ಚೀನಾದ ನ್ಯಾಯಾಲಯವೊಂದು ಇತ್ತೀಚೆಗೆ ವಿಚ್ಛೇದನ ಪ್ರಕರಣವೊಂದರಲ್ಲಿ ಮಹತ್ವದ ತೀರ್ಪು ನೀಡಿದೆ. ವರ್ಷಗಳ ಕಾಲ ಮನೆಯಲ್ಲಿ ದುಡಿದ ಪತ್ನಿಗೆ ಆಕೆಯ ಪತಿ 30 ಲಕ್ಷ ರೂಪಾಯಿ (2,50,000 ಯುವಾನ್) ಪರಿಹಾರ ನೀಡುವಂತೆ ಆದೇಶಿಸಿದೆ. ಈ ತೀರ್ಪು ಸಾರ್ವಜನಿಕ ವಲಯದಲ್ಲಿ ವ್ಯಾಪಕ ಚರ್ಚೆಗೆ ಗ್ರಾಸವಾಗಿದೆ.
ವಾಂಗ್ ಮತ್ತು ಹು ದಂಪತಿಗಳು ವಿಚ್ಛೇದನಕ್ಕೆ ಅರ್ಜಿ ಸಲ್ಲಿಸಿದ್ದರು. ಹು ಅವರು ಮದುವೆಯ ಸಮಯದಲ್ಲಿ ತಾವು ಮಾಡಿದ ವೇತನರಹಿತ ಗೃಹಕೃತ್ಯಕ್ಕೆ ಮನ್ನಣೆ ನೀಡಬೇಕೆಂದು 6 ಲಕ್ಷ ರೂಪಾಯಿ (50,000 ಯುವಾನ್) ಪರಿಹಾರ ಕೋರಿದ್ದರು. ನ್ಯಾಯಾಲಯವು ಮಗುವಿನ ಪಾಲನೆಯನ್ನು ಹು ಅವರಿಗೆ ನೀಡಿತು ಮತ್ತು ವಾಂಗ್ ಆರ್ಥಿಕವಾಗಿ ಕೊಡುಗೆ ನೀಡುವಂತೆ ಆದೇಶಿಸಿತು. ವರ್ಷಗಳ ಕಾಲ ಹು ಮಾಡಿದ ಗೃಹಕೃತ್ಯಕ್ಕೆ ಪರಿಹಾರವಾಗಿ ವಾಂಗ್ 30 ಲಕ್ಷ ರೂಪಾಯಿ (2,50,000 ಯುವಾನ್) ಪಾವತಿಸಬೇಕು ಎಂದು ನ್ಯಾಯಾಲಯ ತೀರ್ಪು ನೀಡಿದೆ. ಈ ತೀರ್ಪಿನಿಂದ ವಾಂಗ್ ಆಶ್ಚರ್ಯಚಕಿತರಾದರು.
“ಮನೆಗೆಲಸ ಅಮೂರ್ತವಾಗಿದ್ದರೂ, ಅದು ಮೌಲ್ಯರಹಿತವಲ್ಲ. ಮನೆಗೆಲಸವನ್ನು ದಂಪತಿಗಳು ಸಮಾನವಾಗಿ ಹಂಚಿಕೊಳ್ಳಬೇಕು” ಎಂದು ನ್ಯಾಯಾಲಯ ಹೇಳಿದೆ. ಚೀನಾದ ನಾಗರಿಕ ಸಂಹಿತೆಯ ಪ್ರಕಾರ, ಮಗುವಿನ ಅಥವಾ ವೃದ್ಧರ ಆರೈಕೆ ಸೇರಿದಂತೆ ಕೌಟುಂಬಿಕ ಜವಾಬ್ದಾರಿಗಳನ್ನು ಹೆಚ್ಚಾಗಿ ನಿರ್ವಹಿಸುವ ಸಂಗಾತಿ ವಿಚ್ಛೇದನದ ಸಮಯದಲ್ಲಿ ಆರ್ಥಿಕ ಪರಿಹಾರ ಪಡೆಯಲು ಅರ್ಹರು. “ಈ ನಿಯಮವು ಮನೆಗೆಲಸದ ಮೌಲ್ಯವನ್ನು ಗುರುತಿಸುತ್ತದೆ. ಇದು ಕುಟುಂಬದ ಸದಸ್ಯರೆಲ್ಲರೂ ಮನೆಗೆಲಸದಲ್ಲಿ ಭಾಗವಹಿಸಲು, ಪರಸ್ಪರ ಗೌರವಿಸಲು ಮತ್ತು ಹೆಚ್ಚು ಮನೆಕೆಲಸ ಮಾಡಿದವರಿಗೆ ತಾರತಮ್ಯವಾಗದಂತೆ ನೋಡಿಕೊಳ್ಳಲು ಪ್ರೋತ್ಸಾಹಿಸುತ್ತದೆ” ಎಂದು ನ್ಯಾಯಾಲಯ ಹೇಳಿದೆ.
ಈ ತೀರ್ಪು ಸಾಮಾಜಿಕ ಮಾಧ್ಯಮಗಳಲ್ಲಿ ವ್ಯಾಪಕ ಚರ್ಚೆಗೆ ಕಾರಣವಾಗಿದೆ. ಅನೇಕರು ನ್ಯಾಯಾಲಯದ ತೀರ್ಪನ್ನು ನ್ಯಾಯೋಚಿತ ಮತ್ತು ಸಮರ್ಥನೀಯ ಎಂದು ಶ್ಲಾಘಿಸಿದ್ದಾರೆ. ಕೆಲವರು ಗೃಹಕೃತ್ಯದ ದೈಹಿಕ ಮತ್ತು ಮಾನಸಿಕ ಪರಿಶ್ರಮವನ್ನು ಗುರುತಿಸಿದ್ದಾರೆ. ಗೃಹಕೃತ್ಯ ಮತ್ತು ಕುಟುಂಬದ ಆರೈಕೆ ಸಾಂಪ್ರದಾಯಿಕ ಉದ್ಯೋಗದಷ್ಟೇ ಕಷ್ಟಕರ ಎಂದು ಹಲವರು ಹೇಳಿದ್ದಾರೆ. ಕಾನೂನು ಪ್ರಕ್ರಿಯೆಗಳಲ್ಲಿ ಇಂತಹ ಕೊಡುಗೆಗಳನ್ನು ಗುರುತಿಸುತ್ತಿರುವುದಕ್ಕೆ ಕೆಲವರು ಸಂತಸ ವ್ಯಕ್ತಪಡಿಸಿದ್ದಾರೆ.
ಈ ತೀರ್ಪು ಗೃಹಕೃತ್ಯದ ಮೌಲ್ಯದ ಬಗ್ಗೆ ಸಾರ್ವಜನಿಕ ಚರ್ಚೆಯನ್ನು ಹುಟ್ಟುಹಾಕಿದೆ ಮತ್ತು ಕೌಟುಂಬಿಕ ಜವಾಬ್ದಾರಿಗಳನ್ನು ಸಮಾನವಾಗಿ ಹಂಚಿಕೊಳ್ಳುವ ಅಗತ್ಯವನ್ನು ಎತ್ತಿ ತೋರಿಸಿದೆ.
