪೋಸ್ಟ್‌ಗಳನ್ನು ವಿದೇಶಿ ಮಾಧ್ಯಮಗಳು ಎತ್ತಿ ತೋರಿಸಿವೆ. ಭಾರತದ ಅತ್ಯಂತ ವ್ಯವಸ್ಥಿತ ಮತ್ತು ವೃತ್ತಿಪರವಾಗಿ ನಡೆಸಲಾದ ಪತ್ರಿಕಾಗೋಷ್ಠಿಗಳಿಗೆ ಹೋಲಿಸಿದರೆ ಪಾಕಿಸ್ತಾನದ ಪ್ರಯತ್ನವು ಹಾಸ್ಯಾಸ್ಪದವಾಗಿದೆ ಎಂದು ನೆಟ್ಟಿಗರು ಅಭಿಪ್ರಾಯಪಟ್ಟಿದ್ದಾರೆ. “ಅದು ಕೇವಲ ಸರ್ಕಸ್‌ನಂತೆ ಕಾಣುತ್ತಿತ್ತು” ಎಂದು ಅನೇಕರು ವ್ಯಂಗ್ಯವಾಡಿದ್ದಾರೆ. ಭಾರತವು ಭಯೋತ್ಪಾದಕ ಶಿಬಿರಗಳನ್ನು ನಾಶಪಡಿಸಿದ, ಜೆಟ್‌ಗಳನ್ನು ಹೊಡೆದುರುಳಿಸಿದ ಮತ್ತು ನೂರಾರು ಉಗ್ರರನ್ನು ಸದೆಬಡಿದ ಪುರಾವೆಗಳನ್ನು ನೀಡಿದರೆ, ಪಾಕಿಸ್ತಾನವು ಕೇವಲ ವಾಟ್ಸಾಪ್ ಸಂದೇಶಗಳು ಮತ್ತು ಪವರ್ ಪಾಯಿಂಟ್ ಪ್ರೆಸೆಂಟೇಶನ್‌ಗಳೊಂದಿಗೆ ಪ್ರತಿಕ್ರಿಯಿಸಲು ಯತ್ನಿಸಿತು ಎಂದು ವಿದೇಶಿ ಮಾಧ್ಯಮಗಳು ಟೀಕಿಸಿವೆ.

ಭಾನುವಾರ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಭಾರತದ ಮಿಲಿಟರಿ ಕಾರ್ಯಾಚರಣೆಗಳ ಮಹಾನಿರ್ದೇಶಕರು ಪಾಕಿಸ್ತಾನದೊಳಗೆ ನಡೆಸಲಾದ ವಾಯುದಾಳಿಗಳ ವಿಡಿಯೊವನ್ನು ಪ್ರದರ್ಶಿಸಿದ್ದರು. ಈ ವಿಡಿಯೊವು ಶಿವ ತಾಂಡವ ಸ್ತೋತ್ರದೊಂದಿಗೆ ಪ್ರಾರಂಭವಾಗಿದ್ದು, ಇದು ಭಾರತೀಯರಿಂದ ವ್ಯಾಪಕ ಮೆಚ್ಚುಗೆಗೆ ಪಾತ್ರವಾಗಿತ್ತು. ಸೋಮವಾರದ ಪತ್ರಿಕಾಗೋಷ್ಠಿಯಲ್ಲಿ ಏರ್ ಮಾರ್ಷಲ್ ಎ ಕೆ ಭಾರ್ತಿ ಅವರು ರಾಮಚರಿತಮಾನಸದ ಉಲ್ಲೇಖವನ್ನು ನೀಡಿದ್ದು, ಶತ್ರುಗಳಿಗೆ ನೀಡಲಾದ ಈ ಎಚ್ಚರಿಕೆಯ ಶೈಲಿಯನ್ನು ಸಾಮಾಜಿಕ ಮಾಧ್ಯಮ ಬಳಕೆದಾರರು ಶ್ಲಾಘಿಸಿದ್ದಾರೆ.