ಭಾರತದ ಸುರಕ್ಷಿತ ಮೆಟ್ರೋ ನಗರಗಳಲ್ಲಿ ಒಂದೆಂದು ಪರಿಗಣಿಸಲ್ಪಟ್ಟ ಬೆಂಗಳೂರು, ಇತ್ತೀಚೆಗೆ ಯುವತಿಯೊಬ್ಬಳ ಭಯಾನಕ ಓಲಾ ಕ್ಯಾಬ್ ಪಯಣದಿಂದ ಸುದ್ದಿಯಲ್ಲಿದೆ. ವಿಮಾನ ನಿಲ್ದಾಣದಿಂದ ರಾತ್ರಿ 11 ಗಂಟೆಗೆ ಪ್ರಯಾಣಿಸುತ್ತಿದ್ದ ಶ್ರಾವಿಕಾ ಜೈನ್ ಎಂಬ ಯುವತಿ, ತಮ್ಮ ಚಾಲಕನ ಅನುಚಿತ ವರ್ತನೆಯಿಂದ ತೀವ್ರ ಆತಂಕಕ್ಕೆ ಒಳಗಾದ ಅನುಭವವನ್ನು ಎಕ್ಸ್ (ಹಿಂದೆ ಟ್ವಿಟರ್) ನಲ್ಲಿ ವಿವರವಾಗಿ ಹಂಚಿಕೊಂಡಿದ್ದಾರೆ.
“ಬೆಂಗಳೂರು ಸುರಕ್ಷಿತ ಎಂದು ಜನರು ಹೇಳುತ್ತಾರೆ? ನಿನ್ನೆ ರಾತ್ರಿ ವಿಮಾನ ನಿಲ್ದಾಣದಿಂದ ಕ್ಯಾಬ್‌ನಲ್ಲಿ ಬಂದದ್ದು ನನ್ನ ಜೀವನದ ಅತ್ಯಂತ ಭಯಾನಕ ಅನುಭವಗಳಲ್ಲಿ ಒಂದು,” ಎಂದು ಶ್ರಾವಿಕಾ ಜೈನ್ ಪೋಸ್ಟ್ ಮಾಡಿದ್ದಾರೆ. ಅವರ ಸಂದೇಶವು ವೈರಲ್ ಆಗಿದ್ದು, ವ್ಯಾಪಕ ಗಮನ ಮತ್ತು ಕಾಳಜಿಯನ್ನು ಸೆಳೆದಿದೆ.
ಶ್ರಾವಿಕಾ ಜೈನ್ ವಿವರಿಸಿದಂತೆ, ಪ್ರಯಾಣ ಪ್ರಾರಂಭವಾದ ಕೂಡಲೇ ಚಾಲಕ ಅವರನ್ನು ಅಹಿತಕರವಾಗಿ ನೋಡಲು ಪ್ರಾರಂಭಿಸಿದ್ದಾನೆ. ಅವನು ಕನ್ನಡ ಅರ್ಥವಾಗುತ್ತದೆಯೇ ಎಂದು ಕೇಳಿದಾಗ, ಉತ್ತರಿಸಿದ ನಂತರ, ಅವನು ಯೂಟ್ಯೂಬ್‌ನಲ್ಲಿ ಜೋರಾಗಿ ಸಂಗೀತ ಹಾಕಿ ಜೋರಾಗಿ ಹಾಡಲು ಮತ್ತು ಸೂಚ್ಯವಾಗಿ ತನ್ನ ತೊಡೆಗಳನ್ನು ತಟ್ಟಲು ಪ್ರಾರಂಭಿಸಿದಾಗ ಪರಿಸ್ಥಿತಿ ಇನ್ನಷ್ಟು ಭಯಾನಕವಾಯಿತು ಎಂದಿದ್ದಾರೆ.
ಧ್ವನಿಯನ್ನು ಕಡಿಮೆ ಮಾಡಲು ಪದೇ ಪದೇ ಒತ್ತಾಯಿಸಿದರೂ, ಚಾಲಕ ಅಸಮಾಧಾನಕರ ನೋಟದಿಂದ ಪ್ರತಿಕ್ರಿಯಿಸಿದ್ದಲ್ಲದೇ ಜೊತೆಗೆ ಪ್ರತಿಭಟನೆಯನ್ನು ಲೆಕ್ಕಿಸದೆ ಕಾರಿನಲ್ಲಿ ಸಿಗರೇಟ್ ಸೇದಿದಾಗ ಪರಿಸ್ಥಿತಿ ಇನ್ನಷ್ಟು ಹದಗೆಟ್ಟಿದೆ.
“ನಾನು ಒಂಟಿಯಾಗಿದ್ದೆ, ರಾತ್ರಿಯಾಗಿತ್ತು ಮತ್ತು ನನ್ನ ಮೂವರು ಪುರುಷ ಸ್ನೇಹಿತರು ಕರೆ ಮಾಡಿ ನನ್ನ ಸ್ಥಳವನ್ನು ಟ್ರ್ಯಾಕ್ ಮಾಡುತ್ತಿದ್ದರು,” ಎಂದು ಅವರು ಪೋಸ್ಟ್ ಮಾಡಿದ್ದಾರೆ, ಪ್ರಯಾಣದ ಸಮಯದಲ್ಲಿ ಅನುಭವಿಸಿದ ಭಯವನ್ನು ಎತ್ತಿ ತೋರಿಸಿದ್ದಾರೆ.
ಚಾಲಕ ರಸ್ತೆಯ ಮಧ್ಯದಲ್ಲಿ ಕಾರನ್ನು ನಿಲ್ಲಿಸಿ ತಾನು ಟೀ ಕುಡಿಯಲು ಬಯಸುವುದಾಗಿ ಹೇಳಿದ ಒಂದು ಭಯಾನಕ ಘಟನೆಯನ್ನು ಅವರು ಉಲ್ಲೇಖಿಸಿದ್ದಾರೆ. ಮೊದಲು ಮನೆಗೆ ಕರೆದೊಯ್ಯುವಂತೆ ವಿನಂತಿಸಿದರೂ, ಚಾಲಕ ಹೊರಗೆ ಹೋಗಿ ಸುಮಾರು 10 ನಿಮಿಷಗಳ ನಂತರ ಹಿಂತಿರುಗಿದ ಅಲ್ಲದೇ ಪ್ರಯಾಣದ ಉಳಿದ ಭಾಗದಲ್ಲಿ ಅವನು ತನ್ನನ್ನು ಅನುಚಿತವಾಗಿ ನೋಡುತ್ತಲೇ ಇದ್ದನು ಎಂದಿದ್ದಾರೆ.
“ನಾನು ಭಯಭೀತಳಾಗಿದ್ದೆ ಮತ್ತು ಸುರಕ್ಷಿತವಾಗಿ ಮನೆ ತಲುಪಬೇಕೆಂದು ಪ್ರಾರ್ಥಿಸುತ್ತಿದ್ದೆ,” ಎಂದು ಅವರು ಹೇಳಿದ್ದು, ಅದೃಷ್ಟವಶಾತ್, ಯಾವುದೇ ಅಹಿತಕರ ಘಟನೆ ಸಂಭವಿಸದೆ ಮನೆಗೆ ಮರಳಿದ್ದಾರೆ.
ಪೋಸ್ಟ್ ವೈರಲ್ ಆದ ನಂತರ, ಬೆಂಗಳೂರು ಸಂಚಾರ ಪೊಲೀಸರು ಪ್ರತಿಕ್ರಿಯಿಸಿ, ತನಿಖೆ ಪ್ರಾರಂಭಿಸಲು ನೇರ ಸಂದೇಶದ ಮೂಲಕ ತಮ್ಮ ಸಂಪರ್ಕ ವಿವರಗಳನ್ನು ನೀಡುವಂತೆ ಶ್ರಾವಿಕಾ ಜೈನ್ ಅವರನ್ನು ವಿನಂತಿಸಿದ್ದಾರೆ.
ಈ ಘಟನೆ ಅಂತರ್ಜಾಲದಲ್ಲಿ ವ್ಯಾಪಕ ಆಕ್ರೋಶಕ್ಕೆ ಕಾರಣವಾಗಿದೆ. ಒಬ್ಬ ಬಳಕೆದಾರರು, “ಇದಕ್ಕಾಗಿ ತುಂಬಾ ವಿಷಾದಿಸುತ್ತೇನೆ. ಈ ರೀತಿ ವರ್ತಿಸುವ ಉದ್ಯೋಗಿಗಳನ್ನು ಹೊಂದಿರುವ ಪ್ರತಿಯೊಂದು ಕಂಪನಿಯು ಅವರಿಗೆ ಲೈಂಗಿಕ ಶಿಕ್ಷಣ, ಕೆಟ್ಟ ಸ್ಪರ್ಶ, ಒಳ್ಳೆಯ ಸ್ಪರ್ಶ ಮತ್ತು ಇತರರನ್ನು ಹೇಗೆ ನೋಡಿಕೊಳ್ಳಬೇಕು ಮತ್ತು ಏನಾದರೂ ಮಾಡಿದರೆ ಶಿಕ್ಷೆಗಳ ಬಗ್ಗೆ ಕಡ್ಡಾಯವಾಗಿ ಕಲಿಸಬೇಕು ಎಂದು ನಾನು ನಂಬುತ್ತೇನೆ,” ಎಂದು ಬರೆದಿದ್ದಾರೆ.
Loading ...
