ಅವಿವಾಹಿತರು, ವಿಧವೆಯರಿಗೆ ತಿಂಗಳಿಗೆ 2,750 ರೂ. ಪಿಂಚಣಿ: 60 ವರ್ಷವಾದ ನಂತರ ವೃದ್ಧಾಪ್ಯ ವೇತನ

ಚಂಡೀಗಢ: 45 ರಿಂದ 60 ವರ್ಷದೊಳಗಿನ ಕಡಿಮೆ ಆದಾಯದ ಅವಿವಾಹಿತರಿಗೆ ತಿಂಗಳಿಗೆ 2,750 ರೂ. ಪಿಂಚಣಿ ನೀಡುವುದಾಗಿ ಹರಿಯಾಣ ಸರ್ಕಾರ ಗುರುವಾರ ಘೋಷಿಸಿದೆ.

ವಿಧವೆಯ ಪುರುಷ ಮತ್ತು ಮಹಿಳೆಯರಿಗೆ ಇದೇ ರೀತಿಯ ಯೋಜನೆಯನ್ನು ಅನಾವರಣಗೊಳಿಸಲಾಗಿದೆ. ರಾಜ್ಯ ಸರ್ಕಾರ ಈಗಾಗಲೇ 60 ವರ್ಷಕ್ಕಿಂತ ಮೇಲ್ಪಟ್ಟ ಕಡಿಮೆ ಆದಾಯದ ಜನರಿಗೆ ಮಾಸಿಕ ಪಿಂಚಣಿ ನೀಡುತ್ತದೆ.

45-60 ವರ್ಷದೊಳಗಿನ ಮತ್ತು ವಾರ್ಷಿಕ 1.80 ಲಕ್ಷ ರೂ.ಗಿಂತ ಕಡಿಮೆ ಆದಾಯ ಹೊಂದಿರುವ ಅವಿವಾಹಿತ ಪುರುಷರು ಮತ್ತು ಮಹಿಳೆಯರಿಗೆ ತಿಂಗಳಿಗೆ 2,750 ರೂ. ಪಿಂಚಣಿ ನೀಡಲಾಗುತ್ತದೆ ಎಂದು ಮುಖ್ಯಮಂತ್ರಿ ಮನೋಹರ್ ಲಾಲ್ ಖಟ್ಟರ್ ಗುರುವಾರ ಹೇಳಿದ್ದಾರೆ.

ಅದೇ ರೀತಿ ವಾರ್ಷಿಕ 3 ಲಕ್ಷ ರೂ. ಗಿಂತ ಕಡಿಮೆ ಆದಾಯ ಹೊಂದಿರುವ 40-60 ವರ್ಷದ ವಿಧವೆಯರಿಗೂ ಪ್ರತಿ ತಿಂಗಳು 2,750 ಸಿಗಲಿದೆ. ಈ ಕ್ರಮದಿಂದ ರಾಜ್ಯದ ಬೊಕ್ಕಸಕ್ಕೆ ವಾರ್ಷಿಕ 240 ಕೋಟಿ ರೂ. ಹೆಚ್ಚುವರಿ ಹೊರೆ ಬೀಳಲಿದೆ. ನಿಗದಿತ ವಯೋಮಿತಿ ಮತ್ತು ಆದಾಯ ಮಿತಿಯಲ್ಲಿ ಒಟ್ಟು 65,000 ಅವಿವಾಹಿತ ಪುರುಷರು ಮತ್ತು ಮಹಿಳೆಯರು ಮತ್ತು 5,687 ವಿಧುರರು ಇದ್ದಾರೆ. ಈ ಫಲಾನುಭವಿಗಳಿಗೆ 60 ವರ್ಷ ತುಂಬಿದ ನಂತರ ವೃದ್ಧಾಪ್ಯ ವೇತನ ದೊರೆಯಲಿದೆ.