ಕೊರೊನಾ ಲಸಿಕೆ ಪಡೆದ ಖುಷಿಯಲ್ಲಿ ಆರೋಗ್ಯ ಕಾರ್ಯಕರ್ತರಿಂದ ಭರ್ಜರಿ ನೃತ್ಯ

ಬೋಸ್ಟನ್: ಮೊದಲ ಡೋಸ್ ಕೋವಿಡ್ -19 ವ್ಯಾಕ್ಸಿನ್ ಪಡೆದ ಬೋಸ್ಟನ್ ಹೆಲ್ತ್ ಕೇರ್ ಸೆಂಟರ್(ಬಿಎಂಸಿ) ಆರೋಗ್ಯ ಕಾರ್ಯಕರ್ತರು ನೃತ್ಯ ಮಾಡಿದ ವಿಡಿಯೋ ಜಾಲತಾಣಗಳಲ್ಲಿ ವೈರಲ್ ಆಗಿದೆ.

ಮಾಸ್ಕ್, ಫೇಸ್ ಶೀಲ್ಡ್ ಹಾಕಿದ ಆರೋಗ್ಯ ಕಾರ್ಯಕರ್ತರು ಆಸ್ಪತ್ರೆಯ ಆವರಣದಲ್ಲಿ ಒಟ್ಟಾಗಿ ಸೇರಿ ಅಮೆರಿಕಾದ ಲಿಜ್ಜೋ ಅವರ ‘ಗಾಡ್ ಆ್ಯಸ್ ಹೆಲ್’ ಎಂಬ ಪ್ರಸಿದ್ಧ ಹಾಡಿಗೆ ಹೆಜ್ಜೆ ಹಾಕಿದ್ದಾರೆ. ಕೋವಿಡ್ ಲಸಿಕೆ ಬಗ್ಗೆ ಎಲ್ಲರಲ್ಲಿ ಅಚ್ಚರಿ, ನಿರೀಕ್ಷೆ ಇರುವುದರಿಂದ ವಿಡಿಯೋ ಕೂಡ ಜಾಲತಾಣಗಳಲ್ಲಿ ಹೆಚ್ಚು ಓಡಾಡುತ್ತಿದೆ.

ವಿಡಿಯೋವನ್ನು ಆಸ್ಪತ್ರೆಯ ಟಿಕ್ ಟಾಕ್ ಖಾತೆಯಲ್ಲೂ ಅಪ್ ಲೋಡ್ ಮಾಡಲಾಗಿದೆ. ಅಷ್ಟೇ ಅಲ್ಲ, ಬಿಎಂಸಿ ಸಿಇಒ ಕಾಟೆ ವಾಲ್ಶ್ ಅವರು ಟ್ವಿಟ್ಟರ್ ನಲ್ಲೂ ಅಪ್ ಲೋಡ್ ಮಾಡಿದ್ದಾರೆ. “ನಾನು ಯಾಕೆ ಬಿಎಂಸಿಯಲ್ಲಿ ಕೆಲಸ ಮಾಡಲು ಇಷ್ಟಪಡುತ್ತೇನೆ ಎಂಬುದಕ್ಕೆ ಕಾರಣ ಇಲ್ಲಿದೆ. ಫ್ರಂಟ್ ಲೈನ್ ಕೆಲಸಗಾರರಿಗೆ ಕೋವಿಡ್ ಲಸಿಕೆಯನ್ನು ಸಮಾನವಾಗಿ ಹಂಚಲಾಗಿದೆ. ಲಸಿಕೆ ಪಡೆದ ಖುಷಿಯಲ್ಲಿ ಅವರು ಸಂಭ್ರಮಾಚರಣೆ ಮಾಡುತ್ತಿದ್ದಾರೆ” ಎಂದು ಕಾಟೆ ಬರೆದಿದ್ದಾರೆ.