ಗುಣಮಟ್ಟದ ಮಾವಿನ ಹಣ್ಣು ಆರಿಸಿಕೊಳ್ಳುವುದು ಹೇಗೆ ? ಇಲ್ಲಿದೆ ಟಿಪ್ಸ್

ಇದು ಮಾವಿನ ಹಣ್ಣಿನ ಸೀಸನ್. ತರಹೇವಾರಿ ರುಚಿಕರವಾದ ಮಾವಿನ ಸವಿ ಬಾಯಲ್ಲಿ ನೀರೂರಿಸುತ್ತೆ. ಆದರೆ ಮಾವು ನೈಸರ್ಗಿಕವಾಗಿ ಹಣ್ಣಾಗಿದ್ದರೆ ಅದರ ರುಚಿ ಹೆಚ್ಚು ಸ್ವಾದ ನೀಡುತ್ತದೆ. ಕೃತಕವಾಗಿ ಮಾವನ್ನು ಹಣ್ಣಾಗಿಸಿದ್ದರೆ ಅದು ಹೆಚ್ಚು ಸ್ವಾದ ನೀಡುವುದಿಲ್ಲ.

ಹಾಗಾಗಿ ನೈಸರ್ಗಿಕವಾಗಿ ಮಾಗಿದ ಹಣ್ಣುಗಳು ಮತ್ತು ಕೃತಕವಾಗಿ ಸಂಸ್ಕರಿಸಿದ ಹಣ್ಣುಗಳ ನಡುವೆ ವ್ಯತ್ಯಾಸವನ್ನು ಕಂಡುಹಿಡಿಯುವುದು ಬಹಳ ಮುಖ್ಯ.

ಎಥಿಲೀನ್ ಅನಿಲ ಮತ್ತು ಕ್ಯಾಲ್ಸಿಯಂ ಕಾರ್ಬೈಡ್ ರಾಸಾಯನಿಕ ಬಳಕೆ ಅಥವಾ ಶಾಖ ನೀಡುವ ಮೂಲಕ ಹಣ್ಣಾಗಿಸಿದ ಮಾವಿನಹಣ್ಣುಗಳು ನೈಸರ್ಗಿಕವಾಗಿ ಮಾಗಿದ ಹಣ್ಣುಗಳಂತೆಯೇ ಅದೇ ಗುಣಮಟ್ಟ ಮತ್ತು ಪೌಷ್ಟಿಕಾಂಶವನ್ನು ಹೊಂದಿರುವುದಿಲ್ಲ.

ಕೃತಕವಾಗಿ ಮಾಗಿದ ಮಾವಿನ ಹಣ್ಣುಗಳು ಕಡಿಮೆ ರುಚಿ ಹೊಂದಿರುವುದು ಮಾತ್ರವಲ್ಲ, ಅವು ಆರೋಗ್ಯಕ್ಕೆ ಅಪಾಯವನ್ನುಂಟುಮಾಡುತ್ತವೆ. ನೀವು ನೈಸರ್ಗಿಕವಾಗಿ ಹಣ್ಣಾದ ಅತ್ಯುತ್ತಮ ಮಾವಿನಹಣ್ಣಿನ ರುಚಿಯನ್ನು ಆನಂದಿಸಬೇಕಾದರೆ ಅವುಗಳ ಗುಣಮಟ್ಟವನ್ನು ನಿರ್ಣಯಿಸಲು ಈ ವಿಧಾನಗಳನ್ನು ಪರಿಗಣಿಸಿ.

ವಾಸನೆ ಪರೀಕ್ಷೆ

ಕೃತಕವಾಗಿ ಮಾಗಿದ ಮಾವಿನಹಣ್ಣುಗಳು ನೈಸರ್ಗಿಕವಾಗಿ ಮಾಗಿದ ಹಣ್ಣುಗಳ ಪರಿಮಳ ನೀಡುವುದಿಲ್ಲ. ಅದರಿಂದ ರಾಸಾಯನಿಕ ವಾಸನೆ ಬರುತ್ತದೆ. ಮಾವಿನ ಹಣ್ಣನ್ನು ಮೂಸುವ ಮೂಲಕ ನೀವು ರಾಸಾಯನಿಕ ವಾಸನೆಯ ಯಾವುದೇ ಸುಳಿವುಗಳನ್ನು ಅಥವಾ ಹಾಳಾಗುವ ಲಕ್ಷಣಗಳನ್ನು ಕಂಡುಹಿಡಿಯಬಹುದು. ಮಾಗಿದ ಮಾವು ಹಣ್ಣಿನ ಉದ್ದಕ್ಕೂ ಸ್ಥಿರವಾದ, ಆಹ್ಲಾದಕರವಾದ ಪರಿಮಳವನ್ನು ಹೊಂದಿರುತ್ತದೆ.

ಬಣ್ಣ ಮತ್ತು ವಿನ್ಯಾಸ

ಮಾವಿನ ಮೇಲ್ಮೈಯನ್ನು ನಿಕಟವಾಗಿ ಪರೀಕ್ಷಿಸಿ. ನೈಸರ್ಗಿಕವಾಗಿ ಮಾಗಿದ ಮಾವಿನಹಣ್ಣುಗಳು ಹಸಿರು-ಹಳದಿ ಬಣ್ಣವನ್ನು ಹೊಂದಿರುತ್ತವೆ. ಕೃತಕವಾಗಿ ಮಾಗಿದ ಮಾವುಗಳು ಏಕರೂಪದ ಹಳದಿ ಬಣ್ಣವನ್ನು ಹೊಂದಿರುತ್ತವೆ. ಹೆಚ್ಚುವರಿಯಾಗಿ ಹಣ್ಣಿನ ಹೊರಗಿನ ವಿನ್ಯಾಸವನ್ನು ಗಮನಿಸಿ ಮಾವು ಗಟ್ಟಿಯಾಗಿ ಭಾಸವಾಗಬೇಕು. ಆದರೆ ಸುಕ್ಕುಗಟ್ಟಿದ ಅಥವಾ ಅತಿಯಾದ ಮೃದುವಾದ ಮಾವಿನಹಣ್ಣುಗಳನ್ನು ತಪ್ಪಿಸಿ.

ಋತುಮಾನವನ್ನು ಪರಿಗಣಿಸಿ

ಮಾವು ಖರೀದಿ ಮಾಡುವ ಮೊದಲು ನಿಮ್ಮ ಪ್ರದೇಶದಲ್ಲಿ ಮಾವಿನ ಹಣ್ಣಿನ ಋತುವಿನ ಬಗ್ಗೆ ಗಮನವಿರಲಿ. ಋತುವಿನಲ್ಲಿರುವ ಮಾವಿನ ತಳಿಗಳನ್ನು ಆರಿಸಿಕೊಳ್ಳಿ, ಏಕೆಂದರೆ ಅವುಗಳನ್ನು ಹೊಸದಾಗಿ ಕೊಯ್ಲು ಮಾಡಲಾಗಿರುತ್ತದೆ. ಅವು ಉತ್ತಮ ಸುವಾಸನೆ ಮತ್ತು ಗುಣಮಟ್ಟವನ್ನು ಹೊಂದಿರುತ್ತವೆ. ಇವು ಬೇಗನೆ ಹಾಳಾಗುವುದಿಲ್ಲ.