ಪುತ್ರಿಯ ಮೇಲೆ ನಿರಂತರ 3 ವರ್ಷ ಲೈಂಗಿಕ ದೌರ್ಜನ್ಯ: ತಂದೆಗೆ ಮೂರು ಜೀವಾವಧಿ ಶಿಕ್ಷೆ, ಸಾಯುವವರೆಗೂ ಜೈಲು…!

ತಿರುವನಂತಪುರಂ: ತನ್ನ ಅಪ್ರಾಪ್ತ ಪುತ್ರಿಯ 3 ವರ್ಷ ಲೈಂಗಿಕ ದೌರ್ಜನ್ಯ ಎಸಗಿದ ವ್ಯಕ್ತಿಗೆ ಕೇರಳದ ಇಡುಕ್ಕಿ ಫಾಸ್ಟ್ ಟ್ರ್ಯಾಕ್ ವಿಶೇಷ ನ್ಯಾಯಾಲಯ 3 ಜೀವಾವಧಿ ಶಿಕ್ಷೆ ವಿಧಿಸಿದೆ.

ಪುತ್ರಿ 5 ವರ್ಷದವಳಾಗಿದ್ದಾಗಿನಿಂದ ಎಂಟು ವರ್ಷದವಳಾಗುವವರೆಗೆ ಸತತ ಮೂರು ವರ್ಷ ಕಾಲ ನಿರಂತರ ಲೈಂಗಿಕ ದೌರ್ಜನ್ಯ ಎಸಗಿದ್ದ ವ್ಯಕ್ತಿಗೆ 3 ಜೀವಾವಧಿ ಶಿಕ್ಷೆ ಜತೆಗೆ 3 ಲಕ್ಷ ರೂ. ದಂಡ ವಿಧಿಸಲಾಗಿದೆ.

ಕರಿಮನೂರ್ ಬಳಿಯ ಬಾಡಿಗೆ ಮನೆಯಲ್ಲಿದ್ದಾಗ ಅಪರಾಧಿ ಈ ಕೃತ್ಯ ಎಸಗಿದ್ದ. 2020ರಲ್ಲಿ ಘಟನೆ ಬೆಳಕಿಗೆ ಬಂದಿತ್ತು. ನಿರಂತರ ಹೊಟ್ಟೆ ನೋವಿನಿಂದ ಒಡಲುತ್ತಿದ್ದ ಬಾಲಕಿಯನ್ನು ಚಿಕಿತ್ಸೆಗಾಗಿ ಆಸ್ಪತ್ರೆಗೆ ಕರೆದುಕೊಂಡಾಗ ತಂದೆಯ ಕೃತ್ಯಗಳಿಂದ ಈ ರೀತಿ ಆಗಿದೆಯೇ ಎಂದು ತಾಯಿಯನ್ನು ಬಾಲಕಿ ಪ್ರಶ್ನಿಸಿದ್ದಳು.

ತಾಯಿ ಏನಾಗಿದೆ ಎಂದು ಸಮಾಧಾನದಿಂದ ವಿವರವಾಗಿ ಕೇಳಿದಾಗ ಮತ್ತು ಕೌನ್ಸೆಲಿಂಗ್ ಸಮಯದಲ್ಲಿ ತನ್ನ ತಂದೆಯ ಕೃತ್ಯದ ಬಗ್ಗೆ ಬಾಲಕಿ ಹೇಳಿಕೊಂಡಿದ್ದಳು. ಕರಿಮನೂರ್ ಪೊಲೀಸ್ ಠಾಣೆಯಲ್ಲಿ ಈ ಬಗ್ಗೆ ಪೋಕ್ಸೋ ಪ್ರಕರಣ ದಾಖಲಾಗಿತ್ತು. ವಿಚಾರಣೆ ನಡೆಸಿದ ಇಡುಕ್ಕಿ ಫಾಸ್ಟ್ ಟ್ರ್ಯಾಕ್ ವಿಶೇಷ ನ್ಯಾಯಾಲಯ 3 ಜೀವಾವಧಿ ಶಿಕ್ಷೆ ವಿಧಿಸಿದೆ.

ಸಾಯುವವರೆಗೂ ಜೈಲು ಶಿಕ್ಷೆ ವಿಧಿಸಲಾಗಿದೆ ಎಂದು ಪ್ರಕರಣದ ಬಗ್ಗೆ ಪ್ರತಿಕ್ರಿಯೆ ನೀಡಿದ ಸಾರ್ವಜನಿಕ ಅಭಿಯೋಜಕ ಶಿಜೋಮನ್ ಜೋಸೆಫ್ ತಿಳಿಸಿದ್ದಾರೆ.