ಉದ್ಯಮಿ ಕೊಲೆ ಪ್ರಕರಣದಲ್ಲಿ ಕಾನ್​ಸ್ಟೇಬಲ್​ ಸೇರಿದಂತೆ ಐವರು ಅರೆಸ್ಟ್

ಬಿಹಾರದ ಉದ್ಯಮಿ ಹಾಗೂ ಆತನ ಚಾಲಕನ ಕೊಲೆ ಪ್ರಕರಣವನ್ನು ಭೇದಿಸಿರುವ ಜಾರ್ಖಂಡ್​ ಪೊಲೀಸರು ಓರ್ವ ಪೇದೆ ಸೇರಿದಂತೆ ಐವರನ್ನು ಬಂಧಿಸಿದ್ದಾರೆ. ಜಾರ್ಖಂಡ್​ ಪೊಲೀಸರು ನೀಡಿರುವ ಮಾಹಿತಿಯ ಪ್ರಕಾರ, ಉದ್ಯಮಿ ಹಾಗೂ ಚಾಲಕನ ಅಸ್ಥಿಪಂಜರ ಗಾರ್ವಾ ಜಿಲ್ಲೆಯ ಪುಂಡಗ ನದಿಯಲ್ಲಿ ಪತ್ತೆಯಾಗಿತ್ತು.

ಮೃತ ಉದ್ಯಮಿಯನ್ನು ಮಿಥಿಲೇಶ್​ ಪ್ರಸಾದ್​ ಹಾಗೂ ಆತನ ಚಾಲಕನನ್ನು ಶ್ರವಣ್​ ಕುಮಾರ್​ ಎಂದು ಗುರುತಿಸಲಾಗಿದೆ. ಔರಾಂಗಾಬಾದ್​ ನಿವಾಸಿಯಾಗಿದ್ದ ಮಿಥಿಲೇಶ್​ ಬಿಹಾರದ ಪ್ರಸಿದ್ಧ ಉದ್ಯಮಿಯಾಗಿದ್ದರು.

ಆಗಸ್ಟ್​ 25ರಂದು ಪುತ್ರ ಹಾಗೂ ಸೊಸೆಯನ್ನು ಭೇಟಿಯಾಗಿದ್ದ ಪ್ರಸಾದ್​ ತಮ್ಮ ಪತ್ನಿ ಹಾಗೂ ಚಾಲಕನ ಜೊತೆ ಛತ್ತೀಸಗಢದ ಪಾರ್ಥಾಪುರದಿಂದ ವಾಪಸ್ಸಾಗುತ್ತಿದ್ದರು. ಜಾರ್ಖಂಡ್​ ಪೊಲೀಸ್​ ಪೇದೆ ಸೇರಿದಂತೆ ಐವರು ರಾಷ್ಟ್ರೀಯ ಹೆದ್ದಾರಿ 139ರಲ್ಲಿ ಕಾರನ್ನು ಅಡ್ಡಗಟ್ಟಿದ್ದಾರೆ. ಪ್ರಸಾದ್​ ಹಾಗೂ ಅವರ ಚಾಲಕನಿಗೆ ಗನ್​​ ಹಿಡಿದು ಬೆದರಿಸಿದ್ದರು.

ತನಿಖೆ ವೇಳೆ ಆರೋಪಿಗಳು ಮೃತ ಪ್ರಸಾದ್​ ಬಳಿ 30 ಲಕ್ಷ ರೂಪಾಯಿಗೆ ಡಿಮ್ಯಾಂಡ್​ ಮಾಡಿದ್ದರು ಎನ್ನಲಾಗಿದೆ. ಸಾಕಷ್ಟು ಮಾತುಕತೆಯ ಬಳಿಕ ದರೋಡೆಕೋರರು ಉದ್ಯಮಿ ಪ್ರಸಾದ್​ ಬಳಿ 10 ಲಕ್ಷ ರೂಪಾಯಿ ಡೀಲ್​ ಮಾಡಿಕೊಂಡಿದ್ದರು.

ಬಿಹಾರ ಉದ್ಯಮಿ ಹಾಗೂ ಚಾಲಕನ ನಾಪತ್ತೆ ವಿಚಾರವಾಗಿ ಪ್ರಸಾದ್​ ಪತ್ನಿ ಪಲಮು ಠಾಣೆಯಲ್ಲಿ ದೂರು ದಾಖಲಿಸಿದ್ದರು. ತನಿಖೆ ವೇಳೆ ಆರೋಪಿಗಳು ಹಣ ವಸೂಲಿ ಮಾಡಿದ ಬಳಿಕ ಉದ್ಯಮಿ ಹಾಗೂ ಚಾಲಕನನ್ನು ಕೊಲೆ ಮಾಡಿದ್ದಾಗಿ ತಪ್ಪೊಪ್ಪಿಕೊಂಡಿದ್ದಾರೆ ಎಂದು ಜಾರ್ಖಂಡ್​ ಪೊಲೀಸರು ಮಾಹಿತಿ ನೀಡಿದ್ದಾರೆ.