‘ಹ್ಯಾರಿ ಪಾಟರ್ ರಿಬೂಟ್’ ವಿಶ್ವದ ಅತ್ಯಂತ ದುಬಾರಿ ಟಿವಿ ಶೋ: ಪ್ರತಿ ಸಂಚಿಕೆಗೆ ₹856 ಕೋಟಿ !

ವಿಶ್ವದ ಅತ್ಯಂತ ದುಬಾರಿ ಟಿವಿ ಶೋ ಯಾವುದು ಎಂದು ಊಹಿಸಬಲ್ಲಿರಾ? ಅದು ‘ದಿ ಲಾರ್ಡ್ ಆಫ್ ದಿ ರಿಂಗ್ಸ್’, ‘ಸ್ಟಾರ್ ವಾರ್ಸ್’ ಅಥವಾ ‘ಗೇಮ್ ಆಫ್ ಥ್ರೋನ್ಸ್’ ಅಲ್ಲ! ಈ ಎಲ್ಲಾ ಸರಣಿಗಳ ದಾಖಲೆಗಳನ್ನು ಮುರಿದು, ಬರಲಿರುವ ‘ಹ್ಯಾರಿ ಪಾಟರ್ ರಿಬೂಟ್’ ಸರಣಿಯು ಪ್ರತಿ ಸಂಚಿಕೆಗೆ ಬರೋಬ್ಬರಿ 100 ಮಿಲಿಯನ್ ಡಾಲರ್ (ಸುಮಾರು ₹856 ಕೋಟಿ) ವೆಚ್ಚವಾಗಲಿದ್ದು, ವಿಶ್ವದ ಅತಿ ದುಬಾರಿ ಟಿವಿ ಶೋ ಎಂಬ ಖ್ಯಾತಿಗೆ ಪಾತ್ರವಾಗಲಿದೆ. ಇದರ ಒಟ್ಟು ವೆಚ್ಚ ₹34,240 ಕೋಟಿಗೂ ಹೆಚ್ಚಾಗಿದೆ ಎಂದು ವರದಿಯಾಗಿದೆ.

ಇಲ್ಲಿಯವರೆಗೆ, ಅತಿ ದುಬಾರಿ ಶೋಗಳಲ್ಲಿ ‘ಸ್ಟಾರ್ ವಾರ್ಸ್ ಎಪಿಸೋಡ್ VII’ 440 ಮಿಲಿಯನ್ ಡಾಲರ್ ವೆಚ್ಚದಲ್ಲಿ ನಿರ್ಮಿಸಲಾಗಿತ್ತು. ಆದರೆ, ಈಗ ಬರಲಿರುವ ‘ಹ್ಯಾರಿ ಪಾಟರ್ ರಿಬೂಟ್’ ಸರಣಿಯು ಈ ದಾಖಲೆಯನ್ನು ಬಜೆಟ್ ವಿಷಯದಲ್ಲಿ ಮುರಿಯಲಿದೆ. ಒಟ್ಟು $4 ಬಿಲಿಯನ್ (ಸುಮಾರು ₹34,240 ಕೋಟಿ) ವೆಚ್ಚದಲ್ಲಿ ಈ ಸರಣಿ ನಿರ್ಮಾಣವಾಗಲಿದೆ.

ಎಕ್ಸ್‌ಪ್ರೆಸ್ ವರದಿಯ ಪ್ರಕಾರ, ‘ಹ್ಯಾರಿ ಪಾಟರ್ ರಿಬೂಟ್’ ಸರಣಿಯ ಒಂದು ಸಂಚಿಕೆಯ ನಿರ್ಮಾಣಕ್ಕೆ ಸುಮಾರು 100 ಮಿಲಿಯನ್ ಡಾಲರ್ (ಸುಮಾರು ₹856 ಕೋಟಿ) ವೆಚ್ಚವಾಗಲಿದೆ. ಈ ಸರಣಿಯು ಒಟ್ಟು ಆರು ಸಂಚಿಕೆಗಳನ್ನು ಹೊಂದಿರಲಿದೆ ಎಂದು ಹೇಳಲಾಗುತ್ತಿದೆ.

ಸಂಪೂರ್ಣ ಸರಣಿಯ ಬೃಹತ್ ಬಜೆಟ್:

ಮಾಧ್ಯಮ ವರದಿಗಳ ಪ್ರಕಾರ, ‘ಹ್ಯಾರಿ ಪಾಟರ್ ರಿಬೂಟ್’ ಸರಣಿಯ ಒಟ್ಟು ನಿರ್ಮಾಣ ಬಜೆಟ್ 4.2 ಬಿಲಿಯನ್ ಡಾಲರ್ (ಸುಮಾರು ₹34,240 ಕೋಟಿ) ಆಗಲಿದೆ. ಇಲ್ಲಿಯವರೆಗೆ ‘ದಿ ಲಾರ್ಡ್ ಆಫ್ ದಿ ರಿಂಗ್ಸ್: ದಿ ರಿಂಗ್ಸ್ ಆಫ್ ಪವರ್’ ಅತಿ ದುಬಾರಿ ಟಿವಿ ಶೋ ಆಗಿತ್ತು. ಅದರ ಎರಡು ಸೀಸನ್‌ಗಳ ಒಟ್ಟು ಬಜೆಟ್ 1 ಬಿಲಿಯನ್ ಡಾಲರ್‌ಗಿಂತ ಸ್ವಲ್ಪ ಹೆಚ್ಚಿತ್ತು. ಆದರೆ, ಹೊಸ ‘ಹ್ಯಾರಿ ಪಾಟರ್’ ಸರಣಿ ಅದನ್ನು ಬೃಹತ್ ಪ್ರಮಾಣದಲ್ಲಿ ಮೀರಿಸಲಿದೆ.

ನಿರ್ಮಾಣದ ಬೃಹತ್ ವೆಚ್ಚಕ್ಕೆ ಕಾರಣ:

ಹೊಸ ಹ್ಯಾರಿ ಪಾಟರ್ ಸರಣಿಯ ಬಜೆಟ್‌ನ ದೊಡ್ಡ ಭಾಗವು ಚಿತ್ರೀಕರಣ ಮತ್ತು ಸೆಟ್‌ಗಳ ನಿರ್ಮಾಣಕ್ಕೆ ಖರ್ಚಾಗುತ್ತಿದೆ. ‘ದಿ ಸನ್’ ವರದಿಯ ಪ್ರಕಾರ, ಕೇವಲ ಸೆಟ್‌ಗಳಿಗಾಗಿಯೇ 1.3 ಬಿಲಿಯನ್ ಡಾಲರ್ (ಸುಮಾರು ₹11,000 ಕೋಟಿ) ಖರ್ಚು ಮಾಡಲಾಗಿದೆ. ನಿರ್ಮಾಪಕರು ಸರಣಿಗಾಗಿ ಸಂಪೂರ್ಣ ನಗರವನ್ನೇ ನಿರ್ಮಿಸಿದ್ದಾರೆ. ಇದಕ್ಕಾಗಿ ಭಾರಿ ಮೊತ್ತವನ್ನು ವ್ಯಯಿಸಬೇಕಾಗಿದೆ.

ಜೆ.ಕೆ. ರೌಲಿಂಗ್ ಅವರ ಹ್ಯಾರಿ ಪಾಟರ್ ಕಾದಂಬರಿಗಳನ್ನು ಆಧರಿಸಿದ ಈ ಸರಣಿಯು ಪ್ರಪಂಚದಾದ್ಯಂತ ಅಪಾರ ಜನಪ್ರಿಯತೆಯನ್ನು ಗಳಿಸಿದೆ. ಹೊಸ ಸರಣಿಯು ಇನ್ನಷ್ಟು ಆಳವಾದ ಕಥಾಹಂದರವನ್ನು ಹೊಂದಲಿದೆ ಎಂದು ಹೇಳಲಾಗುತ್ತಿದೆ, ಇದು ಅಭಿಮಾನಿಗಳಿಗೆ ಮ್ಯಾಜಿಕಲ್ ಲೋಕದ ಅನನ್ಯ ಅನುಭವ ನೀಡಲಿದೆ.