ಫೆಬ್ರವರಿಯಲ್ಲಿ 1.84 ಲಕ್ಷ ಕೋಟಿ ರೂ. GST ಜಿಎಸ್‌ಟಿ ಸಂಗ್ರಹ

ನವದೆಹಲಿ: ಫೆಬ್ರವರಿಯಲ್ಲಿ ಒಟ್ಟು ಜಿಎಸ್‌ಟಿ ಸಂಗ್ರಹವು ಶೇ. 9.1 ರಷ್ಟು ಏರಿಕೆಯಾಗಿ ಸುಮಾರು 1.84 ಲಕ್ಷ ಕೋಟಿ ರೂ.ಗೆ ತಲುಪಿದೆ ಎಂದು ಅಧಿಕೃತ ಅಂಕಿ ಅಂಶಗಳು ತಿಳಿಸಿವೆ.

ಒಟ್ಟು ಸರಕು ಮತ್ತು ಸೇವಾ ತೆರಿಗೆ(ಜಿಎಸ್‌ಟಿ) ಆದಾಯವು ಫೆಬ್ರವರಿಯಲ್ಲಿ ದೇಶೀಯ ಆದಾಯದಲ್ಲಿ ಶೇ. 10.2 ರಷ್ಟು ಏರಿಕೆಯಾಗಿ 1.42 ಲಕ್ಷ ಕೋಟಿ ರೂ.ಗಳಿಗೆ ತಲುಪಿದೆ. ಆಮದುಗಳಿಂದ ಬರುವ ಆದಾಯದಲ್ಲಿ ಶೇ. 5.4 ರಷ್ಟು ಏರಿಕೆಯಾಗಿ 41,702 ಕೋಟಿ ರೂ.ಗಳಿಗೆ ತಲುಪಿದೆ.

ಅಂಕಿ ಅಂಶಗಳ ಪ್ರಕಾರ, ಈ ತಿಂಗಳಲ್ಲಿ, ಕೇಂದ್ರ ಜಿಎಸ್‌ಟಿಯಿಂದ ಸಂಗ್ರಹವಾದ ಮೊತ್ತವು 35,204 ಕೋಟಿ ರೂ., ರಾಜ್ಯ ಜಿಎಸ್‌ಟಿ 43,704 ಕೋಟಿ ರೂ., ಸಮಗ್ರ ಜಿಎಸ್‌ಟಿ 90,870 ಕೋಟಿ ರೂ. ಮತ್ತು ಪರಿಹಾರ ಸೆಸ್ 13,868 ಕೋಟಿ ರೂ.ಗಳಿಗೆ ತಲುಪಿದೆ.

ಫೆಬ್ರವರಿಯಲ್ಲಿ ನೀಡಲಾದ ಒಟ್ಟು ಮರುಪಾವತಿಗಳು  20,889 ಕೋಟಿ ರೂ.ಗಳಾಗಿದ್ದು, ಇದು ಹಿಂದಿನ ವರ್ಷಕ್ಕಿಂತ ಶೇ. 17.3 ರಷ್ಟು ಹೆಚ್ಚಾಗಿದೆ. ಫೆಬ್ರವರಿ 2025 ರಲ್ಲಿ ನಿವ್ವಳ ಜಿಎಸ್ಟಿ ಸಂಗ್ರಹವು ಶೇ 8.1 ರಷ್ಟು ಹೆಚ್ಚಾಗಿ ಸುಮಾರು 1.63 ಲಕ್ಷ ಕೋಟಿ ರೂ.ಗಳಿಗೆ ತಲುಪಿದೆ.

ಫೆಬ್ರವರಿ 2024 ರಲ್ಲಿ ಒಟ್ಟು ಮತ್ತು ನಿವ್ವಳ ಜಿಎಸ್ಟಿ ಆದಾಯ ಕ್ರಮವಾಗಿ 1.68 ಲಕ್ಷ ಕೋಟಿ ರೂ. ಮತ್ತು 1.50 ಲಕ್ಷ ಕೋಟಿ ರೂ.ಗಳಷ್ಟಿತ್ತು.