ನವದೆಹಲಿ: ಹಿಮಾಚಲ ಪ್ರದೇಶದ ಕಾಂಗ್ರೆಸ್ ಸರ್ಕಾರವು ಹೆಣ್ಣುಮಕ್ಕಳ ಮದುವೆಯ ಕನಿಷ್ಠ ವಯಸ್ಸಿನ ಮಿತಿಯನ್ನು ಮೂರು ವರ್ಷಗಳವರೆಗೆ ಹೆಚ್ಚಿಸುವುದಾಗಿ ಘೋಷಿಸಿದೆ.
ರಾಜ್ಯದಲ್ಲಿ ಈಗ 21 ವರ್ಷಕ್ಕಿಂತ ಮೊದಲು ಹೆಣ್ಣುಮಕ್ಕಳನ್ನು ಮದುವೆಯಾಗಲು ಸಾಧ್ಯವಿಲ್ಲ ಎಂದು ಮುಖ್ಯಮಂತ್ರಿ ಸುಖ್ವಿಂದರ್ ಸಿಂಗ್ ಸುಖು ಹೇಳಿದ್ದಾರೆ. ಇದಕ್ಕಾಗಿ, ಅವರ ಸರ್ಕಾರವು ಕಾನೂನು ನಿಬಂಧನೆಗಳನ್ನು ಮಾಡಲು ಹೊರಟಿದೆ. ಪ್ರಸ್ತುತ, ಹೆಣ್ಣುಮಕ್ಕಳಿಗೆ ಮದುವೆಯ ಕನಿಷ್ಠ ವಯಸ್ಸು 18 ವರ್ಷಗಳು ಮತ್ತು ಹುಡುಗರಿಗೆ 21 ವರ್ಷಗಳು. ಪ್ರಸಕ್ತ ವಿಧಾನಸಭಾ ಅಧಿವೇಶನದಲ್ಲಿ ಈ ಬದಲಾವಣೆ ಮಾಡಲಾಗುವುದು ಎಂದು ಸುಖು ಸ್ಪಷ್ಟಪಡಿಸಿದರು.
ಕೀಲಾಂಗ್ ನಲ್ಲಿ ಸೋಮವಾರ ಲಾಹೌಲ್ ಶರದ್ ಉತ್ಸವವನ್ನು ಉದ್ಘಾಟಿಸುವಾಗ ಮುಖ್ಯಮಂತ್ರಿ ವೇದಿಕೆಯಿಂದ ಇದನ್ನು ಘೋಷಿಸಿದರು. ನಾವು ಇದೀಗ ಅಧಿವೇಶನದಲ್ಲಿದ್ದೇವೆ. ನಾವು ನಮ್ಮ ಹೆಣ್ಣುಮಕ್ಕಳಿಗಾಗಿ ಮತ್ತೊಂದು ಯೋಜನೆಯನ್ನು ತರುತ್ತಿದ್ದೇವೆ. ಈಗ ಹೆಣ್ಣುಮಕ್ಕಳ ಮದುವೆಯ ವಯಸ್ಸು 18 ವರ್ಷಗಳ ಬದಲಾಗಿ 21 ವರ್ಷಗಳಿಗೆ ಹೆಚ್ಚಿಸಲು ನಿರ್ಧರಿಸಿದ್ದೇವೆ. ಈ ಮೂಲಕ ಹೆಣ್ಣುಮಕ್ಕಳ ವಿವಾಹದ ವಯಸ್ಸನ್ನು 18 ರಿಂದ 21 ವರ್ಷಗಳಿಗೆ ಹೆಚ್ಚಿಸಲಿರುವ ದೇಶದ ಮೊದಲ ರಾಜ್ಯ ಹಿಮಾಚಲ ಪ್ರದೇಶವಾಗಲಿದೆ ಎಂದರು.
