25 ವರ್ಷದ ಯುವಕ, ಆರೋಗ್ಯ ತರಬೇತುದಾರ ದಿಲನ್, ಎರಡು ವರ್ಷಗಳ ಕಾಲ ನಿರ್ಲಕ್ಷಿಸಿದ ರೋಗಲಕ್ಷಣಗಳ ನಂತರ 4ನೇ ಹಂತದ ಕ್ಯಾನ್ಸರ್‌ನಿಂದ ಬಳಲುತ್ತಿರುವುದು ಪತ್ತೆಯಾಗಿದೆ. ಅವರು ತಮ್ಮ ಕಥೆಯನ್ನು ಧೈರ್ಯದಿಂದ ಹಂಚಿಕೊಂಡಿದ್ದಾರೆ ಮತ್ತು ತಮ್ಮ ದೇಹದ ಮಾತುಗಳನ್ನು ಕೇಳುವುದು ಎಷ್ಟು ಮುಖ್ಯ ಎಂಬುದನ್ನು ಒತ್ತಿಹೇಳಿದ್ದಾರೆ.
ಸಾಮಾನ್ಯವಾಗಿ ನಾವೆಲ್ಲರೂ ರಾತ್ರಿ ಬೆವರು, ಆಯಾಸ ಅಥವಾ ಅನಿರೀಕ್ಷಿತ ನೋವುಗಳಂತಹ ಸಣ್ಣ ಆರೋಗ್ಯ ಸಮಸ್ಯೆಗಳನ್ನು ನಿರ್ಲಕ್ಷಿಸುತ್ತೇವೆ, ಅವು ಗಂಭೀರವಲ್ಲ ಎಂದು ಭಾವಿಸುತ್ತೇವೆ. ಆದರೆ, ಕೆಲವೊಮ್ಮೆ ಈ ಸೂಕ್ಷ್ಮ ಲಕ್ಷಣಗಳು ದೊಡ್ಡ ಸಮಸ್ಯೆಯ ಮುನ್ಸೂಚನೆಯಾಗಿರಬಹುದು. ಆರೋಗ್ಯ ತರಬೇತುದಾರ ದಿಲನ್ ಏಪ್ರಿಲ್ 8 ರ ತಮ್ಮ Instagram ಪೋಸ್ಟ್‌ನಲ್ಲಿ, ಕ್ಯಾನ್ಸರ್‌ನ ಆರಂಭಿಕ ಲಕ್ಷಣಗಳನ್ನು ಹೇಗೆ ನಿರ್ಲಕ್ಷಿಸಿದರು ಮತ್ತು ಪ್ರತಿಯೊಬ್ಬರೂ ಗಮನಿಸಬೇಕಾದ ಲಕ್ಷಣಗಳು ಯಾವುವು ಎಂಬುದನ್ನು ಹಂಚಿಕೊಂಡಿದ್ದಾರೆ.
ಅವರಲ್ಲಿ ಕಂಡುಬಂದ ಲಕ್ಷಣಗಳು ಏನೆಂದು ತಿಳಿಯಿರಿ
“ಮೊದಲಿಗೆ, ರಾತ್ರಿ ಬೆವರು ಶುರುವಾಯಿತು. ಬರೀ ಬಿಸಿ ಎನಿಸುವುದಷ್ಟೇ ಅಲ್ಲ, ನನ್ನ ಹಾಸಿಗೆ ಸಂಪೂರ್ಣವಾಗಿ ನೆನೆದು ಹೋಗುತ್ತಿತ್ತು” ಎಂದು ದಿಲನ್ ನೆನಪಿಸಿಕೊಳ್ಳುತ್ತಾರೆ. “ನಾನು ಮಧ್ಯರಾತ್ರಿಯಲ್ಲಿ ಬಟ್ಟೆ ಬದಲಾಯಿಸುತ್ತಿದ್ದೆ, ಆದರೆ ಮತ್ತೆ ನೆನೆದು ಹೋಗುತ್ತಿದ್ದೆ.”
ನಂತರ, ತೀವ್ರ ತುರಿಕೆ ಶುರುವಾಯಿತು. “ಎಷ್ಟೇ ಕೆರೆದುಕೊಂಡರೂ ತೃಪ್ತಿಪಡಿಸಲು ಸಾಧ್ಯವಾಗದ ಅಸಹನೀಯ ತುರಿಕೆ” ಎಂದು ಅವರು ಹೇಳುತ್ತಾರೆ. “ನನ್ನ ಚರ್ಮ ರಕ್ತ ಬರುವವರೆಗೂ ಕೆರೆದುಕೊಂಡೆ.” ಇದರ ನಂತರ, ವಿಪರೀತ ಆಯಾಸ ಶುರುವಾಯಿತು. “ನಿದ್ದೆಯಿಂದಲೂ ನಿವಾರಣೆಯಾಗದ ಆಳವಾದ ಆಯಾಸ. ನನ್ನ ದೇಹ ಏನೋ ಸರಿ ಇಲ್ಲ ಎಂದು ಹೇಳಲು ಹತಾಶವಾಗಿ ಪ್ರಯತ್ನಿಸುತ್ತಿತ್ತು.”
ದಿಲನ್‌ಗೆ ಎದೆ ನೋವು ಕಾಣಿಸಿಕೊಳ್ಳಲು ಪ್ರಾರಂಭಿಸಿದಾಗ, ಅವರು ಅಂತಿಮವಾಗಿ ವೈದ್ಯರನ್ನು ಭೇಟಿ ಮಾಡಿದರು. “ಅವರು ಬಹುಶಃ ಇದು ನನ್ನ ವರ್ಕೌಟ್‌ಗಳಿಂದ ಆಗಿರುವ ಸ್ನಾಯುಗಳ ಸೆಳೆತ ಇರಬಹುದು ಎಂದು ಹೇಳಿದರು” ಎಂದು ಅವರು ವಿವರಿಸುತ್ತಾರೆ. ಅವರಿಗೆ ಉರಿಯೂತ ನಿವಾರಕ ಔಷಧಗಳನ್ನು ನೀಡಿ ಮನೆಗೆ ಕಳುಹಿಸಲಾಯಿತು. “ಇನ್ನೊಂದು 12 ತಿಂಗಳುಗಳ ಕಾಲ, ನನಗೆ ಗೊತ್ತಿಲ್ಲದ ಯುದ್ಧವನ್ನು ನನ್ನ ದೇಹ ಹೋರಾಡುತ್ತಲೇ ಇತ್ತು.”
ಅವರ ಕುತ್ತಿಗೆ ಮತ್ತು ತೋಳಿನ ಕೆಳಗೆ ಗಂಟುಗಳು ಕಾಣಿಸಿಕೊಳ್ಳುವವರೆಗೂ ದಿಲನ್‌ಗೆ ಏನೋ ಗಂಭೀರವಾಗಿದೆ ಎಂದು ತಿಳಿದಿರಲಿಲ್ಲ. ಈ ಬಾರಿ, ಅವರ ವೈದ್ಯರು ಪರೀಕ್ಷೆಗಳಿಗೆ ಆದೇಶಿಸಿದರು. “ಪರೀಕ್ಷಾ ವರದಿಗಳು ಬಂದಾಗ: ಅದು 4ನೇ ಹಂತದ (4B) ಹಾಡ್ಕಿನ್ಸ್ ಲಿಂಫೋಮಾ ಎಂದು ಪತ್ತೆಯಾಯಿತು.”
“ಕ್ಯಾನ್ಸರ್ ನನ್ನ ದೇಹದಲ್ಲಿ ಸುಮಾರು ಎರಡು ವರ್ಷಗಳ ಕಾಲ ಬೆಳೆಯುತ್ತಿತ್ತು” ಎಂದು ಅವರು ಹೇಳುತ್ತಾರೆ. “ನನ್ನ ಶ್ವಾಸಕೋಶದಲ್ಲಿ ಒಂದು ಗೆಡ್ಡೆಯೂ ಇತ್ತು, ಅದು ನಾನು ಒಂದು ವರ್ಷದ ಹಿಂದೆ ವರದಿ ಮಾಡಿದ್ದ ಎದೆನೋವಿಗೆ ಕಾರಣವಾಗಿತ್ತು. ಊಹಿಸಲೂ ಸಾಧ್ಯವಾಗದ ಪ್ರತಿಯೊಂದು ಭಾವನೆಯೂ ನನ್ನ ಮೇಲೆ ಆವರಿಸಿತ್ತು”
25ನೇ ವಯಸ್ಸಿನಲ್ಲಿ ಕ್ಯಾನ್ಸರ್ ಹೇಗೆ ?
“ಹಿಂದಿರುಗಿ ನೋಡಿದರೆ, ನಾನು ನನ್ನ ಅಂತಃಪ್ರಜ್ಞೆಯನ್ನು ನಂಬಿದ್ದರೆ ಚೆನ್ನಾಗಿತ್ತು ಎಂದು ಅನಿಸುತ್ತದೆ. ನನ್ನ ದೇಹ ಏನೋ ಸರಿ ಇಲ್ಲ ಎಂದು ಹೇಳುತ್ತಿದ್ದಾಗಲೂ, ‘ಬಹುಶಃ ಏನೂ ಇಲ್ಲ’ ಎಂದು ಒಪ್ಪಿಕೊಂಡು ಸುಮ್ಮನಿರದೆ, ಇನ್ನಷ್ಟು ಒತ್ತಾಯಿಸಿದ್ದರೆ ಚೆನ್ನಾಗಿತ್ತು” ಎಂದು ದಿಲನ್ ಹೇಳುತ್ತಾರೆ.
“ನೀವು ಇದನ್ನು ಓದುತ್ತಿದ್ದರೆ ಮತ್ತು ನಿಮ್ಮ ದೇಹದಲ್ಲಿ ಏನೋ ಸರಿ ಇಲ್ಲ ಎಂದು ಅನಿಸಿದರೆ, ದಯವಿಟ್ಟು ಆ ಭಾವನೆಯನ್ನು ಆಲಿಸಿ. ವೈದ್ಯಕೀಯ ವೃತ್ತಿಪರರು ಸೇರಿದಂತೆ ಯಾರೂ ನಿಮ್ಮ ಕಾಳಜಿಗಳನ್ನು ನಿರ್ಲಕ್ಷಿಸಲು ಬಿಡಬೇಡಿ. ನಿಮ್ಮ ಆರೋಗ್ಯ ಅಮೂಲ್ಯವಾದುದು.”
“ಕ್ಯಾನ್ಸರ್ ನನಗೆ ಕಲಿಸಿದ್ದೇನೆಂದರೆ, ನಮ್ಮ ದೇಹಗಳು ಕೂಗುವ ಮೊದಲು ಪಿಸುಗುಟ್ಟುತ್ತವೆ. ನನ್ನದು ಎರಡು ವರ್ಷಗಳ ಕಾಲ ಪಿಸುಗುಟ್ಟಿತ್ತು, ಯಾರೂ ಕೇಳಲಿಲ್ಲ. ಕೂಗುವವರೆಗೂ ಕಾಯಬೇಡಿ.”
Loading ...
