ಟರ್ಕಿ ಅಧ್ಯಕ್ಷ ರೆಸೆಪ್ ತಯ್ಯಿಪ್ ಎರ್ಡೋಗನ್ ಅವರ ಪುತ್ರಿ ಸುಮಯ್ಯ ಬೇಯ್‌ರಕ್ತಾರ್ ಅವರು ಅಂಕಾರಾದ ಪಾಕಿಸ್ತಾನಕ್ಕೆ ನೀಡುತ್ತಿರುವ ಬಹಿರಂಗ ಬೆಂಬಲದ ಬೆಲೆಯನ್ನು ತೆರಬೇಕಾಗಿದೆ. 39 ವರ್ಷದ ಉದ್ಯಮಿಯಾಗಿರುವ ಸುಮಯ್ಯ ಬೇಯ್‌ರಕ್ತಾರ್ ಅವರು ಸೆಲೆಬಿ ಏವಿಯೇಷನ್‌ನ ಮಾಲೀಕರಲ್ಲಿ ಒಬ್ಬರು. ಈ ಕಂಪನಿಯು ಭಾರತದ ಒಂಬತ್ತು ವಿಮಾನ ನಿಲ್ದಾಣಗಳಲ್ಲಿ – ದೆಹಲಿ, ಮುಂಬೈ, ಬೆಂಗಳೂರು, ಹೈದರಾಬಾದ್, ಚೆನ್ನೈ, ಅಹಮದಾಬಾದ್, ಗೋವಾ, ಕೊಚ್ಚಿನ್ ಮತ್ತು ಕಾನ್ಪುರ್ – ಭದ್ರತಾ ಸೂಕ್ಷ್ಮ ನೆಲ ನಿರ್ವಹಣಾ ಕಾರ್ಯಗಳನ್ನು ನಿರ್ವಹಿಸುತ್ತಿದೆ. ಇದೀಗ ಬ್ಯೂರೋ ಆಫ್ ಸಿವಿಲ್ ಏವಿಯೇಷನ್ ಸೆಕ್ಯುರಿಟಿ (BCAS) ಸೆಲೆಬಿ ಏರ್‌ಪೋರ್ಟ್ ಸರ್ವೀಸಸ್ ಇಂಡಿಯಾ ಲಿಮಿಟೆಡ್‌ನ ಭದ್ರತಾ ಅನುಮತಿಯನ್ನು ರದ್ದುಗೊಳಿಸಿದೆ.
ಮಾಧ್ಯಮ ವರದಿಗಳ ಪ್ರಕಾರ, BCAS ಜಂಟಿ ನಿರ್ದೇಶಕ (ಕಾರ್ಯಾಚರಣೆ) ಸುನಿಲ್ ಯಾದವ್ ಅವರು ಬುಧವಾರದಿಂದ ತಕ್ಷಣವೇ ಜಾರಿಗೆ ಬರುವಂತೆ ಕಂಪನಿಗೆ ನೀಡಲಾಗಿದ್ದ ಭದ್ರತಾ ಅನುಮತಿಯನ್ನು ಹಿಂಪಡೆದಿದ್ದಾರೆ. ಸೆಲೆಬಿ ಕಂಪನಿಯು ಪ್ರಯಾಣಿಕರ ಸೇವೆಗಳು, ಲೋಡ್ ಕಂಟ್ರೋಲ್ ಮತ್ತು ಫ್ಲೈಟ್ ಆಪರೇಷನ್, ರಾಂಪ್ ಸೇವೆಗಳು ಮತ್ತು ಸಾಮಾನ್ಯ ವಿಮಾನಯಾನ ಸೇವೆಗಳನ್ನು ನಿರ್ವಹಿಸುತ್ತದೆ.
ಸೆಲೆಬಿ ತನ್ನ ಅಧಿಕೃತ ವೆಬ್‌ಸೈಟ್‌ನಲ್ಲಿ, “ಭಾರತದಲ್ಲಿ ಸೆಲೆಬಿಯ ಉಪಸ್ಥಿತಿಯು ಮೂರು ವಿಭಿನ್ನ ಘಟಕಗಳೊಂದಿಗೆ ಗಣನೀಯವಾಗಿ ಬೆಳೆದಿದೆ. ಮುಂಬೈ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಸಮಗ್ರ ಮತ್ತು ವಿಶ್ವ ದರ್ಜೆಯ ಸೇವೆಗಳನ್ನು ಒದಗಿಸುವ ಉದ್ದೇಶದಿಂದ ಸ್ಥಾಪಿಸಲಾದ ಜಂಟಿ ಉದ್ಯಮದೊಂದಿಗೆ ಸೆಲೆಬಿಯ ಭಾರತದ ಮೊದಲ ಹೆಜ್ಜೆ ಪ್ರಾರಂಭವಾಯಿತು. ಒಂದು ವರ್ಷದೊಳಗೆ, ಸೆಲೆಬಿಯನ್ನು ಭಾರತದಲ್ಲಿ ನೆಲ ನಿರ್ವಹಣೆ ಸೇವೆಗಳನ್ನು ಒದಗಿಸಲು ಸೆಲೆಬಿ ಏರ್‌ಪೋರ್ಟ್ ಸರ್ವೀಸಸ್ ಇಂಡಿಯಾ ಮತ್ತು ದೆಹಲಿ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಸರಕು ಸೇವೆಗಳನ್ನು ಒದಗಿಸಲು ಸೆಲೆಬಿ ದೆಹಲಿ ಕಾರ್ಗೋ ಟರ್ಮಿನಲ್ ಮ್ಯಾನೇಜ್‌ಮೆಂಟ್ ಇಂಡಿಯಾ ಎಂದು ನೋಂದಾಯಿಸಲಾಯಿತು” ಎಂದು ಹೇಳಿದೆ. ಕಳೆದ 10 ವರ್ಷಗಳಲ್ಲಿ, ಈ ಎರಡು ನಿಲ್ದಾಣಗಳು ಮುಂಬೈ, ದೆಹಲಿ, ಕೊಚ್ಚಿನ್, ಕಣ್ಣೂರು, ಬೆಂಗಳೂರು, ಹೈದರಾಬಾದ್, ಗೋವಾ ಮತ್ತು ಅಹಮದಾಬಾದ್ ಹಾಗೂ ಚೆನ್ನೈ ಸೇರಿದಂತೆ ಒಟ್ಟು ಒಂಬತ್ತು ನಿಲ್ದಾಣಗಳಾಗಿ ಬೆಳೆದಿವೆ ಎಂದು ಅದು ತಿಳಿಸಿದೆ.
ಎರ್ಡೋಗನ್ ಅವರ ಪುತ್ರಿ, ಟರ್ಕಿ ಉದ್ಯಮಿ ಓಜ್ಡೆಮಿರ್ ಬೇಯ್‌ರಕ್ತಾರ್ ಅವರ ಪುತ್ರ ಸೆಲ್ಕುಕ್ ಬೇಯ್‌ರಕ್ತಾರ್ ಅವರನ್ನು ವಿವಾಹವಾಗಿದ್ದಾರೆ. ಸೆಲ್ಕುಕ್ ಬೇಯ್‌ರಕ್ತಾರ್ ಅವರು ಬೇಯ್‌ರಕ್ತಾರ್ ಡಿಫೆನ್ಸ್‌ನ ಮಾಲೀಕರಾಗಿದ್ದು, ಈ ಕಂಪನಿಯು ಬೇಯ್‌ರಕ್ತಾರ್ ಅಕಿನ್ಸಿ ಡ್ರೋನ್ ಅನ್ನು ತಯಾರಿಸುತ್ತದೆ. ಈ ಡ್ರೋನ್ ಅನ್ನು ಪಾಕಿಸ್ತಾನಕ್ಕೆ ಸರಬರಾಜು ಮಾಡಲಾಗಿತ್ತು. ಪಾಕಿಸ್ತಾನ ವಾಯುಸೇನೆಯು ಎರಡು ದಿನಗಳಲ್ಲಿ ಭಾರತದ ಪ್ರಮುಖ ವಾಯುನೆಲೆಗಳ ಮೇಲೆ 500 ಕ್ಕೂ ಹೆಚ್ಚು ಬೇಯ್‌ರಕ್ತಾರ್ ಡ್ರೋನ್‌ಗಳನ್ನು ಹಾರಿಸಿತ್ತು. ಈ ಎಲ್ಲಾ ಡ್ರೋನ್‌ಗಳನ್ನು ಹೊಡೆದುರುಳಿಸಲಾಗಿದ್ದರೂ, ಇದು ಟರ್ಕಿ-ಪಾಕಿಸ್ತಾನ ನಂಟನ್ನು ಬಹಿರಂಗಪಡಿಸಿದೆ. ಅಲ್ಲದೆ, ರೆಸೆಪ್ ತಯ್ಯಿಪ್ ಎರ್ಡೋಗನ್ ಮತ್ತು ಅವರ ಕುಟುಂಬ ಸದಸ್ಯರು ರಕ್ಷಣಾ ಒಪ್ಪಂದಗಳಿಂದ ಹೇಗೆ ಲಾಭ ಪಡೆದರು ಎಂಬುದನ್ನು ಇದು ತೋರಿಸಿದೆ.
Loading ...
