‘ಕ್ಯಾರೆಟ್ ಚಟ್ನಿ’ ಸವಿದಿದ್ದೀರಾ…?

ಬರೀ ಹಸಿ ಮೆಣಸಿನ ಕಾಯಿ, ಶೇಂಗಾ, ಕೊಬ್ಬರಿ ಚಟ್ನಿ ತಿಂದು ಬೇಜಾರ್ ಆಗಿದ್ದೀರಾ. ಹಾಗಿದ್ದರೆ ಕ್ಯಾರೆಟ್ ಬಳಸಿ ಚಟ್ನಿಯನ್ನು ಮಾಡಿ ಸವಿಯಿರಿ.

ರುಚಿಯಲ್ಲಿ ಕೊಂಚ ಭಿನ್ನವೆನಿಸಿದರು, ತಿನ್ನಲು ಇಷ್ಟವಾಗುತ್ತದೆ. ಇಲ್ಲಿದೆ ಕ್ಯಾರೆಟ್ ಚಟ್ನಿ ತಯಾರಿಸುವ ವಿಧಾನ.

ಬೇಕಾಗುವ ಸಾಮಾಗ್ರಿಗಳು
ಕ್ಯಾರೆಟ್ ತುರಿ – 1 ಕಪ್
ತೆಂಗಿನ ತುರಿ – 1/2 ಕಪ್
ಕಡಲೇ ಬೇಳೆ – 1 ಟೀ ಚಮಚ
ಒಣ ಮೆಣಸಿನಕಾಯಿ – 2-3
ಹುಣಸೆಹಣ್ಣು ಸ್ವಲ್ಪ
ಉಪ್ಪು ರುಚಿಗೆ ತಕ್ಕಷ್ಟು

ಮಾಡುವ ವಿಧಾನ
ಬಾಣಲೆಗೆ ಎಣ್ಣೆ ಹಾಕದೆ ಕಡಲೆಬೇಳೆ, ಒಣ ಮೆಣಸಿನ ಕಾಯಿ, ಹುಣಸೆಹಣ್ಣು ಎಲ್ಲವನ್ನೂ ಒಟ್ಟಿಗೆ ಹಾಕಿ ಕಡಲೆಬೇಳೆ ಕೆಂಪು ಬಣ್ಣ ಬರುವವರೆಗೆ ಹುರಿದು ಕೊಳ್ಳಬೇಕು. ಈ ಮಿಶ್ರಣಕ್ಕೆ ಕ್ಯಾರೆಟ್ ತುರಿ, ತೆಂಗಿನ ತುರಿ ಮತ್ತು ಉಪ್ಪನ್ನು ಸೇರಿಸಿ. ನಂತರ ನುಣ್ಣಗೆ ರುಬ್ಬಿ. ಬೇಕಿದ್ದರೆ ಸಾಸಿವೆ ಮತ್ತು ಇಂಗಿನ ಒಗ್ಗರಣೆ ನೀಡಿ. ಊಟದ ಜೊತೆ ಅಥವಾ ತಿಂಡಿಯ ಜೊತೆ ಈ ಚಟ್ನಿಯನ್ನು ಸವಿಯಬಹುದು.