BIG NEWS: ಖ್ಯಾತ ನಿರ್ದೇಶಕಿ ಸಾಯಿ ಪರಾಂಜಪೇಗೆ ಪ್ರತಿಷ್ಠಿತ ‘ಪದ್ಮಪಾಣಿ’ ಜೀವಮಾನ ಸಾಧನೆ ಪ್ರಶಸ್ತಿ

ಛತ್ರಪತಿ ಸಂಭಾಜಿನಗರ: 10 ನೇ ಅಜಂತಾ-ಎಲ್ಲೋರಾ ಅಂತರಾಷ್ಟ್ರೀಯ ಚಲನಚಿತ್ರೋತ್ಸವ(AIFF 2025) ಜನವರಿ 15 ರಿಂದ 19 ರವರೆಗೆ ಛತ್ರಪತಿ ಸಂಭಾಜಿನಗರದಲ್ಲಿ ನಡೆಯಲಿದೆ.

ಹೆಸರಾಂತ ನಿರ್ದೇಶಕಿ, ಚಿತ್ರಕಥೆಗಾರರು, ನಿರ್ಮಾಪಕರು ಮತ್ತು ನಾಟಕಕಾರರಾದ ಸಾಯಿ ಪರಾಂಜಪೇ ಅವರಿಗೆ ಭಾರತೀಯ ಚಿತ್ರರಂಗಕ್ಕೆ ನೀಡಿದ ಅಮೂಲ್ಯ ಕೊಡುಗೆಗಳಿಗಾಗಿ ಈ ವರ್ಷ ಉತ್ಸವದ ಅತ್ಯಂತ ಪ್ರತಿಷ್ಠಿತ ಗೌರವ ‘ಪದ್ಮಪಾಣಿ’ ಜೀವಮಾನ ಸಾಧನೆ ಪ್ರಶಸ್ತಿಯನ್ನು ನೀಡಲಾಗುವುದು.

ಎಐಎಫ್‌ಎಫ್ ಸಂಘಟನಾ ಸಮಿತಿಯ ಅಧ್ಯಕ್ಷ ನಂದಕಿಶೋರ್ ಕಗ್ಲಿವಾಲ್, ಮುಖ್ಯ ಮಾರ್ಗದರ್ಶಕ ಅಂಕುಶರಾವ್ ಕದಂ ಮತ್ತು ಎಐಎಫ್‌ಎಫ್‌ನ ಗೌರವಾಧ್ಯಕ್ಷ, ನಿರ್ದೇಶಕ ಅಶುತೋಷ್ ಗೋವಾರಿಕರ್ ಅವರು ಇಂದು ಪ್ರಶಸ್ತಿ ಬಗ್ಗೆ ಘೋಷಣೆ ಮಾಡಿದರು.

ಪದ್ಮಪಾಣಿ ಪ್ರಶಸ್ತಿ ಆಯ್ಕೆ ಸಮಿತಿಯಲ್ಲಿ ಪ್ರಸಿದ್ಧ ಚಲನಚಿತ್ರ ವಿಮರ್ಶಕ ಲತಿಕಾ ಪಡ್ಗಾಂವ್ಕರ್(ಅಧ್ಯಕ್ಷರು), ನಿರ್ದೇಶಕ ಅಶುತೋಷ್ ಗೋವಾರಿಕರ್, ಸುನಿಲ್ ಸುಕ್ತಂಕರ್ ಮತ್ತು ಚಂದ್ರಕಾಂತ್ ಕುಲಕರ್ಣಿ ಅವರಿದ್ದರು. ಪ್ರಶಸ್ತಿಯು ಪದ್ಮಪಾಣಿ ಸ್ಮರಣಿಕೆ, ಗೌರವ ಪತ್ರ ಮತ್ತು ಎರಡು ಲಕ್ಷ ರೂಪಾಯಿಗಳ ನಗದು ಬಹುಮಾನವನ್ನು ಒಳಗೊಂಡಿದೆ.

ಛತ್ರಪತಿ ಸಂಭಾಜಿನಗರದ ಎಂಜಿಎಂ ವಿಶ್ವವಿದ್ಯಾನಿಲಯ ಕ್ಯಾಂಪಸ್‌ನಲ್ಲಿರುವ ರುಕ್ಮಿಣಿ ಸಭಾಂಗಣದಲ್ಲಿ ಜನವರಿ 15 ರಂದು ಬುಧವಾರ ಸಂಜೆ 6 ಗಂಟೆಗೆ ಉತ್ಸವದ ಉದ್ಘಾಟನಾ ಸಮಾರಂಭದಲ್ಲಿ ಪದ್ಮಪಾಣಿ ಜೀವಮಾನ ಸಾಧನೆ ಪ್ರಶಸ್ತಿಯನ್ನು ಸಾಯಿ ಪರಾಂಜಪೇ ಅವರಿಗೆ ಪ್ರದಾನ ಮಾಡಲಾಗುವುದು.

ಸಮಾರಂಭದಲ್ಲಿ ವಿವಿಧ ರಾಷ್ಟ್ರೀಯ ಮತ್ತು ಅಂತರಾಷ್ಟ್ರೀಯ ಕಲಾವಿದರು, ಗಣ್ಯ ವ್ಯಕ್ತಿಗಳು ಭಾಗವಹಿಸಲಿದ್ದಾರೆ. ಮುಂದಿನ ಐದು ದಿನಗಳ ಕಾಲ ಪ್ರೊಝೋನ್ ಮಾಲ್‌ನ PVR INOX ನಲ್ಲಿ ಚಲನಚಿತ್ರೋತ್ಸವ ನಡೆಯಲಿದೆ.

ಸಾಯಿ ಪರಾಂಜಪೇಗೆ ನಾಲ್ಕು ದಶಕಗಳಿಂದ ಭಾರತೀಯ ಚಿತ್ರರಂಗದಲ್ಲಿ ಪ್ರಮುಖ ವ್ಯಕ್ತಿಯಾಗಿದ್ದಾರೆ. ಅವರ ಪ್ರಭಾವಶಾಲಿ ಹಿಂದಿ ಚಲನಚಿತ್ರಗಳು ಭಾರತೀಯ ಚಿತ್ರರಂಗಕ್ಕೆ ವಿಶಿಷ್ಟವಾದ ಕೊಡುಗೆ ನೀಡಿವೆ. ಅವರ ಚಲನಚಿತ್ರಗಳು ಆಳವಾದ ಭಾವನಾತ್ಮಕ ಸ್ಪರ್ಶ ಮತ್ತು ಮಾನವ ಸಂಬಂಧಗಳ ಬಗ್ಗೆ ಒಳನೋಟವುಳ್ಳ ವ್ಯಾಖ್ಯಾನಕ್ಕಾಗಿ ಹೆಸರುವಾಸಿಯಾಗಿದೆ. ಅವರ ಕೆಲವು ಗಮನಾರ್ಹ ಕೃತಿಗಳಲ್ಲಿ ಸ್ಪರ್ಶ(1980), ಚಶ್ಮೆ ಬುದ್ದೂರ್(1981), ಕಥಾ(1983), ದಿಶಾ(1990), ಚೂಡಿಯನ್(1993), ಮತ್ತು ಸಾಜ್(1997) ಸೇರಿವೆ. ಚಲನಚಿತ್ರ ನಿರ್ದೇಶನದ ಜೊತೆಗೆ, ಪರಂಜಪೇ ಅವರು ಹಲವಾರು ಮಹತ್ವದ ನಾಟಕಗಳು ಮತ್ತು ಮಕ್ಕಳ ನಾಟಕಗಳನ್ನು ನಿರ್ದೇಶಿಸಿದ್ದಾರೆ. ಅವರು ಮರಾಠಿ ಸಾಹಿತ್ಯಕ್ಕೆ, ವಿಶೇಷವಾಗಿ ಮಕ್ಕಳ ಸಾಹಿತ್ಯಕ್ಕೆ ಗಣನೀಯ ಕೊಡುಗೆ ನೀಡಿದ್ದಾರೆ.

ಅವರ ಗಮನಾರ್ಹ ಕೊಡುಗೆಗಳನ್ನು ಗುರುತಿಸಿ, ಭಾರತ ಸರ್ಕಾರವು 2006 ರಲ್ಲಿ ಪದ್ಮಭೂಷಣ ಪ್ರಶಸ್ತಿಯನ್ನು ನೀಡಿ ಗೌರವಿಸಿತು. ಫಿಲ್ಮ್‌ ಫೇರ್ ಪ್ರಶಸ್ತಿ ಮತ್ತು ಮಹಾರಾಷ್ಟ್ರ ಪ್ರತಿಷ್ಠಾನದ ಪ್ರಶಸ್ತಿಯಂತಹ ಪುರಸ್ಕಾರಗಳೊಂದಿಗೆ ಅವರನ್ನು ಗೌರವಿಸಲಾಗಿದೆ. ಇದಲ್ಲದೆ, ಪರಾಂಜಪೇಗೆ ಅವರು ಸತತ ಎರಡು ಅವಧಿಗೆ ಚಿಲ್ಡ್ರನ್ಸ್ ಫಿಲ್ಮ್ ಸೊಸೈಟಿ ಆಫ್ ಇಂಡಿಯಾದ (CFSI) ಅಧ್ಯಕ್ಷರಾಗಿ ಸೇವೆ ಸಲ್ಲಿಸಿದ್ದಾರೆ.