ಕೇರಳದ 18 ವರ್ಷದ ಯುವತಿಯೊಬ್ಬಳು ತೂಕ ಇಳಿಸುವ ಆಹಾರ ಕ್ರಮಕ್ಕಾಗಿ ಯೂಟ್ಯೂಬ್ ಅನ್ನು ಅವಲಂಬಿಸಿ ತಿಂಗಳುಗಟ್ಟಲೆ ನೀರು ಕುಡಿದು ಬದುಕಿ ‘ಅನೋರೆಕ್ಸಿಯಾ’ದಿಂದ ಸಾವನ್ನಪ್ಪಿದ್ದಾಳೆ ಎಂದು ಅಧಿಕಾರಿಗಳು ಸೋಮವಾರ ತಿಳಿಸಿದ್ದಾರೆ.
ಕಣ್ಣೂರಿನ ಕೂತುಪರಂಬ ನಿವಾಸಿಯಾದ ಯುವತಿಯನ್ನು ಶ್ರೀನಂದ ಎಂದು ಗುರುತಿಸಲಾಗಿದ್ದು, ತೂಕ ಮತ್ತು ಆಹಾರದ ಬಗ್ಗೆ ಜನರನ್ನು ಗೀಳಾಗಿಸುವ ಈ ತಿನ್ನುವ ಅಸ್ವಸ್ಥತೆಯಿಂದ ಬಳಲುತ್ತಿದ್ದಳು. ಈ ಸ್ಥಿತಿಯಿಂದ ಬಳಲುತ್ತಿರುವ ಜನರು ತೆಳ್ಳಗಿನ ದೇಹವನ್ನು ಹೊಂದಿದ್ದರೂ ತಮ್ಮನ್ನು ತಾವು “ಅಧಿಕ ತೂಕ” ಎಂದು ಭಾವಿಸುತ್ತಾರೆ ಮತ್ತು ಆಹಾರ ಸೇವಿಸುವುದನ್ನು ತಪ್ಪಿಸುತ್ತಾರೆ.
ಕುಟುಂಬ ಮತ್ತು ವೈದ್ಯರ ಪ್ರಕಾರ, ಶ್ರೀನಂದ ಸುಮಾರು 5 ರಿಂದ 6 ತಿಂಗಳುಗಳಿಂದ ಈ ಸ್ಥಿತಿಯಿಂದ ಬಳಲುತ್ತಿದ್ದಳು. ಕೆಲವು ತಿಂಗಳುಗಳಿಂದ ಯುವತಿ ಏನನ್ನೂ ತಿನ್ನುತ್ತಿರಲಿಲ್ಲ ಮತ್ತು ಅದನ್ನು ತನ್ನ ಕುಟುಂಬ ಸದಸ್ಯರಿಂದ ಮರೆಮಾಚುತ್ತಿದ್ದಳು ಎಂದು ಅವರು ಹೇಳಿದ್ದಾರೆ.
“ಸುಮಾರು ಐದು ತಿಂಗಳ ಹಿಂದೆ, ಆಕೆಯನ್ನು ಆಸ್ಪತ್ರೆಗೆ ಕರೆದೊಯ್ಯಲಾಗಿದ್ದು, ಆ ಸಂದರ್ಭದಲ್ಲಿ ವೈದ್ಯರು ಆಕೆ ಆಹಾರ ಸೇವಿಸಬೇಕು ಎಂದು ಸಲಹೆ ನೀಡಿ ಕುಟುಂಬಕ್ಕೆ ಮನೋವೈದ್ಯಕೀಯ ಸಮಾಲೋಚನೆ ಪಡೆಯಲು ತಿಳಿಸಿದ್ದರು” ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
ಸಂಬಂಧಿಯೊಬ್ಬರ ಪ್ರಕಾರ, ಶ್ರೀನಂದ ತನ್ನ ಪೋಷಕರು ನೀಡಿದ ಆಹಾರವನ್ನು ತಿನ್ನುತ್ತಿರಲಿಲ್ಲ ಮತ್ತು ದೀರ್ಘಕಾಲದವರೆಗೆ ಬಿಸಿ ನೀರು ಮಾತ್ರ ಕುಡಿದು ಬದುಕಿದ್ದಳು. ಕುಟುಂಬವು ಆಕೆಯನ್ನು ಕೋಝಿಕ್ಕೋಡ್ ವೈದ್ಯಕೀಯ ಕಾಲೇಜು ಮತ್ತು ಆಸ್ಪತ್ರೆಗೆ ಕರೆದೊಯ್ದಿತ್ತು, ಅಲ್ಲಿ ಆಕೆಯ ಪರೀಕ್ಷೆಗಳನ್ನು ನಡೆಸಲಾಗಿದ್ದು, ಆಕೆಗೆ ಸಮರ್ಪಕವಾಗಿ ಆಹಾರವನ್ನು ನೀಡುವಂತೆ ಮತ್ತು ಮನೋವೈದ್ಯಕೀಯ ಸಮಾಲೋಚನೆ ಪಡೆಯುವಂತೆ ವೈದ್ಯರು ಕುಟುಂಬಕ್ಕೆ ಸಲಹೆ ನೀಡಿದ್ದರು.
ಎರಡು ವಾರಗಳ ಹಿಂದೆ ಆಕೆಯ ರಕ್ತದಲ್ಲಿನ ಸಕ್ಕರೆ ಮಟ್ಟವು ಕಡಿಮೆಯಾಯಿತು, ಜೊತೆಗೆ ಉಸಿರಾಟದ ಸಮಸ್ಯೆಗಳು ಉಂಟಾದವು. ತಕ್ಷಣವೇ ಆಕೆಯನ್ನು ತಲಸ್ಸೆರಿ ಸಹಕಾರಿ ಆಸ್ಪತ್ರೆಗೆ ದಾಖಲಿಸಲಾಗಿತ್ತು ಆದರೆ ಚಿಕಿತ್ಸೆ ಫಲಕಾರಿಯಾಗದೆ ಸಾವಿಗೀಡಾಗಿದ್ದಾಳೆ.
