9 ದೇಶ ದಾಟುತ್ತೆ ಈ ನದಿ ; ಆದರೆ ಇಲ್ಲ ಒಂದೇ ಒಂದು ಸೇತುವೆ !

ವಿಶ್ವದ ಎರಡನೇ ಅತಿದೊಡ್ಡ ನದಿ ಅಮೆಜಾನ್. ಈ ನದಿ ಒಂಬತ್ತು ದೇಶಗಳ ಮೂಲಕ ಹರಿಯುತ್ತದೆ. ಆದರೆ, ಈವರೆಗೆ ಯಾವುದೇ ದೇಶವೂ ಈ ನದಿಗೆ ಸೇತುವೆ ನಿರ್ಮಿಸಲು ಸಾಧ್ಯವಾಗಿಲ್ಲ.

ಅಮೆಜಾನ್ ನದಿಯಲ್ಲಿ ರಿವರ್ ಡಾಲ್ಫಿನ್‌ಗಳು, ವಿದ್ಯುತ್ ಮೀನು ಮತ್ತು ಪಿರಾನ್ಹಾಗಳಂತಹ ಹಲವಾರು ಜೀವಿಗಳು ವಾಸಿಸುತ್ತವೆ. ಈ ನದಿಯು ದಕ್ಷಿಣ ಅಮೆರಿಕಾದ 40 ಪ್ರತಿಶತವನ್ನು ಆವರಿಸುತ್ತದೆ. 3 ಕೋಟಿಗೂ ಹೆಚ್ಚು ಜನರು ಈ ನದಿಯ ಜಲಾನಯನ ಪ್ರದೇಶದಲ್ಲಿ ವಾಸಿಸುತ್ತಾರೆ.

ಸ್ವಿಸ್ ಫೆಡರಲ್ ಇನ್‌ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ (ETH) ಜ್ಯೂರಿಚ್‌ನ ವಾಲ್ಟರ್ ಕೌಫ್‌ಮನ್ ಅವರ ಪ್ರಕಾರ, ಅಮೆಜಾನ್ ನದಿಗೆ ಸೇತುವೆ ಕಟ್ಟುವ ಅಗತ್ಯವಿಲ್ಲ. ಏಕೆಂದರೆ, ನದಿಯ ಸುತ್ತಮುತ್ತಲಿನ ಪ್ರದೇಶದಲ್ಲಿ ಜನಸಂಖ್ಯೆ ಕಡಿಮೆ ಇದೆ. ಅಲ್ಲದೆ, ಇಲ್ಲಿಗೆ ಸಂಪರ್ಕ ಕಲ್ಪಿಸುವ ಪ್ರಮುಖ ರಸ್ತೆಗಳಿಲ್ಲ. ಜನರನ್ನು ಮತ್ತು ಸರಕುಗಳನ್ನು ಸಾಗಿಸಲು ಸಾಕಷ್ಟು ದೋಣಿಗಳು ಲಭ್ಯವಿವೆ.

ಅಮೆಜಾನ್ ನದಿಗೆ ಸೇತುವೆ ಕಟ್ಟಲು ಹಲವಾರು ತಾಂತ್ರಿಕ ಮತ್ತು ಲಾಜಿಸ್ಟಿಕಲ್ ಸವಾಲುಗಳಿವೆ. ಮೃದುವಾದ ಮಣ್ಣು, ಜೌಗು ಪ್ರದೇಶಗಳು ಮತ್ತು ನೀರಿನ ಮಟ್ಟದಲ್ಲಿನ ವ್ಯತ್ಯಾಸದಿಂದ ಸೇತುವೆ ನಿರ್ಮಾಣ ಕಷ್ಟಕರವಾಗಿದೆ.