ಕಾರ್ಡ್ ಇಲ್ಲದೆ ಎಟಿಎಂನಿಂದ ಕ್ಯಾಶ್ ಡ್ರಾ ಮಾಡೋದು ಹೇಗೆ..? ಇಲ್ಲಿದೆ ಡಿಟೇಲ್ಸ್

ಹಬ್ಬದ ಶಾಪಿಂಗ್‌ನ ಮೂಡ್‌ನಲ್ಲಿ ನೀವು ನಿಮ್ಮ ಬ್ಯಾಂಕ್ ಡೆಬಿಟ್ ಕಾರ್ಡ್‌ಗಳನ್ನು ಮನೆಯಲ್ಲಿಯೇ ಬಿಟ್ಟು ಬಂದಿದ್ದೀರಾ..? ತಲೆ ಕೆಡಿಸಿಕೊಳ್ಳಬೇಡಿ. ನಿಮ್ಮ ಡೆಬಿಟ್ ಕಾರ್ಡ್ ಬಳಸದೆಯೇ ಎಟಿಎಂನಿಂದ ಹಣವನ್ನು ಡ್ರಾ ಮಾಡಬಹುದು.

ಸಾಮಾನ್ಯವಾಗಿ ನಾವು ಎಟಿಎಂ ಕೇಂದ್ರಗಳಲ್ಲಿರುವ ಮೆಷಿನ್‌‌ನ ಕಾರ್ಡ್ ಸ್ಲಾಟ್‌ನಲ್ಲಿ ಡೆಬಿಟ್ ಕಾರ್ಡ್ ಹಾಕ್ತೇವೆ. ಬಳಿಕ 4 ಸಂಖ್ಯೆಯ ಸಿಕ್ರೇಟ್ ಪಿನ್ ಒತ್ತಿ, ಡ್ರಾ ಮಾಡಬೇಕಾದ ಹಣದ ಮೊತ್ತವನ್ನು ಎಂಟ್ರಿ ಮಾಡಿ ಎಟಿಎಂನಿಂದ ಹಣವನ್ನು ಪಡೆಯುತ್ತೇವೆ.

ಆದ್ರೆ ಡೆಬಿಟ್ ಕಾರ್ಡ್‌ ತರೋದು ಮರೆತಾಗ ಅಥವಾ ಮೆಡಿಕಲ್ ಎಮರ್ಜೆನ್ಸಿ ಸಂದರ್ಭದಲ್ಲಿ ಕಾರ್ಡ್ ಇಲ್ಲದೆಯೇ ಹಣ ಪಡೆಯಬಹುದು. ಎಟಿಎಂನಿಂದ ಹಣವನ್ನು ಡ್ರಾ ಮಾಡೋದಕ್ಕೆ ಮೂರನೇ ವ್ಯಕ್ತಿಯನ್ನು ಕಳುಹಿಸಿದಾಗ ನೀವು ನಿಮ್ಮ ಕಾರ್ಡ್ ಅನ್ನು ಕೊಡಬೇಕಾಗಿಲ್ಲ ಅಥವಾ ಪರ್ಸನಲ್ ಪಿನ್ ಅನ್ನು ಸಹ ಬಹಿರಂಗಪಡಿಸಬೇಕಾಗಿಲ್ಲ.

ಕಾರ್ಡ್‌ಲೆಸ್ ಕ್ಯಾಶ್ ವಿಥ್ ಡ್ರಾ ಎಂಬ ಆಯ್ಕೆಯ ಮೂಲಕ ನೀವು ಒಂದು ಬಾರಿ ಜನರೇಟ್ ಆಗುವ ಪಿನ್ ಬಳಸಿ ಎಟಿಎಂನಲ್ಲಿ ಹಣ ಡ್ರಾ ಮಾಡಲು ಯಾರನ್ನು ಬೇಕಾದರು ಕಳುಹಿಸಬಹುದು. ಆದ್ರೆ ಇದನ್ನು ಮಾಡಲು UPI ಅನ್ನು ಬಳಸಲು ಆಯ್ಕೆ ಇರುವ ಬ್ಯಾಂಕ್‌ನ ಮೊಬೈಲ್ ಅಪ್ಲಿಕೇಶನ್‌ ಜೊತೆ ಮೊಬೈಲ್ ಫೋನ್ ಸಹ ಬೇಕಾಗುತ್ತೆ.

ಬ್ಯಾಂಕ್ ಖಾತೆ ಹೊಂದಿರುವ ಹಲವು ಮಂದಿ ಸಾಂಕ್ರಾಮಿಕ ರೋಗ ಹರಡುತ್ತಿರುವ ಸಂದರ್ಭದಲ್ಲಿ ಸೋಂಕಾಗದಂತೆ ತಪ್ಪಿಸಲು ಯಾರಿಗಾದರೂ 100 ರಿಂದ 25,000 ರೂಪಾಯಿಗಳ ನಗದು ಹಸ್ತಾಂತರಿಸುವುದಕ್ಕೆ ಇದೇ ಆಯ್ಕೆಯನ್ನು ಬಳಸಿದ್ದರು. ಯಾಕಂದ್ರೆ ಈ ಸೌಲಭ್ಯದಲ್ಲಿ ಬ್ಯಾಂಕ್ ಖಾತೆದಾರರಲ್ಲದವರೂ ಸಹ ನೀವು ಬಳಕೆ ಮಾಡುವ ಈ ಕಾರ್ಡ್‌ಲೆಸ್ ಸೌಲಭ್ಯದ ಮೂಲಕ ಹಣವನ್ನು ಡ್ರಾ ಮಾಡಿಕೊಳ್ಳಬಹುದು.

ಈ ಸೌಲಭ್ಯ ಬಳಸುವ ಮೂಲಕ ನಿಮ್ಮ ಕಾರ್ಡ್ ಡೇಟಾ ಕಳವಾಗುತ್ತೆ ಎಂದು ಚಿಂತಿಸಬೇಕಾಗಿಲ್ಲ. ಇದರ ಜೊತೆ ಎಟಿಎಂನಲ್ಲಿ ವಂಚಕರು ಅಳವಡಿಸುವ ಸಿಕ್ರೇಟ್ ಕ್ಯಾಮಾರಗಳ ಮೂಲಕ ಪಿನ್ ಕಳವಾಗುತ್ತೆ ಎಂಬ ಭಯವು ಪಡಬೇಕಾಗಿಲ್ಲ.

ರಿಜಿಸ್ಟ್ರಡ್ ಫೋನ್ ನಂಬರ್, ಮೊಬೈಲ್ ಅಪ್ಲಿಕೇಶನ್ ಪಾಸ್‌ವರ್ಡ್ ಮತ್ತು ತಾತ್ಕಾಲಿಕ ಪಿನ್ ಈಗೇ ಮೂರು ಆಯ್ಕೆ ಬಳಸಿಕೊಂಡು ಕಾರ್ಡ್‌ಲೆಸ್ ಕ್ಯಾಶ್ ವಿಥ್‌ಡ್ರಾ ಮಾಡುವಾಗ ವಂಚನೆಯಾಗದಂತೆ ಮುಂಜಾಗ್ರತೆ ವಹಿಸಿಕೊಳ್ಳಬಹುದು. ದೊಡ್ಡ ಮಟ್ಟದ ವಂಚನೆಯಾಗದಂತೆ ತಡೆಯಲು ಕಾರ್ಡ್‌ರಹಿತ ಕ್ಯಾಶ್ ವಿಥ್ ಡ್ರಾ ಸೌಲಭ್ಯದಲ್ಲಿ ಬ್ಯಾಂಕ್‌ಗಳು ದಿನವೊಂದಕ್ಕೆ 10,000 ದಿಂದ 25,000 ರೂಪಾಯಿಗಳವರೆಗೆ ಮಾತ್ರ ಟ್ರಾನ್ಸಕ್ಷನ್ ಲಿಮಿಟ್ ನಿಗದಿಪಡಿಸಿವೆ.

ಕಾರ್ಡ್‌ ಇಲ್ಲದೇ ಹಣ ಡ್ರಾ ಮಾಡೋದು ಹೇಗೆ ?

ವಿಧಾನ 1: ಮೊಬೈಲ್ ಬಳಸಿ ಮಾಹಿತಿಯನ್ನು ನಮೂದಿಸಿ (ಕೆಲವು ಬ್ಯಾಂಕ್‌ಗಳಲ್ಲಿ ನೆಟ್‌ಬ್ಯಾಂಕಿಂಗ್) ಅಥವಾ

ವಿಧಾನ 2: ATM ನಲ್ಲಿಯೇ ವಿವರಗಳನ್ನು ಭರ್ತಿ ಮಾಡಿ ಮತ್ತು ATM ನಲ್ಲಿ QR ಕೋಡ್ ಸ್ಕ್ಯಾನಿಂಗ್ ಸೌಲಭ್ಯವನ್ನು ಬಳಸಿಕೊಂಡು.

ಮೊದಲ ವಿಧಾನದಲ್ಲಿ, ನೀವು ಮೊಬೈಲ್ ಅಪ್ಲಿಕೇಶನ್ ಅಥವಾ ನೆಟ್ ಬ್ಯಾಂಕಿಂಗ್‌ಗೆ ಲಾಗ್ ಇನ್ ಮಾಡಿ ನಿಮ್ಮ ಪಾಸ್‌ವರ್ಡ್‌ನ್ನು ಎಂಟ್ರಿ ಮಾಡಬೇಕು. ಸರ್ವಿಸ್ ಆಫ್ಶನ್ ಇರುವಲ್ಲಿ ಎಟಿಎಂ ಆಯ್ಕೆಯನ್ನು ಆಯ್ಕೆಮಾಡಿ ಮತ್ತು ‘ಕಾರ್ಡ್‌ಲೆಸ್ ನಗದು ಹಿಂಪಡೆಯುವಿಕೆ’ ವಹಿವಾಟನ್ನು ಆಯ್ಕೆಮಾಡಿ. ‌

ಒಮ್ಮೆ ನೀವು ಕಾರ್ಡ್‌ಲೆಸ್ ನಗದು ಹಿಂಪಡೆಯುವಿಕೆ ಪೇಜ್‌ನಲ್ಲಿದ್ದರೆ, ನೀವು ಡ್ರಾ ಮಾಡಲು ಬಯಸುವ ಮೊತ್ತವನ್ನು ಎಂಟ್ರಿ ಮಾಡಿ. ಈ ಹಂತದಲ್ಲಿ ವಹಿವಾಟಿನ ಸಂಖ್ಯೆ ಜೊತೆ ನಿಮ್ಮ ನೋಂದಾಯಿತ ಮೊಬೈಲ್‌ ನಂಬರ್‌ಗೆ ತಾತ್ಕಾಲಿಕ ಪಿನ್ ಅನ್ನು ಬರುತ್ತೆ. ಇದಾದ ಬಳಿಕ ಎಟಿಎಂಗೆ ಹೋಗಿ ಮತ್ತು ‘ಕಾರ್ಡ್‌ಲೆಸ್ ವಿತ್‌ಡ್ರಾವಲ್’ ಅಥವಾ ‘ಕಾರ್ಡ್‌ಲೆಸ್ ಕ್ಯಾಶ್’ ಆಯ್ಕೆಯನ್ನು ಆರಿಸಿ. ಆಯ್ಕೆಯ ನಂತರ, ನೀವು ಹಿಂಪಡೆಯಲು ಬಯಸುವ ಮೊತ್ತದ ಜೊತೆಗೆ ಮೊಬೈಲ್ ಸಂಖ್ಯೆ, 9-ಅಂಕಿಯ ಉಲ್ಲೇಖ ಸಂಖ್ಯೆ ಮತ್ತು ತಾತ್ಕಾಲಿಕ ಪಿನ್ ಎಂಬ ನಾಲ್ಕು ವಿವರಗಳನ್ನು ನಿಮ್ಮ ಬಳಿ ಕೇಳುತ್ತೆ.

ನೀವು ATM ಕೇಂದ್ರದಲ್ಲಿದ್ದರೆ ಮತ್ತು ಕಾರ್ಡ್ ರಹಿತ ನಗದು ಹಿಂಪಡೆಯುವಿಕೆಯನ್ನು ಮಾಡಲು ಬಯಸಿದರೆ, ಕಾರ್ಡ್‌ಲೆಸ್ ವಿತ್ ಡ್ರಾವಲ್ ಆಯ್ಕೆ ಮಾಡಿ. ಮುಂದೆ, ಮೊತ್ತವನ್ನು ನಮೂದಿಸಿ ಮತ್ತು ನಿಮ್ಮ ಫೋನ್‌ನಲ್ಲಿ ನಿಮ್ಮ ಮೊಬೈಲ್ ಬ್ಯಾಂಕಿಂಗ್ ಅಪ್ಲಿಕೇಶನ್ ತೆರೆಯಿರಿ. ಎಟಿಎಂ ಸ್ಕ್ರೀನ್ ಮೇಲೆ ಕ್ಯೂಆರ್ ಕೋಡ್ ಕಾಣಿಸುತ್ತದೆ. ನಿಮ್ಮ ಮೊಬೈಲ್ ಬ್ಯಾಂಕಿಂಗ್ ಅಪ್ಲಿಕೇಶನ್‌ನಲ್ಲಿ BHIM/ UPI ಆಯ್ಕೆಯನ್ನು ಬಳಸಿಕೊಂಡು ಈ QR ಕೋಡ್ ಅನ್ನು ಸ್ಕ್ಯಾನ್ ಮಾಡಿ. ಎಟಿಎಂನಿಂದ ಡ್ರಾ ಆದ ಹಣವನ್ನು ಪಡೆಯಿರಿ.

ಕಾರ್ಡ್‌ಲೆಸ್ ಕ್ಯಾಶ್ ವಿಥ್ ಡ್ರಾ ಮಾಡಲು ನೀವು ICICI ಬ್ಯಾಂಕ್ ಅಪ್ಲಿಕೇಶನ್ ಅನ್ನು ಬಳಸುತ್ತಿದ್ದರೆ, ನೀವು ಅದೇ ಬ್ಯಾಂಕಿನ ATM ಅನ್ನು ಬಳಸಬೇಕಾಗುತ್ತದೆ. ಹೆಚ್ಚಿನ ಬ್ಯಾಂಕ್‌ಗಳಲ್ಲಿ ಇದೇ ರೀತಿ ಇದೆ. ಆದಾಗ್ಯೂ, ಬ್ಯಾಂಕ್ ಆಫ್ ಬರೋಡಾ, ಯೂನಿಯನ್ ಬ್ಯಾಂಕ್ ಆಫ್ ಇಂಡಿಯಾ ಮತ್ತು ಸಿಟಿ ಯೂನಿಯನ್ ಬ್ಯಾಂಕ್ ಮತ್ತು ಕೆಲವು ಪಾವತಿ ವ್ಯಾಲೆಟ್‌ಗಳ ಸಂದರ್ಭದಲ್ಲಿ, ಇಂಟರ್‌ಆಪರೇಬಲ್ ಕಾರ್ಡ್‌ಲೆಸ್ ನಗದು ಹಿಂಪಡೆಯುವಿಕೆ (ICCW) ವಹಿವಾಟುಗಳನ್ನು ನಡೆಸುವ ಅವಕಾಶವಿದೆ.