ನೀವು ಅತ್ಯಂತ ಗೌರವ ನೀಡುವ ವ್ಯಕ್ತಿ ಅಥವಾ ಸೆಲೆಬ್ರಿಟಿಗಳು ನಮ್ಮೊಂದಿಗೆ ಬೆರೆತಾಗ ನಮಗೆ ಖಂಡಿತವಾಗಿಯೂ ಅದೊಂದು ಅವಿಸ್ಮರಣೀಯ ಕ್ಷಣ ಎಂದು ಎನಿಸದೇ ಇರದು. ಇದೀಗ ಇದೇ ರೀತಿಯ ಅನುಭವವೊಂದು ದುಬೈನ ಭಾರತೀಯ ಕುಟುಂಬವೊಂದಕ್ಕೆ ಆಗಿದೆ. ಈ ಕುಟುಂಬವು ದುಬೈ ದೊರೆ ಶೇಖ್ ಮೊಹಮ್ಮದ್ ಬಿನ್ ರಶೀದ್ ಅಲ್ ಮುಕ್ತೌಮ್ ಜೊತೆಯಲ್ಲಿ ಎಲಿವೇಟರ್ ಶೇರ್ ಮಾಡಿದ್ದು ಇವರ ಸಂತಸಕ್ಕೆ ಪಾರವೇ ಇಲ್ಲದಂತಾಗಿದೆ.
ಶನಿವಾರದಂದು ವಾಣಿಜ್ಯೋದ್ಯಮಿ ಅನಸ್ ರೆಹಮಾನ್ ಜುನೈದ್ ಎಂಬವರು ತಮ್ಮ ಪತ್ನಿ ಹಾಗೂ ಇಬ್ಬರು ಮಕ್ಕಳೊಂದಿಗೆ ಲಿಫ್ಟ್ನಲ್ಲಿದ್ದಾಗ ಏಕಾಏಕಿ ಶೇಖ್ ಮೊಹಮದ್ ಬಿನ್ರನ್ನು ಕಂಡು ಆಶ್ಚರ್ಯಚಕಿತರಾದರು. ಅಟ್ಲಾಂಟಿಸ್ ದಿ ರಾಯಲ್ನ ಎಲಿವೇಟರ್ ಈ ಕುಟುಂಬಕ್ಕೆ ಮರೆಯಲಾಗದ ನೆನಪಿನ ಬುತ್ತಿಯೊಂದನ್ನು ನೀಡಿದೆ.
ದೊರೆಯ ಜನ್ಮದಿನದಂದೇ ಅವರನ್ನು ಕಣ್ತುಂಬಿಕೊಂಡ ಈ ಕುಟುಂಬವು ಬಳಿಕ ಅವರೊಂದಿಗೆ ಸೆಲ್ಫಿ ಕೂಡ ತೆಗೆದುಕೊಂಡಿದೆ. ಇದಾದ ಬಳಿಕ ಮಾಧ್ಯಮಗಳಿಗೆ ಪ್ರತಿಕ್ರಿಯಿಸಿ ಅನಸ್, ದೊರೆ ತುಂಬಾ ಸ್ನೇಹಜೀವಿಯಂತೆ ಕಂಡರು. ನಾವು ಯಾವುದೇ ಸಿದ್ಧತೆಯಿಲ್ಲದೇ ಅವರನ್ನು ಭೇಟಿಯಾಗಿದ್ದೆವು. ಅವರ ಭೇಟಿ ಬಳಿಕ ನಮ್ಮ ಸಂತಸಕ್ಕೆ ಪಾರವೇ ಇಲ್ಲದಂತಾಗಿದೆ ಎಂದಿದ್ದಾರೆ.
ನಾವು ದೊರೆಗಳನ್ನು ಭೇಟಿಯಾಗಿ ಅವರೊಂದಿಗೆ ಮಾತನಾಡಿದ್ದೇವೆ ಎಂಬುದನ್ನು ನಮಗೆ ಇಂದಿಗೂ ನಂಬಲಾಗುತ್ತಿಲ್ಲ. ನಾವಿದ್ದ ಲಿಫ್ಟ್ನಲ್ಲಿ ದೊರೆ ಕೂಡ ಬಂದರು. ತುಂಬಾ ಸ್ನೇಹ ಜೀವಿಯಾಗಿದ್ದರು. ನನ್ನ ಪುತ್ರಿಯನ್ನು ಮಾತನಾಡಿಸಿ ನಾನು ಯಾರೆಂದು ನಿನಗೆ ಗೊತ್ತೇ ಎಂದು ಕೇಳಿದರು. ಅದು 20 ಮಹಡಿ ಕಟ್ಟಡವಾಗಿದ್ದರೂ ಸಹ ಎಲಿವೇಟರ್ ತುಂಬಾ ವೇಗವನ್ನು ಹೊಂದಿದ್ದ ಕಾರಣ ನಮಗೆ ಮಾತನಾಡಲು ಹೆಚ್ಚು ಸಮಯ ಸಿಗಲಿಲ್ಲ ಎಂದು ಉದ್ಯಮಿ ಹೇಳಿದ್ರು.
Loading ...