ಬಾಲಿವುಡ್ ನಟಿ ದಿಯಾ ಮಿರ್ಜಾ ತಮ್ಮ ಗರ್ಭಾವಸ್ಥೆಯ ಅತ್ಯಂತ ಸವಾಲಿನ ದಿನಗಳನ್ನು ಮೆಲುಕು ಹಾಕಿದ್ದಾರೆ. 39ನೇ ವಯಸ್ಸಿನಲ್ಲಿ ತಾಯಿಯಾದ ಅವರು, ತಮ್ಮ ಮಗ ಅವ್ಯಾನ್ ಹುಟ್ಟಿದ ಕೇವಲ 36 ಗಂಟೆಯಲ್ಲೇ ಕರುಳಿನಲ್ಲಿ ಉಂಟಾಗಿದ್ದ ತೂತಿಗೆ “ಜೀವ ಉಳಿಸುವ ಶಸ್ತ್ರಚಿಕಿತ್ಸೆ”ಗೆ ಒಳಗಾಗಿದ್ದ ಎಂದು ಬಹಿರಂಗಪಡಿಸಿದ್ದಾರೆ.
ಗರ್ಭಾವಸ್ಥೆಯ ಐದನೇ ತಿಂಗಳಲ್ಲಿ ಅಪೆಂಡಿಕ್ಸ್ ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದರಿಂದ ತೀವ್ರ ಬ್ಯಾಕ್ಟೀರಿಯಾ ಸೋಂಕು ತಗುಲಿರಬಹುದು ಎಂದು ದಿಯಾ ನಂಬಿದ್ದಾರೆ. ಆರನೇ ತಿಂಗಳ ಅಂತ್ಯದ ವೇಳೆಗೆ, ತಮ್ಮ ಪ್ಲಾಸೆಂಟಾಕ್ಕೆ ರಕ್ತಸ್ರಾವವಾಗಿ ದೇಹ ಸೆಪ್ಸಿಸ್ ಸ್ಥಿತಿಗೆ ತಲುಪಿದೆ ಎಂದು ತಿಳಿದುಬಂದಿದೆ. “ಸಮಯಕ್ಕೆ ಸರಿಯಾಗಿ ಮಗುವನ್ನು ಹೊರತೆಗೆಯದಿದ್ದರೆ, ನಾವಿಬ್ಬರೂ ಬದುಕುಳಿಯುತ್ತಿರಲಿಲ್ಲ, ಅದು ನಿಜಕ್ಕೂ ಭಯಾನಕವಾಗಿತ್ತು” ಎಂದು ದಿಯಾ ನೆನಪಿಸಿಕೊಂಡಿದ್ದಾರೆ.
“ನನ್ನ ಮಗುವನ್ನು ಹೇಗಾದರೂ ಮಾಡಿ ಉಳಿಸಿ ಎಂದು ಸ್ತ್ರೀ ರೋಗ ತಜ್ಞರಲ್ಲಿ ಬೇಡಿಕೊಂಡೆ” ಎಂದು ‘ಆಫೀಶಿಯಲ್ ಪೀಪಲ್ ಆಫ್ ಇಂಡಿಯಾ’ಗೆ ನೀಡಿದ ಸಂದರ್ಶನದಲ್ಲಿ ದಿಯಾ ಹೇಳಿದ್ದಾರೆ. ಅವ್ಯಾನ್ ಕೇವಲ 810 ಗ್ರಾಂ ತೂಕದೊಂದಿಗೆ ಜನಿಸಿದನು ಮತ್ತು ತಕ್ಷಣವೇ ಎನ್‌ಐಸಿಯುಗೆ ಕರೆದೊಯ್ಯಲಾಯಿತು. ತನಗೆ 21 ದಿನಗಳ ಕಾಲ ಐವಿ ಆಂಟಿಬಯಾಟಿಕ್ಸ್ ಚಿಕಿತ್ಸೆ ನೀಡಲಾಯಿತು ಎಂದಿದ್ದಾರೆ.
ತಮ್ಮ ಮಗನ ಶಸ್ತ್ರಚಿಕಿತ್ಸೆಯ ಬಗ್ಗೆ ವಿವರಿಸಿದ ದಿಯಾ, “ಅವನ ಕರುಳಿನಲ್ಲಿ ರಂಧ್ರವಿತ್ತು ಮತ್ತು ಶಸ್ತ್ರಚಿಕಿತ್ಸೆಯ ಮೂಲಕ ಸ್ಟೋಮಾ (ಕರುಳಿನ ಭಾಗವನ್ನು ಹೊರತೆಗೆಯುವಿಕೆ) ಅಳವಡಿಸಲಾಯಿತು. ಇದು ಕೋವಿಡ್ ಸಮಯವಾಗಿದ್ದರಿಂದ, ವಾರಕ್ಕೆ ಕೇವಲ ಎರಡು ಬಾರಿ ಅವನನ್ನು ಭೇಟಿಯಾಗಲು ಅನುಮತಿ ಇತ್ತು. ಅವನಿಗೆ 2.5 ಕೆ.ಜಿ ತೂಕ ಬರುವವರೆಗೂ ನಾನು ಅವನನ್ನು ಎತ್ತಿಕೊಳ್ಳಲಾಗಲಿಲ್ಲ. ನಾನು ಅವನನ್ನು ಕೇವಲ 20 ದಿನಗಳ ಕಾಲ ಮನೆಗೆ ಕರೆತಂದೆ, ಆಗ ಯಾವುದೇ ನರ್ಸ್ ಅವನನ್ನು ಮುಟ್ಟಲು ಇಷ್ಟಪಡಲಿಲ್ಲ ಏಕೆಂದರೆ ಅದು ಭಯಾನಕ ದೃಶ್ಯವಾಗಿತ್ತು. ಹಾಗಾಗಿ ನಾನೇ ಡ್ರೆಸ್ಸಿಂಗ್ ಮಾಡಿದೆ. ಅವನು 3.5 ಕೆ.ಜಿ ತಲುಪಿದ ನಂತರ, ಸ್ಟೋಮಾವನ್ನು ಸರಿಪಡಿಸಲು ಮತ್ತೊಂದು 3-4 ಗಂಟೆಗಳ ಶಸ್ತ್ರಚಿಕಿತ್ಸೆಗೆ ಒಳಗಾದನು” ಎಂದು ತಿಳಿಸಿದ್ದಾರೆ.
ಈ ಸಂಪೂರ್ಣ ಪ್ರಯಾಣವನ್ನು ತಮ್ಮ ಮಗ ಅವ್ಯಾನ್‌ಗಾಗಿ ಪುಸ್ತಕ ರೂಪದಲ್ಲಿ ದಾಖಲಿಸುತ್ತಿರುವುದಾಗಿ ದಿಯಾ ಮಿರ್ಜಾ ಹೇಳಿದ್ದಾರೆ.
Loading ...
