ವಾಯುಮಾಲಿನ್ಯ ತಡೆಯಲು ಇವಿಗಳ ಬಳಕೆಗೆ ಇಡೀ ವಿಶ್ವವೇ ಮುಂದಾಗ್ತಿದೆ. ಆದರೆ ಆಟೋಮೊಬೈಲ್ಸ್ ಬಗ್ಗೆ ವಿಶೇಷ ಆಸಕ್ತಿ ಹೊಂದಿರುವ ಮಹೇಂದ್ರ ಸಿಂಗ್ ಧೋನಿ ವಾಯುಮಾಲಿನ್ಯ ತಡೆಗೆ ಇಲೆಕ್ಟ್ರಿಕ್ ವಾಹನಗಳ ಬಳಕೆ ಪರಿಹಾರವಲ್ಲ ಎಂದಿದ್ದಾರೆ.
ವಾಯುಮಾಲಿನ್ಯ ಮತ್ತು ಇಂಗಾಲ ಹೊರಸೂಸುವಿಕೆಯನ್ನು ತಡೆಯಲು ಇವಿಗಳು ಪರಿಹಾರವಲ್ಲ ಎಂದು ಎಂ.ಎಸ್. ಧೋನಿ ಭಾವಿಸಿದ್ದಾರೆ. ಧೋನಿ ಅವರು ಆಟೋಮೊಬೈಲ್‌ಗಳ ಬಗ್ಗೆ ಸಹಜವಾದ ಉತ್ಸಾಹ ಮತ್ತು ಆಸಕ್ತಿಗೆ ಹೆಸರುವಾಸಿಯಾಗಿದ್ದಾರೆ.
ವಾಸ್ತವವಾಗಿ ಅವರ ಗ್ಯಾರೇಜ್‌ ನಲ್ಲಿ ವಿಂಟೇಜ್ ಕಾರುಗಳು ಮತ್ತು ಮೋಟಾರ್‌ ಸೈಕಲ್‌ಗಳಿಗೆ ವಿಶೇಷ ಸ್ಥಾನವಿದೆ. ಅವರ ಕಾರು ಸಂಗ್ರಹಣೆಯಲ್ಲಿ ಹಲವಾರು ದುಬಾರಿ ವಾಹನಗಳಿವೆ.
ಇತ್ತೀಚಿನ ಸಂದರ್ಶನವೊಂದರಲ್ಲಿ ಅವರು ಆಟೋಮೊಬೈಲ್ ಉದ್ಯಮದ ಭವಿಷ್ಯದ ಬಗ್ಗೆ ಮಾತನಾಡಿದ್ದಾರೆ. ಇದರಲ್ಲಿ ಎಲೆಕ್ಟ್ರಿಕ್ ವಾಹನಗಳು ಮುಖ್ಯವಲ್ಲ ಆದರೆ EV ಗಳಿಗೆ ಶಕ್ತಿ ನೀಡಲು ವಿದ್ಯುತ್ ಎಲ್ಲಿಂದ ಬರುತ್ತದೆ ಎಂಬುದನ್ನ ಉಲ್ಲೇಖಿಸಿದ್ದಾರೆ. ನವೀಕರಿಸಲಾಗದ ಶಕ್ತಿಯ ಮೂಲಗಳನ್ನು ಬಳಸಿಕೊಂಡು ವಿದ್ಯುತ್ ಉತ್ಪಾದಿಸಿದರೆ, ನಾವು ಕಾರುಗಳನ್ನು ವಿದ್ಯುದ್ದೀಕರಿಸುವ ಮೂಲಕ ಏನನ್ನೂ ಸಾಧಿಸುವುದಿಲ್ಲ ಎಂದು ಹೇಳಿದ್ದಾರೆ.
ನಾವು ವಿದ್ಯುತ್ ಉತ್ಪಾದಿಸುವ ನವೀಕರಿಸಬಹುದಾದ ಮೂಲಗಳನ್ನು ಅಭಿವೃದ್ಧಿಪಡಿಸುವತ್ತ ಗಮನಹರಿಸಿದರೆ, ಅದು ನಿಜವಾದ ಪರಿಹಾರವಾಗಿರುತ್ತದೆ. ನಾವು ಇನ್ನೂ ವಿದ್ಯುತ್ ಉತ್ಪಾದಿಸಲು ಕಲ್ಲಿದ್ದಲನ್ನು ಬಳಸುತ್ತಿದ್ದರೆ ಮತ್ತು ಅದರಿಂದ ಇವಿಗಳನ್ನು ಚಾರ್ಜ್ ಮಾಡುತ್ತಿದ್ದರೆ, ಪರಿಸರದ ಮೇಲೆ ನಿಜವಾದ ಧನಾತ್ಮಕ ಪರಿಣಾಮವು ಗಮನಾರ್ಹವಾಗಿಲ್ಲ ಎಂದಿದ್ದಾರೆ.
Loading ...
