BIG NEWS: ಚಂದ್ರನ ಅಂಗಳದಲ್ಲಿ ಮಾನವ ಹೆಜ್ಜೆಯಿರಿಸಿ 52 ವರ್ಷ ಪೂರ್ಣ

ಚಂದ್ರನ ಅಂಗಳದಲ್ಲಿ ಮಾನವ ಹೆಜ್ಜೆಯಿರಿಸಿ 52 ವರ್ಷಗಳು ಪೂರ್ಣಗೊಂಡಿದೆ. 1969ರ ಜುಲೈ 20 ವಿಶ್ವದ ಇತಿಹಾಸದಲ್ಲಿ ಒಂದು ಹೊಸ ಅಧ್ಯಾಯಕ್ಕೆ ಮುನ್ನುಡಿ ಬರೆದಿತ್ತು. ಹೀಗಾಗಿ ಈ ದಿನವನ್ನು ರಾಷ್ಟ್ರೀಯ ಚಂದ್ರಯಾನದ ದಿನವನ್ನಾಗಿ ಅಮೆರಿಕ ಘೋಷಿಸಿದೆ.

ಅಂದು ಮಾನವಸಹಿತ ಚಂದ್ರಯಾನದ ಕನಸು ನನಸು ಮಾಡಿತ್ತು ಅಮೆರಿಕಾದ ನಾಸಾ. 1969ರಲ್ಲಿ ನೀಲ್ ಆರ್ಮ್‌ಸ್ಟ್ರಾಂಗ್ ಚಂದ್ರನ ಅಂಗಳದಲ್ಲಿ ಇಟ್ಟ ಮೊದಲ ಹೆಜ್ಜೆ ಹೊಸ ಇತಿಹಾಸ ಬರೆದಿತ್ತು.

ಅಮೆರಿಕವು ಅಪೋಲೋ-11 ನೌಕೆ ಮೂಲಕ 1969ರ ಜುಲೈ 20ರಂದು ನೀಲ್ ಆರ್ಮ್‌ಸ್ಟ್ರಾಂಗ್ ಅವರನ್ನು ಕಳುಹಿಸಿ ಚಂದ್ರನ ಮೇಲೆ ಕಾಲಿಟ್ಟ ಮೊದಲ ರಾಷ್ಟ್ರ ಎಂಬ ಹೆಗ್ಗಳಿಕೆಗೆ ಪಾತ್ರವಾಯಿತು. ನೀಲ್ ಜತೆ ಎಡ್ವಿನ್.ಬಿ. ಆಲ್ಡ್ರಿನ್ ಕೂಡ ಚಂದ್ರನ ಮೇಲೆ ಹೆಜ್ಜೆ ಇರಿಸಿದ್ದರು.

ಇತಿಹಾಸ:

– ಆರ್ಮ್‌ಸ್ಟ್ರಾಂಗ್ ಹಾಗೂ ಆಲ್ಡಿನ್ ಚಂದ್ರನಲ್ಲಿ ಹೆಜ್ಜೆ ಇಟ್ಟಿದ್ದನ್ನು ಜಗತ್ತಿನಾದ್ಯಂತ 60 ಕೋಟಿ ಜನರು ವೀಕ್ಷಿಸಿದ್ದರು.

– ಆಗಿನ ಅಮೆರಿಕ ಅಧ್ಯಕ್ಷರಾಗಿದ್ದ ಜಾನ್ ಎಫ್. ಕೆನಡಿ ಅವರು 1962ರಲ್ಲಿ ಚಂದ್ರಯಾನ ಯೋಜನೆ ನಿರ್ಧಾರ ಘೋಷಿಸಿದ್ದರು.

– ಈ ಯೋಜನೆಗಾಗಿ 1960ರ ದಶಕದಲ್ಲಿ 72 ಲಕ್ಷ ಕೋಟಿ ರೂ.ಗಳನ್ನು ಮೀಸಲಿಡಲಾಗಿತ್ತು.

– ಅಪೋಲೋ 11 ಕಮಾಂಡ್ ಮಾಡ್ಯುಲ್ 6 ಅಡಿ ಉದ್ದ ಹಾಗೂ 12.8 ಅಡಿ ಅಗಲವನ್ನು ಹೊಂದಿತ್ತು.

– ಹಲವು ಗಗನನೌಕೆಗಳ ಪ್ರಯೋಗದ ಬಳಿಕ 1967ರಲ್ಲಿ ಪ್ರೀಲಾಂಚ್ ಟೆಸ್ಟ್ ನಡೆಸುತ್ತಿರಬೇಕಾದರೆ ಅಪೋಲೋ 1 ಕಮಾಂಡ್ ಮಾಡ್ಯುಲ್ ಒಳಗೆ ಬೆಂಕಿ ಉಂಟಾದ ಪರಿಣಾಮ ಮೂವರು ಗಗನಯಾತ್ರಿಗಳು ಮೃತಪಟ್ಟಿದ್ದರು.

– ಗಗನಯಾನಿಗಳ ಸುರಕ್ಷತೆಗೆ ಆದ್ಯತೆ ನೀಡುವ ಮುಖೇನ ಸತತ ಪರೀಕ್ಷೆಗಳನ್ನು ನಡೆಸಿ 1969ರಲ್ಲಿ ಮಾನವ ಸಹಿತ ಯಶಸ್ವಿ ಗಗನಯಾತ್ರೆ ಕೈಗೊಂಡು ಇತಿಹಾಸ ಸೃಷ್ಟಿಸಿತು.

– ಚಂದ್ರನ ಮೇಲೆ ಇಳಿದ ಆರು ಗಂಟೆಗಳ ನಂತರ ಆರ್ಮ್‌ಸ್ಟ್ರಾಂಗ್ ಚಂದ್ರನ ಮೇಲೆ ಹೆಜ್ಜೆಯಿಟ್ಟರು. ಅವರು ಬಾಹ್ಯಾಕಾಶ ನೌಕೆಯ ಹೊರಗೆ ಸುಮಾರು ಎರಡುವರೆ ಗಂಟೆಗಳ ಕಾಲ ಕಳೆದರು. ಆಲ್ಡ್ರೀನ್ ಹಾಗೂ ನೀಲ್ ಇಬ್ಬರು ಗಗನಯಾತ್ರಿಗಳು 21.5 ಕೆ.ಜಿ ತೂಕದ ಚಂದ್ರನ ವಸ್ತುಗಳನ್ನು ಸಂಗ್ರಹಿಸಿ ಭೂಮಿಗೆ ಮರಳಿದರು.