ಹೃದಯಾಘಾತದಿಂದ ನಟ ನಿತಿನ್ ಗೋಪಿ ನಿಧನ

ಬೆಂಗಳೂರು: ಸ್ಯಾಂಡಲ್ವುಡ್ ಗೆ ಮತ್ತೊಂದು ಆಘಾತ ಎದುರಾಗಿದೆ. ನಟ ನಿತಿನ್ ಗೋಪಿ(39) ಹೃದಯಾಘಾತದಿಂದ ನಿಧನರಾಗಿದ್ದಾರೆ.

1996ರಲ್ಲಿ ಬಿಡುಗಡೆಯಾಗಿದ್ದ ಡಾ. ವಿಷ್ಣುವರ್ಧನ್ ಅಭಿನಯದ ‘ಹಲೋ ಡ್ಯಾಡಿ’ ಚಿತ್ರದಲ್ಲಿ ವಿಷ್ಣು ಪುತ್ರನಾಗಿ ನಿತಿನ್ ಗೋಪಿ ನಟಿಸಿದ್ದರು. ‘ಶಾಲೆಗೆ ಈ ದಿನ ರಜಾ…’ ಹಾಡನ್ನು ಜನ ಈಗಲೂ ಗುನುಗುನುಗಿಸುತ್ತಾರೆ.

ಬೆಂಗಳೂರಿನ ಇಟ್ಟಮಡುವಿನ ಅಪಾರ್ಟ್ಮೆಂಟ್ ನಲ್ಲಿ ತಂದೆ, ತಾಯಿಯೊಂದಿಗೆ ನಿತಿನ್ ವಾಸವಾಗಿದ್ದು, ಇಂದು ಬೆಳಗಿನಜಾವ ಎದೆ ನೋವು ಕಾಣಿಸಿಕೊಂಡಿದೆ. ಕೂಡಲೇ ಅವರನ್ನು ಆಸ್ಪತ್ರೆಗೆ ಕರೆದುಕೊಂಡು ಹೋಗಲಾಗಿದ್ದು, ಮಾರ್ಗಮಧ್ಯದಲ್ಲಿ ಮೃತಪಟ್ಟಿದ್ದಾರೆ.

ಅವರ ತಂದೆ ಗೋಪಿ ಅವರು ಖ್ಯಾತ ಕೊಳಲು ವಾದಕರಾಗಿದ್ದಾರೆ. ನಿತಿನ್ ನಿಧನದ ಸುದ್ದಿ ತಿಳಿದ ಚಿತ್ರರಂಗ ಹಾಗೂ ಕಿರುತೆರೆ ಕಲಾವಿದರು ಕಂಬನಿ ಮಿಡಿದಿದ್ದಾರೆ. ‘ಮುತ್ತಿನಂತ ಹೆಂಡತಿ’, ‘ನಿಶಬ್ದ’, ‘ಚಿರಬಾಂಧವ್ಯ’, ‘ಹಲೋ ಡ್ಯಾಡಿ’, ‘ಕೆರಳಿದ ಕೇಸರಿ’ ಸೇರಿದಂತೆ ಹಲವು ಚಿತ್ರಗಳಲ್ಲಿ ನಿತಿನ್ ಗೋಪಿ ನಟಿಸಿದ್ದರು. ಹಲವು ಧಾರಾವಾಹಿಗಳನ್ನು ನಿರ್ದೇಶನ ಮಾಡಿದ್ದು, ಅನೇಕ ಧಾರಾವಾಹಿಗಳಲ್ಲಿ ನಟಿಸಿದ್ದಾರೆ.