ಪ್ರಯಾಣಿಕರಿಗೆ ಗುಡ್ ನ್ಯೂಸ್: ರೈಲಿನ ಸಾಮಾನ್ಯ ಸ್ಲೀಪರ್ ಕೋಚ್ ನಲ್ಲೂ ಹೊದಿಕೆ, ದಿಂಬು ವಿತರಣೆ

ನವದೆಹಲಿ: ಇದುವರೆಗೆ ಎಸಿ ಕೋಚ್ ಪ್ರಯಾಣಿಕರಿಗೆ ಮಾತ್ರ ರೈಲ್ವೆ ಇಲಾಖೆ ಹಾಸಿಗೆ, ದಿಂಬು, ಹೊದಿಕೆ ನೀಡುತ್ತಿದ್ದು, ಇದೀಗ ನಾನ್ ಎಸಿ ಸ್ಲೀಪರ್ ಕೋಚ್ ಪ್ರಯಾಣಿಕರಿಗೂ ಈ ಸೌಲಭ್ಯ ಕಲ್ಪಿಸಲಿದ್ದು, ಜನವರಿ 1ರಿಂದ ಜಾರಿಗೆ ಬರಲಿದೆ.

ಜನವರಿ 1ರಿಂದ ನಾನ್ ಎಸಿ ಸ್ಲೀಪರ್ ಕೋಚ್ ಪ್ರಯಾಣಿಕರಿಗೆ ನಿಗದಿತ 50 ಬಾಡಿಗೆ ಆಧಾರದಲ್ಲಿ ತಲೆದಿಂಬು ಮತ್ತು ಬೆಡ್ ಶೀಟ್ ವಿತರಿಸಲು ದಕ್ಷಿಣ ರೈಲ್ವೆ ನಿರ್ಧರಿಸಿದೆ.

ಚೆನ್ನೈ -ಮಂಗಳೂರು ಸೂಪರ್ ಫಾಸ್ಟ್ ಎಕ್ಸ್ಪ್ರೆಸ್, ಚೆನ್ನೈ ಎಗ್ಮೋರ್ -ಮಂಗಳೂರು ಎಕ್ಸ್ ಪ್ರೆಸ್ ಸೇರಿ 10 ರೈಲುಗಳಲ್ಲಿ ಹೊದಿಕೆ, ತಲೆದಿಂಬು ವಿತರಿಸುವ ಯೋಜನೆ ಆರಂಭಿಕ ಹಂತದಲ್ಲಿ ಪ್ರಾಯೋಗಿಕವಾಗಿ ಜಾರಿಯಾಗಲಿದ್ದು, ಇದರ ಯಶಸ್ಸು ನೋಡಿಕೊಂಡು ಉಳಿದ ರೈಲುಗಳಲ್ಲೂ ಸೇವೆ ವಿಸ್ತರಿಸಲಾಗುವುದು.

ಮಳೆಗಾಲ ಮತ್ತು ಚಳಿಗಾಲದಲ್ಲಿ ಪ್ರಯಾಣಿಸುವ ಪ್ರಯಾಣಿಕರಿಗೆ ಇದರಿಂದ ಅನುಕೂಲವಾಗಲಿದೆ. ಕವರ್ ಸಹಿತ ತಲೆದಿಂಬು ಮತ್ತು ಬೆಡ್ ಶೀಟ್ ಗೆ 50 ರೂ. ಬಾಡಿಗೆ, ಕೇವಲ ಬೆಡ್ ಶೀಟ್ ಗೆ 20 ರೂ., ಕವರ್ ಸಹಿತ ತಲೆದಿಂಬು ಬೇಕಿದ್ದರೆ 30 ರೂ. ನೀಡಬೇಕಿದೆ ಎನ್ನಲಾಗಿದೆ.